По вториот меч на ЕП за Македонија, капитенот на „рисовите“, Горан Пандев со свој осврт за 90-те минути против Украинците.

„Не се доволни само 45 добри минути на вакви натпреварувања. Треба да играме како во вториот дел цел натпревар. Почнавме внимателно, а кога ќе примиш гол од прекин, станува се потешко. Примивме гол од корнер, имавме потоа во вториот дел многу шанси да изедначиме пред пеналот, но таков е фудбалот. Жал ми е што загубивме, можевме барем до бод. Ова се натпревари кои првпат ги играме во нашите кариери. Кога примивме гол како да се опуштивме. Како да чекаме да примиме гол, па да почнеме да играме. Вакви натпревари не трпат импровизации. Мора да се игра мирно, затоа што нема што да загубиме. Ние направивме нешто големо. Мора со Холандија да играме опуштено, да го покажеме она што го знаеме на терен, па и да загубиме, да не ни биде жал. На полувремето се гледавме во соблекувална, како да не сме ние тие вистинските“ – рече капитенот Пандев по мечот.

Македонија во понеделник на арената „Јохан Кројф“ во Амстердам од 18:00 часот го игра третиот меч во групата Ц на ЕП.
Фото: ФФМ

Селекторот на македонската фудбалска репрезентација, Игор Ангеловски во изјава по денешниот меч против Украина смета дека вистинското лице на нашиот национален тим бил прикажан во второто полувреме против селекцијата предводена од Андриј Шевченко.

„Одигравме натпревар со две различни полувремиња. Во првото полувреме целта беше да влеземе претпазливо, додека во второто да влеземе егал, израмнето. Но во првиот дел сантиметри одлучуваа, поради сантиметри му беше поништен гол на Пандев. Во второто полувреме покажавме зошто сме на ЕП, дека имаме квалитет да бидеме дел од ЕП, а кога навивачите и покрај поразот со аплауз ќе ве поздрават, покажува како сме одиграле“ рече Игор Ангеловски.

Тој истакна дека на полувремето ги охрабрил играчите велејќи им дека ништо не е завршено.

„Јас кажав дека сме победени, но не сме поразени. Играчите покажаа зошто се дел од ЕП и се дел од европскиот крем. Како што го одигравме второто полувреме, така фудбалерите треба да играат и против Холандија за четири дена. Се надевам дека покрај добрата игра ќе успееме да стигнеме и до првите бодови на ЕП – вели селекторот Ангеловски.

Еден од најдобрите играчи на Македонија по завршувањето на мечот со Украина, голманот Столе Димитривски искрено и отворено:

„Првата утакмица имавме неколку грешки, на втората утакмица, во второ полувреме ја покажавме најдобрата игра што можеме да ја прикажеме. Не сум задоволен од себе затоа што не и помогнав на екипата да земеме бод, реално треба да се бориме до крај сите заедно. Ние разговараме на тренинзи, гледаме видеа од нив, вежбаме, да се одбрани пенал е многу тешко, ги имаме сите играчи студирано, треба да се одработи, ова е одбранет пенал мој, на тренерот Мицевски, на Дамјан Шишковски и на Ристе Јанков. Во Холандија одиме да се покажеме во најдобро светло, по победа или по бод“ изјави по натпреварот македонскиот голман, Столе Димитриевски кој повторно имаше добра партија слично како и во првото коло против Австрија.
Фото: ФФМ