Голем раст на бројот терористички напади во 2016-та

Бројот на терористичките напади во светот се зголемил за 14 отсто во текот на минатата 2016-та споредено се претходната година, а кога станува збор за западните земји забележан е раст од дури 175 проценти, се наведува во студијата на Aon, меѓународна компанија којашто меѓу другото се занимава и со управување со ризиците и посредување во осигурувањето.

Во студијата објавена во четвртокот се наведува дека минатата година се регистрирани 4.151 терористички акт во светот, во споредба со 3.633 во претходната 2015 година. Во западните земји во посочените години таа бројка се зголемила од 35 на 96, наведуваат стручњаците на Aon.

И покрај големиот раст на терористички дела во западните земји, тие не прават ниту три отсто од терористичкото насилство на глобално ниво.

„Сценариото за 2017 година не е розово. Навистина не гледаме причина поради којашто ситуацијата би се поправила. Кумулативниот ефект на политичките, економските и терористичките ризици создава крајно небезбедна атмосфера“, изјави за AFP, Луј Болаер, директорот на одделот за политички ризици на Aon во Франција.

Во извештајот се оценува дека „мали се можностите дека ризикот од политичко насилство ќе се намали во 2017-та (…). Губењето на територијата на групацијата Исламска држава во Ирак и во Сирија, веројатно ќе доведе до раширување на терористичката мрежа, што ќе резултира со сериозни ризици за десетици земји во регион и надвор од него, особено во Европа и во Азија“./крај/мф/сн