Свет
Шефот на иранската дипломатија: САД треба да го контролираат Израел ако сакаат да избегнат војна во регионот
Соединетите Американски Држави (САД) мора да го контролираат Израел доколку сакаат да избегнат војна во регионот, изјави шефот на иранската дипломатија, Хосеин Амир-Абдолахиан, за време на посетата на Бејрут.
„Америка сака да му дозволи на Израел да ја уништи Газа и тоа е голема грешка. Ако Американците сакаат да спречат војна во регионот, мора да го контролираат Израел“, изјави иранскиот министер за новинарите.
„Ако не се запрат израелските злосторства, не знаеме што ќе се случи“, предупреди тој.
Министерот рече и дека „безбедноста и мирот во Либан се важни за Иран“ во време кога постои страв дека либанскиот Хезболах, сојузник на Иран, отвора нов фронт против Израел.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Руски беспилотни летала гаѓаа украинска енергетска инфраструктура, делови од земјата без електрична енергија
Руски беспилотни летала погодија електрани рано утринава, прекинувајќи ја струјата во некои делови од областа Суми во северна Украина, соопштија властите.
Во објава на комуникациската платформа Телеграм, регионалните власти соопштија дека беспилотните летала ги погодиле градовите Шостка и Конотоп, североисточно од Киев и во близина на границата со Русија. Воздухопловните сили на Украина соборија седум беспилотни летала користени во нападот, соопштија регионалните власти.
Украинската војска соопшти дека соборила 24 беспилотни летала лансирани од Русија во напад во текот на ноќта врз пет други региони на југот и на истокот на земјата.
Службите за итни случаи работат на враќање на струјата во три окрузи.
Пред нешто повеќе од една недела, руските сили ја преминаа границата и почнаа да навлегуваат во североисточниот регион Харков, а властите предупредија на трупање војници и можен напад врз соседниот регион Суми.
Европа
Норвешка ја призна палестинската држава
Владата на Норвешка денеска соопшти дека нордиската земја признава независна палестинска држава.
Норвешкиот премиер Јонас Гар Стор денеска изјави дека скандинавската земја донела одлука официјално да ја признае Палестина како држава.
Одлуката стапува на сила на 28 мај, објави АП.
„Не може да има мир на Блискиот Исток доколку не дојде до признавање“, рече норвешкиот премиер, додавајќи дека „Палестина има основно право на независна држава“.
Неколку земји од Европската унија во последните недели дадоа индикации дека планираат да ја признаат Палестина, бидејќи сметаат дека решението со две држави е клучно за траен мир во тој регион.
Норвешка, која не е членка на Европската унија, но најмногу ги следи одлуките на Брисел, долго време го поддржува решението со две држави, Израел и Палестина.
Свет
Три земји денеска ќе го објават официјалното признавање на државата Палестина
Три земји денеска, како што е најавено, ќе го објават признавањето на палестинската држава, пренесува Гардијан.
Ирска, Шпанија и Норвешка се очекува да ги објават плановите за формално признавање на палестинската држава поради израелските предупредувања дека признавањето „ќе го поттикне екстремизмот и нестабилноста“.
Тројцата лидери на ирската влада – премиерот Сајмон Харис, вицепремиерот Мајкл Мартин и министерот Имон Рајан, претпладнево треба да одржат прес-конференција. Тие претходно посочија дека владата ќе направи чекор кон признавање на палестинската државност до крајот на мај.
Националната јавна радиодифузија РТЕ и Ирш Тајмс објавија дека се очекува одлуката да биде објавена на прес-конференција.
„Гардијан“ пишува дека и шпанскиот премиер Педро Санчез денеска ќе открие датум за формално признавање, откако минатата недела ја објави својата намера да го стори тоа.
Санчез беше еден од најискрените европски лидери кога се работеше за критикување на израелската офанзива во Газа.
Норвешкиот јавен сервис и дневниот весник Афтенпостен во меѓувреме објавија, повикувајќи се на неименувани извори, дека владата денеска ќе објави дека нордиската земја признава независна палестинска држава.