На грчкиот остров Санторини синоќа беше најтешката ноќ во последните денови бидејќи околу 20 земјотреси со јачина над четири степени според Рихтеровата скала ја потресоа областа од еден часот по полноќ.

Голем земјотрес е регистриран во 07:51 часот по локално време, североисточно од Анафи, со јачина од 4,6 степени. Половина час следуваше уште еден со јачина од 4.3 степени, а со интензитет од 4.5 е забележан нешто пред 10 часот.

Земјотресите над четири степени според Рихтеровата скала принудија голем број жители на островот да скокнат од кревет во страв, објави Прототема. Најсилниот земјотрес со јачина од 5,2 степени според Рихтеровата скала се случи синоќа.

Сеизмичката активност продолжи синоќа во морската област меѓу Аморгос и Санторини.

Областа беше погодена од повеќе од 6.400 земјотреси во изминатите девет дена, што предизвика загриженост кај научниците и жителите, од кои многумина го напуштија островот.

Во вторникот беше регистриран земјотрес со јачина од 5 степени, чиј епицентар се наоѓа на 22 километри југозападно од градот Аркесини на островот Аморгос.

Според податоците на Националниот универзитет во Атина (НКУА), сеизмичката активност ги покажува карактеристиките на т.н рој на земјотреси, име кое се користи за опишување на серија земјотреси, од кои ниту еден не бил значително посилен од другите и не може да се окарактеризира како голем сеизмички настан.

НКУА наведува дека се можни две сценарија: бројот на сеизмички активности би можел постепено да се намалува со помали потреси во текот на следните неколку месеци или „рој земјотреси“ може да предизвика поголем, главен земјотрес проследен со „типична секвенца од последователни потреси“.

Многумина одлучија да ги напуштат островите, што доведе до голем метеж на пристаништата, но планирани се дополнителни фериботи и воздушни линии за секој што сака да ги напушти.

Од безбедносни причини, училиштата во Санторини, Анафи, Иос и Аморгос ќе бидат затворени до петок.

Ограничувањето на долгорочното глобално затоплување на два степени Целзиусови, што е алтернативна цел на Парискиот договор за климата, во меѓувреме стана невозможно, според водечките експерти за климата.

Авторите на студијата, предводени од познатиот климатолог Џејмс Хансен, заклучија дека климата на Земјата е почувствителна на зголемување на емисиите на стакленички гасови отколку што се мислеше, објавено е во списанието Environment: Science and Policy for Sustainable Development.

Амбициозното сценарио за климатски промени на Панелот на ОН за климатски промени (IPCC), кое и дава 50 отсто шанси на планетата да го ограничи затоплувањето на под два Целзиусови степени до 2100 година, „веќе не е возможно“, рече Хансен на брифингот со новинарите.

Хансен е поранешен истакнат научник на НАСА, познат по тоа што во 1988 година на американскиот Конгрес му кажа дека се случува глобалното затоплување. „Целта од два степени е мртва“, нагласи тој. Хансен и неговите колеги тврдат дека количината на стакленички гасови кои веќе се ослободуваат во атмосферата со согорувањето на фосилните горива значи дека е загарантирано поголемо затоплување.

Температурите во наредните години ќе бидат 1,5 степени Целзиусови или повеќе над прединдустриските нивоа, што ќе биде поразително за коралните гребени и ќе предизвика посилни бури, а до 2045 година тие ќе се зголемат за околу два Целзиусови степени.

Научниците проценуваат дека топењето на поларниот мраз и приливот на слатка вода во Северниот Атлантик ќе предизвика нарушување на главната океанска струја AMOC во рок од 20 до 30 години.

Струите носат топлина на различни делови на планетата, како и хранливи материи важни за животот во океанот.

Неговото нарушување „ќе предизвика големи проблеми, вклучително и покачување на нивото на морето за неколку метри, така што го опишуваме колапсот на AMOC како точка од која нема враќање“, се наведува во студијата.

Во Парискиот климатски договор од 2015 година, земјите се согласија да се стремат да го ограничат глобалното затоплување на 1,5 степени Целзиусови над прединдустриските нивоа до крајот на векот.

Научниците заклучија дека овој праг е критичен за спречување на нарушување на големите океански струи, брзото топење на вечниот мраз на север и колапсот на тропските корални гребени.

Целта од 1,5 степени Целзиусови веќе е надмината во последните две години, покажуваат податоците на Коперник, европскиот систем за следење на климата, иако Парискиот договор зборува за долгорочен тренд со децении.

Глобалното затоплување од два степени Целзиусови би имало уште поголеми последици, вклучително и неповратно губење на ледени плочи, планински глечери и снег, морски мраз и вечен мраз.

Авторите признаа дека резултатите од истражувањето изгледаат мрачно, но тврдат дека е потребна искреност за промена.

„Нема да им помогнеме на младите ако не сме реални во проценките за климата и ако не укажеме на неефикасноста на сегашните политики за ограничување на глобалното затоплување“, предупредија тие.

„Денес, со растечките кризи, вклучително и глобалните климатски промени, дојдовме до точка каде што мораме да го решиме проблемот со сопствените интереси“, додаваат тие, нагласувајќи дека сепак се „оптимисти“ за иднината.

Неколку училишта во Загреб добија закани за бомби, објавија хрватските медиуми.

„Во текот на ноќта, образовните институции во областа на градот Загреб добија порака на нивните имејл адреси за можна поставеност на експлозивни направи. Полициски службеници се испратени на локациите и во моментов ја проверуваат веродостојноста на наводите во добиената електронска пошта“, соопшти хрватската полицијата.

„Неколку училишта во Загреб добија пријави за поставени експлозивни направи денеска. Во контакт сме со полицијата, чии пиротехничари веќе вршат увид во училиштата. Сите ученици се целосно безбедни надвор од училиштата, а сите надлежни служби преземаат максимални мерки за да се обезбеди нормализирање на ситуацијата што е можно поскоро“, потврдија од Град Загреб.

„Најостро го осудуваме овој неодговорен и опасен чин и изразуваме надеж дека сторителот(ите) брзо ќе бидат идентификувани и строго казнети“, соопштија од градот.

Во утринските часови исто така во мејловите на две образовни институции во Пожега пристигнала порака за можни експлозивни направи.

На локациите се испратени полициски службеници за преземање дополнителни мерки.