Свет
Руски бомбардер над Канада пред посетата на Обама
Канадските авиони-ловци забележале летови на руски бомбардер во близината на Канада 24 часа пред посетата на американскиот претседател Барак Обама на Отава минатата седмица.
Рускиот бомбардер за долги дистанци TU-95 којшто амeриканската војска го нарекува „Мечка“ не влегол во воздушниот простор на канадскиот дел од Арктикот, бидејќи два ловца од типот CF-18 му наредиле да отстапи, изјавил канадскиот министер за одбрана Питер Мекеј, пишува Reuters. Мекеј додал и дека Русија не ја предупредила претходно Канада за овој воен лет, а руската влада овие информации ги оценила како апсурдни. Извори од руската влада изјавиле дека Канада била известена за летот. Руската агенција Interfax се повикува на извор од руското Министерство за одбрана кој изјавил: „Соопштението од канадскиoт миснистер за одбрана е конфузно, во најмала рака кажано, и немаме што повеќе да кажеме од тоа дека станува збор за фарса“. „Нема да застанев тука, но руското присуство е забележано во текот на претседателската посета. Ова е голема коинциденција и ние го направивме вообичаеното за вакви ситуации: со F-18 ловците испративме силна порака дека треба да се вратат и да останат надвор од нашиот воздушен простор“, одговорил Мекеј на руските изјави. Тој вели дека Русија го зголемила бројот на летови на бомбардери над канадскиот Арктик во последниве пет години, нешто што било практикувано во времето на Студената војна. Меѓутоа, Мекеј не рекол кога точно се случил инцидентот и колку блиску до Канада бил рускиoт бомбардер. Канадскиот премиер Стефен Харпер во врска со инцидентот изјавил дека неговата влада се’ повеќе се соочува со агресивни руски акции и на глобално ниво и во канадскиот воздушен простор. „Ние ќе го браниме нашето небо, ќе одговориме во секое време на секој обид да биде нарушен канадскиот суверенитет“, изјавил премиерот Харпер на прес-конференција во западната провинција Саскачеван.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Бајден зборуваше за дебатата со Трамп, но и за детали од неговиот личен живот
Американскиот претседател Џозеф Бајден денеска изјави дека ќе учествува на дебата со Доналд Трамп, неговиот републикански противкандидат на ноемвриските избори.
„Не знам кога“, изјави Бајден во интервјуто со Хауард Стерн и додаде дека со нетрпение го очекува тоа, пренесе Ројтерс.
Бајден раскажуваше семејни приказни и рече дека пелтечењето било подготовка за тешките удари во животот. Тој рече дека пелтечењето како дете било најдоброто нешто што му се случило. Додаде дека на крајот го надминал пелтечењето, но дека повремено му се враќа кога зборува во јавност.
Интервјуто со Хауард Стерн се случи додека Бајден присуствуваше на политички настан во Њујорк.
За време на интервјуто, тој презентираше многу биографски детали, обидувајќи се да се претстави пред гласачите. Бајден, исто така, рече дека неговиот татко, Џозеф Робинет Бајден постариот, ретко покажувал љубов и раскажал приказна што напраавил кога бил нокаутиран додека играл рагби кога бил во четврто одделение.
„Татко ми излезе со нас и рече Џои стани. Само стани. Мора да станеш“, раскажал Бајден.
Свет
(Видео) Снимка од Ердоган хит на социјалните мрежи: Телохранител му подаде чешел на турскиот претседател, а потоа цела делегација мораше да застане
Видео од турскиот претседател Реџеп Таип Ердоган како се чешла стана хит на социјалните мрежи.
Ердоган, кој во четвртокот дојде на прославата на Уставниот суд во Анкара, цело време беше придружуван од телохранител кој ненадејно му подава чешел пред да влезе во салата. Турскиот лидер застана и почна да се чешла додека целата делегација, вклучително и претседателот на Уставниот суд, чекаше.
— Pluton (@Pluton45873221) April 26, 2024
Откако заврши со средувањето на косата, Ердоган му го даде чешелот на еден од своите советници, а потоа продолжи да се шета со претседателот на Уставниот суд, Кадир Озкај, насмеан.
Ердоган присуствуваше и на прославата на 62-годишнината од формирањето на Уставниот суд.
Свет
Се слушнало тропање и силни вибрации: Боинг изгубил дел за време на лет, извршил принудно слетување
Авионот на „Делта ерлајнс“ кој утрово полета од аеродромот „Џон Кенеди“ во Њујорк мораше да се сврти и да се врати на аеродромот поради дефект на опремата за итни случаи, пренесува „Индекс“.
Летот 520 на „Делта ерлајнс“ безбедно се врати на аеродромот околу 8:35 часот откако екипажот пријавил вибрации, соопшти Федералната управа за авијација (ФАА). Пилотите веднаш по полетувањето пријавиле во контролата на летање дека почувствувале чудни вибрации и слушнале звук на тропање.
Авионот летал 33 минути пред да се врати на ЏФК, пишува „ABC7 New York“.
„Откако леталото безбедно слета, беше забележано дека во одреден момент отпадот за итни случаи паднал“, рече портпаролот на „Делта“. За време на инцидентот во „Боингот 767“ имало 176 патници, двајца пилоти и пет стјуардеси. Нема извештаи за повредени.
Патниците биле префрлени во друг авион, кој полетал во 10:59 часот, околу три часа подоцна. Авионот чиј дел за итни случаи паднал е стар 33 години и нема да биде во служба додека „Делта“ не ја процени неговата соодветност. Од ФАА велат дека ќе го истражат целиот инцидент.