Директорот на германскиот институт „Роберт Кох“, Лотар Вилер, денес изјави дека многу позаразниот вид на коронавирус, кој за прв пат беше забележан во Велика Британија, наскоро може да стане доминантен вид во Германија, што ќе ја забави борбата против ширењето вирусот.

Тој рече дека со таканаречениот британски вид на коронавирус, Б117, во моментов се заразиле 40 отсто од заболенитете во Германија, и дека само пред четири недели, тој процент бил шест отсто, пренесува „Ројтерс“.

„Се предвидува дека Б117 наскоро ќе биде доминантна варијанта во Германија, а потоа ќе биде уште потешко да се држи вирусот под контрола, бидејќи е заразен и подеднакво опасен за сите возрасни групи“, рече Вилер.

Унгарскиот премиер Виктор Орбан изјави дека последната фаза од војната против коронавирусот започнува со двонеделното заклучување на земјата, кое започнува во понеделник, на 8 март.

Тој за унгарското радио „Кошут“ ​​изјави дека владата нема друг избор откако експертите предупредуваат на катастрофални последици доколку не биде донесена ваква одлука, пренесува МТИ.

„Мораме да се затвориме сега, за да се отвориме до Велигден“, рече Орбан.

Полицијата во Мјанмар денес отвори оган врз демонстрантите во Мандалај и уби еден човек, а голем број луѓе повторно се собраа во Јангон, Патеин и другите градови во знак на протест поради државниот удар со кој војската ја презеде власта на 1 февруари, пренесува „Ројтерс“.

Неколку илјади луѓе мирно маршираа денес во Мандалај кога полицијата отвори оган за да ги разбие демонстрантите и еден човек беше застрелан во грло, потврдија сведоците за агенцијата.

„Мислам дека има околу 25 години, но сè уште чекаме потврда од членовите на семејството“, рече докторот кој ја прегледал жртвата.

Во Јангон полицијата истрела гумени куршуми и шок-бомби за да ги растера демонстрантите на кои им се придружија околу 100 лекари во бели мантили.

„Ројтерс“ известува дека високата комесарка за човекови права при ООН, Мишел Башелет, побарала од полицијата да престане со акцијата против мирните демонстранти и изјавила дека се уапсени повеќе од 1.700 лица, вклучувајќи 29 новинари.

Министерот за надворешни работи на Сингапур, Вивијан Балакришнан, употребата на оружје против демонстрантите во Мјанмар ја нарече национална срамота и побара од армијата да постигне мирно решение на кризата, наведува агенцијата.