Свет
Властите демантираат дека атенторот од Бургас е шведски државјанин
Бугарските и шведските власти ги демантираа пишувањата на медиумите во Бугарија и Израел од четвртокот навечер дека терористичкиот напад на аеродромот во Бургас го извршил шведскиот државјанин Мехди Газели, пишува во петокот израелскиот весник Haaretz.
Претходно во четвртокот навечер интернет изданието на Haaretz како и Times of Israel и некои бугарски медиуми пишуваа дека извршител на терористичкиот напад врз автобусот со израелски туристи на паркингот пред аеродромот во бугаркото црноморско летувалиште Бургас во кој загинаа седум луѓе од кои пет Израелци а 34 беа ранети, бил 36-годишниот Мехди Мохамад Гезали. Според информациите, Гезали е шведски државјанин со алжирско и финско потекло кој во периодот меѓу 2002 и 2004 година бил во притвор во злогласниот затвор за осомничени за тероризам во американската воена база во кубанскиот залив Гвантанамо. Гезали, според овие информации, бил притворен откако бил уапсен во Пакистан каде што се обидувал да стапи во врска со бунтовничките групи.
По овие информации, според пишувањето на Haaretz, шведската новинска агенција ТТ пренесе повикувајќи се на неименувани официјални претставници на тамошните власти, дека за атентатот не е осомничен Мехди Гезали. Покрај тоа, и бугарски официјални лица, чиишто имиња исто така не се наведуваат, изјавиле за американската телевизиска мрежа ABC дека Мехди Гезали не е вистинското име на осомничениот терорист.
Претходно во четвртокот, американската телевизиска мрежа ABC, емитуваше фотографија од фалсификувана возачка дозвола од сојузната држава Мичиген којашто му припаѓала на осомничениот за нападот, која гласи на име Жак Фелипе Мартин.
Според фотографијата емитувана од ABC претходно од четвртокот, на дозволата која се претпоставува дека му припаѓа на бомбашот-самоубиец може да се прочита „Michigan Operator’s License“, и се гледа лажна адреса во сојузната држава Луизијана, која е всушност адреса на казино со име „Belle of Baton Rouge“.
Бугарските медиуми објавија дека осомниченото лице престојувало во Бугарија меѓу четири и седум дена, и дека е на околу 35-годишна возраст. Исто така, бугарската полиција соопшти дека станува збор за бомбаш-самоубиец, бидејќи неговото тело било најмногу повредено од експлозијата, што значи дека бил најблиску до експлозивната направа.
Бугарската полиција, исто така, повикувајќи се на снимките од безбедносните камери на аеродромот во Бургас, соопшти дека осомничениот е снимен на еден час пред експлозијата. Според снимките тој е долгокос со спортска капа и ранец.
Нападот во кој загинаа пет Израелци, бугарскиот возач и самиот напаѓач, се случи во средата доцна попладне на паркиралиштето на меѓународниот аеродром во Бургас кој е честа летноодморска дестинација за израелските тинејџери, а од каде што поголема група гости од Израел требало да заминат за познатото летувалиште Сончев брег. Според првичните верзии, напаѓачот го активирал експлозивниот механизам што го носел на себе кога влегол во еден од автобусите. Според истата верзија, терористот всушност сакал да ја остави бомбата во автобусот, да излезе од него и потоа да ја активира./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Шефот на НАТО: Кина сака добри односи со Западот и и помага на Русија, не може да ги има и двете
Кина мора да престане да ја поддржува руската војна во Украина ако сака да ужива во добри односи со Западот, изјави денеска генералниот секретар на НАТО Јенс Столтенберг, предупредувајќи го Пекинг со невообичаено остри зборови дека не може да ги има и двете. За време на посетата на Берлин, шефот на западната воена алијанса рече дека помошта на Пекинг е од витално значење за воените напори на Москва бидејќи ја зајакнува воената економија на Русија со споделување на врвна технологија, како што се полупроводниците.
„Минатата година Русија увезе 90 отсто од својата микроелектроника од Кина, која се користи за производство на проектили, тенкови и авиони. Кина исто така работи на Русија да и обезбеди подобрени сателитски способности“, рече Столтенберг. „Кина вели дека сака добри односи со Западот. Во исто време, Пекинг продолжува да го поттикнува најголемиот вооружен конфликт во Европа од Втората светска војна. Не може да ги има и двете“, предупреди тој.
Столтенберг ги предупреди западните сојузници да не станат зависни од Кина како што беа од Русија. „Во минатото направивме грешка што станавме зависни од руската нафта и гас. Не смееме да ја повториме таа грешка со Кина и да зависиме од нејзините пари, суровини и технологии. Зависноста не прави ранливи“, додаде тој.
Кина ги зајакна трговските и воените врски со Русија во последниве години, бидејќи САД и нивните сојузници воведоа санкции и на двете, но особено на Москва, поради нејзината инвазија на Украина. Рускиот претседател Владимир Путин изјави во четвртокот дека планира да отпатува за Кина во мај, но не прецизираше точно кога.
Свет
САД градат привремено пристаниште во близина на Газа за испраќање хуманитарна помош
Соединетите Држави почнаа да градат пристаниште во Газа, соопшти денеска Пентагон, проект кој треба да ја олесни испораката на хуманитарна помош на палестинската територија. Пристаништето треба да профункционира на почетокот на мај.
Во март, претседателот Џо Бајден објави дека американската војска ќе изгради привремено пристаниште на медитеранскиот брег на Газа за да добива хуманитарна помош по море.
Изградбата е дел од напорите да се спречи гладувањето во палестинската енклава, која веќе пет месеци се наоѓа во средината на израелската воена кампања против Хамас, која го опустоши Појас Газа и ги потопи нејзините 2,3 милиони луѓе во хуманитарна катастрофа.
„Можам да потврдам дека американските воени бродови, вклучително и УСНС Бенавидез, почнаа да градат привремено пристаниште…“ изјави за новинарите портпаролот на Пентагон, Патрик Рајдер.
ОН предупредија дека Газа е во опасност од глад и се пожалија на „огромни пречки“ при добивањето помош и нејзино дистрибуирање низ енклавата.
Агенциите за помош и администрацијата на Бајден го молеа Израел да ја олесни испораката на помош во Газа и да им дозволи на нивните конвои безбедно поминување на територијата.
Рајдер рече дека Пентагон следи некој вид минофрлачки напад во Газа што предизвика минимална штета во близина на областа каде што се гради пристаништето, но додаде дека американските сили сè уште не почнале да преместуваат ништо во областа и дека нема американски сили на теренот.
Свет
(Видео) Големи поплави во Танзанија, загинаа 155 луѓе
Во поплавите во Танзанија загинаа 155 луѓе, а најмалку 236 се повредени, изјави денеска премиерот Касим Мајалива. Во поплавите оштетени се повеќе од 10.000 куќи.
Премиерот додаде дека обилните дождови предизвикани од Ел Нино и придружени со силен ветер доведоа до поплави и лизгање на земјиштето во различни делови на земјата.
„Многу луѓе загинаа. Имаше штета на посевите, куќите, инфраструктурата како патишта, мостови и железници“, рече Мајалива.
Поплави ја погодија и Кенија, која се граничи со Танзанија на истокот на Африка, при што загинаа повеќе од 30 луѓе, пишува Си-ен-ен.
Во Кенија врне силен дожд од средината на март, а врнежите се интензивираа минатата недела. Кенискиот Црвен крст изврши повеќе од 188 спасувачки операции од март. Властите вчера затворија некои патишта во главниот град на Кенија, а неколку населби беа поплавени.