Стевче Коцевски и Винко Иванчиќ, поранешните директори на „Македонија табак 2000“, повторно ќе се појават во Основниот суд Скопје 2, откако скопскиот апелациски суд ја поништил ослободителната пресуда за приватизацијата и пререгистрацијата на поранешна „Македонија табак“, потврдија од судот.

НОВО СУДЕЊЕ ЗА ПРИВАТИЗАЦИЈАТА НА „МАКЕДОНИЈА ТАБАК“

Александар Божиновски

Стевче Коцевски и Винко Иванчиќ, поранешните директори на „Македонија табак 2000“, повторно ќе се појават во Основниот суд Скопје 2, откако скопскиот апелациски суд ја поништил ослободителната пресуда за приватизацијата и пререгистрацијата на поранешна „Македонија табак“, потврдија од судот. Двајцата, лани во април беа ослободени од сите обвиненија. На пресудата се жалело скопското обвинителство.

Коцевски е веќе правосилно осуден на четири години затвор во Струмица, во предмет кое е поврзан со „Македонија табак“ и „Тетово табак“. Тој се уште не е во затвор, како што информира неговиот адвокат Саша Крстиќ.

– Еднаш го одложивме издржувањето на затворската казна. Се уште постојат шанси за мојот клиент со користење на вонредни правни мерки, односно со инволвирање на Врховниот суд, но ќе видиме – вели Крстиќ.

Апелацискиот суд работејќи на ослободителната пресуда изречена од судијката Лидија Неделковска нашле големи прекршувања на законот. Апелациските судии утврдиле дека таа не земала предвид многу документи за приватизацијата на „Македонија табак“.

Поради ова Апелацискиот суд го одзел предметот на Неделковска и му наредил на Беќир Шаини, претседателот на Основниот суд Скопје 2 да назначи друг судија, односно, судски совет.

– Нов судски совет е назначен за случајот и со него претседава судијата Љубинка Башевска – вели Шаини.

Виолета Дума, в.д. претседател на Апелацискиот суд исто така го потврди поништувањето на пресудата. Во образложението на апелациските судии пишува дека изземањето на судијката Неделковска е заради нејзиното нестручно и несовесно постапување по предметот.

Според обвинението, Стевче Коцевски од Охрид и Винко Ивачиќ од Скопје, како раководни лица во „Македонија табак 2000“, во периодот од 2000 до 2002 година, ја злоупотребиле службената положба и овластување, со што се стекнале со имотна корист од околу 1,7 милијарди денари. По апсењето на Коцевски на 18 февруари 2003 година, истражен судија од Основниот суд Скопје 1, му одредил мерка притвор во траење од 30 дена. Иванчиќ бил во бегство. Коцевски поминал шест месеци во истражниот затвор во Скопје. Тој бил приведен во Охрид, донесен кај истражен судија во Скопје и по шест часа разговор му бил одреден притворот.

Во Струмица, Коцевски и Среќко Ѓурчиновски, поранешен директор на „Тетово табак“ биле осудени за нелегална продажба на уделот на „Македонија табак“ во „Тетово табак“, вреден 918.000 евра. Уделот бил префрлен на „Македонија табак 2000“. Потоа, од таа фирма бил префрлен на гевгелискиот комбинат „Таља Бикова“, а оттаму на сметка на фирмите „Тридент“ и „МТ“ од Штип.                

Завршува ликвидациската постапка на „МТ 2000“и „МТ“ Штип

Имотот на „Македонија табак 2000“ и на МТ доо Штип се враќа на државата и на 581 вработен во овие компании. Уделот на државата во имотот вреден околу 10 милиони евра е 31,9 отсто, а на вработените 62,4 отсто. Дел од управната зграда на Македонија табак веќе е предадена во сопственост на Владата на Република Македонија. На вработените деновиве ќе им бидат исплатени и заостанатите плати и придонеси.

Компанија од Италија веќе е заинтересирана за купување на „МТ 2000“.