Свет
Од списоците избришани 46.000 невработени
![](https://makfax.com.mk/wp-content/uploads/2016/11/84ecf311-70b5-4927-b9ad-012708efc02e-9976.jpeg)
Агенцијата за вработување со чистење на евиденцијата ја намалува невработеноста
Агенцијата за вработување со чистење на евиденцијата ја намалува невработеноста
Владата најавува натамошна ригорозна контрола на невработеноста
МАЈА ТОМИЌ
Агенцијата за вработување секој месец брише по околу 10.000 лица од списоците на невработени. Од април до крајот на јули, по разни основи, од евиденцијата на невработени се тргнати 46.009 лица. Само во текот на јули од листата на невработени Агенцијата избришала 10.437 лица. За три илјади од нив тоа е направено поради засновање работен однос, 5.941 лице се избришани поради нередовно пријавување во Агенцијата, а 1.495 лица се тргнати од списокот “поради други основи”.
Во текот на април од списокот на невработени се избришани вкупно 11.492 лица, во мај таа бројка изнесува 13.159, а во јуни 10.921. Од вкупно избришаните 46.009 лица за четирите месеци, поради вработување се избришани 15.744 .лица, поради нередовно пријавување во Агенцијата 20.220 невработени, а остатокот од лицата се избришани поради други причини.
“Имам магистерска титула и сум избришана од списокот на невработени затоа што не сум се пријавила навреме. Искрено, не знаев дека треба да се пријавувам на секои три месеци. Решението од Агенцијата ми е доставено во август, на база на донесена одлука во јануари. Известена сум дека, според некои законски одредби, повторно можам да се пријавам во Агенцијата како невработена дури по две години. Не ми е јасно каква е таа практика кога, на пример, за нередовно платена сметка за струја или телефон неколку пати те предупредуваат дека ќе те исклучат”, вели П.Б. од Скопје
Поинтензивната тенденција за намалување на бројката на невработените со бришење, всушност, трае од средината на минатата година кога во Агенцијата се заострија критериумите за нередовните пријавувачи, со нивно автоматско бришење од список, без никакво претходно предупредување или известување. Покрај тоа, лани започна и владината кампања за бришење од евиденцијата на невработените кои некаде се ангажирани со договор за дело, чија точна бројка Владата никогаш не ја обелодени, а неофицијално се претпоставува дека станува збор за околу 20.000 лица, претежно млади невработени. За осумте месеци од годинава бројот на невработените се намалил за околу 20 илјади. Додека во јануари тие изнесувале 394.260, заклучно со јули Агенцијата избројала 370.745 невработени. Според неодамнешната изјава на министерот за труд и социјална политика, Стевчо Јакимовски, Владата презема законски мерки за чистење од евиденција на лицата кои се пријавени како невработени, а всушност не бараат работа, со цел да се евидентираат само оние што активно бараат работа. Тоа ќе треба да го докажат со поднесување некаков доказ, како што е, на пример, учеството на конкурсите за работа. Чистењето на евиденцијата е и од причини што најголем број невработени се пријавуваат во Агенцијата само за да користат здравствени картони, за што од Буџетот се одлеваат значителни средства. Повеќе од 60.000 лица во текот на минатите месеци се изјасниле дека се пријавуваат во Агенцијата само заради сини картони.
Министерот Јакимовски деновиве изјави дека реалната бројка на невработени во државава изнесува меѓу 240.000 и 270.000 лица, што е за 100.000 помалку од регистрираните во Агенцијата. Тој објаснува дека државата издвојува годишно по 107 милиони евра за пасивни мерки, односно за плаќање разни бенефиции за невработените, додека само 14,5 милиони евра се за активни мерки, што е недоволно. Активните мерки подразбираат преквалификации и посебни курсеви за вработување иако Владата досега не излезе со податокот колку лица по ваков основа каде се вработиле.
Со засилени инспекциски контроли, според Јакимовски, бројката на невработени и натаму ќе се намалува. Покрај бришењето на тие што не се пријавуваат редовно во Агенцијата, ќе се бришат од списоците на невработените и сите оние кои инспекцијата ќе ги затекне дека работат на црно на одредени проекти или со договор за дело. Од февруари годинава до крајот на јули, според Јакимовски, намален е бројот на невработените по основа на технолошки вишоци за 9 проценти, а на корисниците за здравствено осигурување за 3 проценти.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Европа
Барселона планира да забрани изнајмување станови на туристи
![](https://makfax.com.mk/wp-content/uploads/2021/05/barselona-turisti.jpeg)
Барселона денеска објави дека до 2028 година ќе го забрани издавањето станови на туристи, со што сака да го спречи растот на трошоците за домување и да им овозможи на граѓаните да живеат во свој град.
Левичарскиот градоначалник на градот, Жауме Колбони, рече дека до ноември 2028 година, Барселона ќе ги одземе лиценците на 10.101 станови кои моментално се лиценцирани за краткорочно изнајмување.
„Се справуваме со она што го сметаме за најголем проблем на Барселона“, рече Колбони на настанот на градската влада.
Краткорочниот бум на изнајмување во Барселона, најпосетуваниот град во Шпанија, остави некои граѓани да не можат да си дозволат кирија откако кириите се зголемија за 68 отсто, а цените на недвижниот имот за 38 отсто во изминатите 10 години, рече тој. Пристапот до домување стана двигател на нееднаквоста, особено за младите луѓе, додаде тој.
Во последните десет години, локалните власти воведоа ограничувања за краткорочно изнајмување на Канарските Острови, Лисабон и Берлин.
Социјалистичката министерка за домување на Шпанија, Изабел Родригез, рече дека ја поддржува одлуката.
„Станува збор за правење сè што е потребно за да се гарантира пристап до прифатливи станови“, објави таа на Икс.
Airbnb, платформата за изнајмување станови, не одговори на барањето за коментар.
„Колбони прави грешка што ќе доведе до сиромаштија и невработеност“, соопшти асоцијацијата за изнајмување на туристички станови во Барселона АПАРТУР, додавајќи дека забраната ќе доведе до зголемување на нелегалните изнајмувања на станови.
Одлуката ќе биде од корист за хотелите. Екстремно левичарската партија која владееше со Барселона од 2015 до 2023 година забрани отворање на нови хотели во најпопуларните области во градот, но Колбони навести дека може да ги ублажи ограничувањата.
Од хотелската асоцијација на Барселона не сакаа да ја коментираат веста.
Тие 10.000 станови ќе ги користат граѓаните или ќе завршат на пазарот под кирија или продажба“, рече градоначалникот.
Локалните власти најавија строги инспекции кога забраната ќе стапи на сила.
Во последниве години во Барселона не беше дозволена регистрација на нови туристички апартмани. Од 2016 година локалната власт нареди затворање на 9.700 диви туристички станови и речиси 3.500 станови повторно ги користат граѓаните за домување.
Европа
Русија: Треба да разговараме со САД, глобалната безбедност е загрозена, проблемите растат
![](https://makfax.com.mk/wp-content/uploads/2024/06/putin4-1.jpg)
Русија гледа итна потреба од безбедносни разговори со Соединетите Американски Држави, но тие мора да бидат сеопфатни и да го вклучуваат прашањето за Украина, соопшти денеска Кремљ. „Невозможно е да се извлечат поединечни делови од општиот комплекс на акумулирани проблеми, а ние нема да го сториме тоа“, рече портпаролот на Кремљ, Дмитриј Песков, на прашањето дали Москва е подготвена да разговара со Вашингтон за нуклеарните ризици.
„Отворени сме за дијалог, но за широк, сеопфатен дијалог кој ги опфаќа сите димензии, вклучително и сегашната димензија поврзана со конфликтот околу Украина, поврзана со директното учество на САД во овој конфликт“, рече Песков за новинарите. САД ги отфрлаат руските тврдења дека со вооружувањето на Украина станаа директен учесник во војната чија цел е да и се нанесе „стратешки пораз“ на Москва. Вашингтон вели дека какви било преговори за војната се во јурисдикција на Украина.
Руската позиција, како што ја претстави Песков, не е ништо ново, потсетува Ројтерс. Сепак, тој им рече на новинарите дека списокот на теми за кои Русија и САД треба да разговараат се зголемува. „Сè на сè, овој дијалог е многу неопходен. Неопходен е затоа што проблемите се натрупуваат, а има и многу тешкотии поврзани со глобалната безбедносна архитектура“, рече Песков.
Од перспектива на Вашингтон, рускиот претседател Владимир Путин, кој веќе трета година води војна во Украина, е одговорен за умножувањето на безбедносните проблеми.
Оваа недела Путин ја посети Северна Кореја, единствената земја која тестираше нуклеарно оружје во 21 век, и потпиша договор за заемна одбрана со нејзиниот лидер Ким Џонг Ун и рече дека можеби ќе му испрати руско оружје на Пјонгјанг како одговор на западното вооружување на Украина. .
Путин, исто така, во вторникот повтори дека размислува да ја ревидира руската доктрина за употреба на нуклеарно оружје. Најновиот договор за контрола на вооружувањето, кој го ограничува бројот на стратешки нуклеарни боеви глави што Русија и САД можат да ги распоредат, истекува во 2026 година.
Регион
(Видео) 11 загинати во пожари во Турција, и Грција се бори со огнот
![](https://makfax.com.mk/wp-content/uploads/2024/06/pozar-grcija.jpg)
Најмалку единаесет лица загинаа, а десетици се повредени во пожар со ниска вегетација што ветрот го прошири во неколку села на југоистокот на Турција, одземајќи животи на стотици животни, а со пожарите денеска се бори и Грција. Турскиот министер за здравство Фахретин Коча објави „единаесет смртни случаи и 78 повредени лица“, од кои пет морале да бидат примени на интензивна нега.
Коча претходно рече дека има „44 повредени, од кои десет лица во тешка состојба“, во оваа рурална област лоцирана меѓу градовите Дијарбекир и Мардин, во близина на сириската граница. На социјалните мрежи масовно се споделуваат фотографии од десетици кози, овци и магариња кои лежат во изгорената трева во претежно земјоделскиот и сточарскиот регион.
Според министерот за внатрешни работи Али Јерликаја, пожарот избувнал доцна во четвртокот поради палење на стрништа во област лоцирана на околу триесетина километри јужно од градот Дијарбакир, каде што термометарот преку ден се искачува над 40 степени. Пламените јазици се проширија со ветрот и брзо зафатија пет села.
Пожарот е ставен под контрола во текот на ноќта, но службите и денеска се на терен поради страв од повторно разгорување на пожарот, вели министерот.
И Грција во петокот се бори со неколку шумски пожари во јужниот дел на нејзиното копно, поттикнати од бурните ветрови. Десетици пожарникари со помош на осум авиони беа распоредени во регионите Ахаја и Илија и во близина на градот Краниди на полуостровот Пелопонез. На жителите на неколку села во овие области им било кажано да ги напуштат своите домови.
Шумските пожари се вообичаени во оваа медитеранска земја, но стануваат поразорни бидејќи летата стануваат потопли и суви, што научниците го поврзуваат со климатските промени.
„Брзината на ветерот често надминува 95 километри на час, што го спречува леталото да се приближи“, рече портпаролот на грчката противпожарна бригада Василис Ватракоганис на брифинг со новинарите.
„Сите сили за цивилна заштита денеска се во подготвеност“, додаде тој, бидејќи за неколку часа во земјата избувнаа околу 45 шумски пожари. Уште еден шумски пожар што накратко им се закануваше на домовите во крајбрежен град во близина на Атина беше ставен под контрола рано денеска, соопштија пожарникарите.