Девојка го пријавила српскиот водител и актер Милан Калиниќ за физичко насилство. Според достапните информации, полицијата на 29 декември околу полноќ добила пријава, а девојката изјавила дека актерот ја нападнал по кратка расправија.

Како што пишуваат српските медиуми, девојката тврди дека Калиниќ ја удрил со тупаница во главата. По пристигнувањето во станот во кој се случил инцидентот, полицијата утврдила дека актерот веќе го напуштил местото на настанот.

Според информациите објавени во медиумите, девојката била удрена додека седела на стол, удирајќи ја во десната слепоочница, при што добила модринка под окото. Во полиција изјавила дека сама ќе побара лекарска помош.

Јавниот обвинител на обвинителството во Белград бил информиран за инцидентот и наредил собирање на потребни докази и итна проценка на ризикот согласно Законот за спречување на семејно насилство. Со проценката е утврдено дека постои непосредна опасност од семејно насилство, поради што на актерот му е изречена итна забрана за контакт и приближување кон жртвата.

На медиумите им се обрати Милан Калиниќ кој изјави дека не знае за што се работи.

„Ја знам девојката, ги видов иницијалите, но не ги разбирам овие наводи. Никого не сум допрел ни со прст. Се е во ред, не знам за што се работи. Можно е ова да е поврзано со моите неодамнешни објави на социјалните мрежи, но не знам што друго би можело да биде во прашање“, рече тој.

Иран го потврди апсењето на италијанската новинарка Сесилија Сала, објави државната новинска агенција ИРНА, повикувајќи се на иранското Министерство за култура, пренесува Си-Ен-Ен. Италијанското Министерство за надворешни работи минатиот петок соопшти дека Сала е уапсена во Техеран.

ИРНА во понеделникот објави дека Сала била приведена на 19. декември поради кршење на законите на Исламската Република Иран.

„Нејзиниот случај во моментов е под истрага. Апсењето е извршено во согласност со релевантните прописи, а италијанската амбасада во Техеран е информирана“, се вели во соопштението на ИРНА.

Новинарката во затворот ја посетила италијанската амбасадорка Паола Амадеи за да ги провери условите и околностите на нејзиниот притвор, се наведува во соопштението и се додава дека Сала претходно имала право на два телефонски јавувања со членовите на семејството.

„Се уште не знаеме за што е обвинета“, изјави завчера пред новинарите италијанскиот министер за надворешни работи Антонио Тајани.

Министерот исто така додаде дека на Сала не и било дозволено да ја посети адвокат во затворот до пред два дена.

Сала е новинарка на италијанскиот дневен весник „Ил Фољо“, кој пишува дека е задржана во затворот Евин во Техеран. Сесилија била во Иран со редовна виза за да известува за земјата што ја познава и сака, истакнувајќи ги проблемите како што се сузбивањето на слободата на говорот и заканите за новинарите.

„Новинарството не е криминал. Да ја вратиме Сесилија Сала дома“, напиша главниот уредник на „Ил Фољо“, Клаудио Цераса.

Кина го претстави ажурираниот модел на брз воз, за ​​кој производителот тврди дека постигнува брзина од 450 километри на час за време на тестовите, што го прави најбрзиот воз во светот. Според извештајот на China State Railway Group, новиот модел, познат како прототип CR450, дополнително ќе го скрати времето на патување и ќе ја подобри поврзаноста, правејќи го патувањето поудобно и поефикасно за огромниот број патници во земјата.

Според China Daily, прототипот CR450 постигнал тест брзина од 450 километри на час, со клучни индикатори за перформанси – работна брзина, потрошувачка на енергија, внатрешна бучава и растојание на сопирање – поставувајќи нов меѓународен стандард, објавија кинеските официјални медиуми.

Овој модел е значително побрз од брзиот воз CR400 Fuxing, кој моментално е во употреба и се движи со брзина до 350 километри на час, според извештајот на државната новинска агенција Ксинхуа.

Кинеската железница објави серија тестирања на прототипови на патеката и оптимизација на техничките индикатори за да се осигура дека CR450 ќе влезе во комерцијална употреба што е можно поскоро.

Според последните официјални податоци, оперативните линии за бри воз во Кина достигнаа околу 47.000 километри, поврзувајќи ги големите градови низ целата земја.

Иако не е профитабилна, Кина тврди дека проширувањето на брзата железничка мрежа одигра клучна улога во економскиот и социјалниот развој на земјата, намалувајќи го времето на патување и поттикнувајќи го индустрискиот развој по железничките линии.

Според интерните истражувања, железничкиот сообраќај меѓу Пекинг и Шангај бил најпрофитабилен, додека сообраќајот во другите градови сè уште не станал профитабилен.