Сé поголемата нееднаквост во Германија ѝ се заканува на општествената кохезија

Сé подлабокиот јаз меѓу богатите и сиромашните во Германија би можело да ја загрози кохезијата на општеството во најголемата европска економија и најнаселената европска држава, се заклучува во најновиот извештај на германската влада.

„Доколку преовладува впечатокот дека разликата меѓу сиромашните и богатите во општеството е преголема и дека богатството главно не е резултат на работа, прифаќањето на економскиот и општествениот поредок може да слабее“, покажува истражувањето на германското министерство за труд објавено во четвртокот.

Авторите на истражувањето предупредуваат дека „на луѓето им е многу важно и тие и нивните деца да имаат можност да го подобрат својот социјален статус или барем да спречат тој да се влоши“.

„Доколку тоа биде доведено во прашање, би можело да дојде немири во сите слоеви на општеството“, се предупредува во споменатиот извештај.

Во Германија најбогатите 10 отсто од домаќинствата поседуваат повеќе од половината од вкупното богатство во земјата, додека најсиромашните 50 отсто имаат само околу 1,0 отсто, изјави во четвртокот за новинарите министерката за труд Андра Нахлес.

Две третини од богатствата во земјата потекнуваат од наследство или подарувања.

Истражувањето покажува и дека е битно намалена можноста децата да добијат подобро платени работни места отколку нивните родители. За половина помали се и шансите дека генерациите родени во 1970-те и 1980-те години чиишто родители се послабо образовани или имаат ниски работни квалификации ќе имаат подобар животен стандард отколку нивните родители, отколку што тоа бил случајот со генерацијата од 1960-те, покажало истражувањето.

Распределбата на богатствата и ризикот од сиромаштија во Германија позначајно не се менувале „и покрај добрата економска ситуација и вкупното зголемување на вработеноста“, се додава во извештајот./крај/мф/сн