Европа
Убиецот на поранешниот руски пратеник во Киев им подлегнал на повредите

Убиецот кој во центарот на украинската престолнина Киев во четвртокот претпладнето го застрела поранешниот руски пратеник Денис Вороненков, им подлегнал на повредите, соопшти директорот на болницата во која бил хоспитализиран, пренесе украинската телевизија.
Според последните податоци од истрагата, убиецот пукал четири пати во поранешниот руски пратеник Денис Вороненков пред главниот влез на хотелот „Премиер палас“ во центарот на Киев, кој откако во Русија беше осомничен за финансиски малверзации на почетокот од 2010-те години, кон крајот на минатата 2016 година пребегна со сопругата во Украина.
Тој добил украинско државјанство, но не се откажал од руското, објавија надлежните институции во Москва. Вороненков сведочеше на суд во процесот против поранешниот украински претседател Виктор Јанукович, кој беше соборен по безредијата на киевски Мајдан од прозападната опозиција во февруари 2014 година.
Телохранителот на Вороненков, исто така, бил ранет во нападот, но успеал да пука во напаѓачот, кој потоа беше пренесен на одделот за интензивна нега во една од киевските болници. Претходно некои медиуми објавија дека тој е надвор од животна опасност.
За телевизијата NewsOne, началникот на болницата Николај Демин изјави дека според процените на лекарите, убиецот бил застрелан „веројатно со четири куршуми“. Според непотврдените информации тој бил ранет во градите и во главата.
Идентитетот на убиецот досега не е утврден, но полицијата објави дека кај него биле најдени лични исправи на државјанин на Украина. Истрагата за ова убиство засега се води како нарачана ликвидација.
Според електронското издание Обозревател, наводниот убиец бил роден 1988 година, бил баран од властите по обвиненија за фиктивни бизниси и перење пари од криминални активности.
На Вороненков, инаку, во декември 2014 година му бил одземен пратеничкиот имунитет во врска со дело за бесправно заземање на објект во центарот на руската престолнина Москва. Во декември 2016 година емигрирал во Украина, а во февруари оваа година официјално е подигнато обвинение против него за измама и издадена е меѓународна потерница по него.
Украинскиот претседател Петро Порошенко претходно изјави дека станува збор за „терористички чин“, како и дека не било случајно тоа што убиството се случило истиот ден кога се случи и експлозија и пожар во складиште за оружје на истокот од Украина.
Реакцијата на Порошенко на убиството на Вороненков е апсолутно без преседан и апсурдна“, смета заменикот претседател на комисијата за одбрана и безбедност на рускиот парламент, Франц Клинцевич. Според него, „на такво ниво со вакви обвинувања не треба да се избрзува… А обидот да се поврзе убиството на Вороненков со пожарот во складиште е врв на апсурдноста“./крај/мф/сн

(© REUTERS/ Valentyn Ogirenko)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
(Фото+видео) Опасна бура во Словенија: паѓаше град со големина на јајце, издадено портокалово предупредување

Словенија е погодена од силни бури придружени со силни налети на ветер, поројни дождови и град.
Сообраќајот во земјата е забавен, а Агенцијата за заштита на животната средина издаде портокалово предупредување за целата територија.
Од агенцијата посочуваат дека поради дождот може да дојде до задржување на вода и зголемување на реките.
На објавите на социјалните мрежи се гледа дека паѓал град со големина на јајце.
Според објавите и коментарите, најлошото било околу Шемпетер во долината Савиња.
Како што јавува ТВ Словенија, во текот на вечерта бурата постепено ќе ослабне , најдоцна на истокот од земјата.
Бура пристигнува и во Хрватска
Силна бурна ќелија, која пристигна преку брегот од Италија, се движи кон внатрешноста на Хрватска, придружена со врнежи од дожд, силни налети на ветер и локален град.
Водна пијавица е снимена над морето во близина на Умаг. Се очекува активноста на бурата дополнително да се интензивира во наредните часови.
Управата за заштита на животната средина издаде портокалова тревога за регионите Риека, Карловац и Загреб поради локално можни грмотевици со привремено силни до бурони ветрови, а можна е и појава на град.
Европа
Колона долга околу 700 километри забележана на автопат во Франција

Колона долга речиси 700 километри е забележана денеска на автопат во Франција, додека вкупната должина на сите колони на патиштата во земјата изнесуваше 1.051,6 километри во време на зголемен сообраќаен интензитет поради летните одмори и смената на туристи, што колоквијално се нарекува „Црна сабота“.
Како што извести BFM TV, сообраќајот на патиштата во Франција дополнително бил забавен поради две сообраќајни несреќи на автопатот кон Медитеранот и Атлантскиот Океан.
Според податоците на Bizon Futé, француската агенција за следење на состојбата на патиштата, до 7 часот утрово колоните биле подолги од 200 километри, а до 10 часот веќе надминале 570 километри.
Како што беше соопштено, гужвите се во согласност со прогнозите на агенцијата, која предупреди на „исклучително тешки сообраќајни услови“ за оваа сабота, а врвот на метежот се очекува околу пладне.
Сообраќајот во правец кон Алпите исто така е интензивен и загушен, со задржувања од час и 45 минути во тунелот Мон Блан во правец кон Италија
Европа
Финска, Норвешка и Шведска под жештина невидена од 1961 година

Земјите од Северна Европа, познати по својата студена клима, се соочуваат со интензивни топлотни бранови, со температури над 30 степени Целзиусови во подолг временски период.
Во норвешкиот дел од Арктичкиот круг, метеоролошките станици регистрирале температури над 30 степени Целзиусови дури 13 дена во јули, додека Финска имала три последователни недели со температури од 30 степени, пишува денес британскиот „Гардијан“.
Според научниците, тоа е најдолгиот период според историските податоци од 1961 година, а трае 50 проценти подолго од претходниот рекорд.
„Топлотниот бран е сè уште во полн ек, со максимални температури денес околу 32-33 степени. Дури и арктичките региони забележаа три недели со температури над 25 степени и може да ги соборат своите августовски температурни рекорди утре“, изјави Мика Рантанен, климатолог во Финскиот метеоролошки институт, во објава на социјалните мрежи.
Норвешкиот метеоролошки институт соопшти дека температури над 30 степени се регистрирани 12 дена во јули во најмалку една станица во трите најсеверни покраини на Норвешка.
Во Шведска, метеоролозите, исто така, регистрираа продолжени топлотни бранови во неколку северни градови, при што метеоролошката станица во Хапаранда регистрираше температури од 25 степени или повеќе 14 дена по ред.
Овие топлотни бранови, кои ја погодија северна Европа кон средината на јули, беа предизвикани од топлите води покрај северниот брег на Норвешка, кои ги покачија температурите во нордиските земји за осум до 10 степени над сезонските норми.
Поради интензивен топлотен бран, лизгалиште на мраз во северна Финска ги отвори вратите за луѓе кои бараат засолниште од жештината, откако локалните болници беа преполни, а сточарите предупредија дека нивните ирваси се на работ на смртта од жештината.