Европа
Баросо го предупреди Путин да не презема интервенција во Украина, кој ќе испрати хуманитарна помош
Рускиот претседател Владимир Путин во понеделникот во телефонски разговор со претседателот на Европската комисија Жозе Мануел Баросо го информирал дека Русија во соработка со Меѓународниот комитет на Црвениот крст во источна Украина ќе испрати хуманитарна помош, додека челникот на ЕК го предупредил Путин да не покренува воена интервенција во Украина, соопштија Москва и Брисел.
Како што соопшти службата за односи со јавноста на Кремљ, рускиот претседател Владимир Путин во телефонскиот разговор со претседателот на Европската комисија, Жозе Мануел Баросо, покрај договорот „за продолжување на контактите меѓу двете страни економските, трговските и енергетските прашања и за билатералните односи“, дал процена и за причините за избувнувањето на кризата во Уркаина.
„Вниманието беше акцентирано на катастрофалните последици од воената операција во југоисточните региони што ја спроведуваат властите во Киев и неопходноста од итно доставување на хуманитарна помош во зоната на конфликтот. Беше истакната дека руската страна во соработка со Меѓународниот комитет на Црвениот крст ќе испрати хуманитарен конвој во Украина“, се истакнува во соопштението на Кремљ.
Претходно во понеделникот шефот на руската дипломатија, Сергеј Лавров, изјави дека поединостите за хуманитарната операција се координираат со челниците на Украина и таа ќе биде изведена под покровителство на Црвениот крст.
„Претседателот (на ЕК) Баросо предупреди да не се прибегнува кон каква и да е еднострана воена интервенција во Украина, под каков и да е изговор, а тоа се однесува и на хуманитарна акција“, се вели во соопштението на Европската комисија.
Се додава дека Баросо во понеделникот телефонски разговарал и со украинскиот претседател Петро Порошенко, како и дека во двата одвоени разговора челникот на ЕК во заминување ја изразил загриженоста на Европската унија во поглед на хуманитарните последици во источна Украина и повикал на почитување на меѓународниот хуманитарен закон. Потсетил и дека ЕК во текот на денот е донесе итан одлука за дополнителна хуманитарна помош на населението, што ќе биде придонес кон меѓународниот хуманитарен план кој се реализира под покровителството на Обединетите нации.
Истовремено портпаролот на воената операција на украинските сили во југоисточните региони Андриј Лисенко во Киев извести дека на границата со Украина биле стационирани 45 илјади руски војници. Тврди дека се вооружени со тешко оружје, како тенкови, ракетни системи, воени авиони и борбени хеликоптери. Лисенко наведе и дека располага со конкретни податоци, односно оти станува збор за 160 тенкови, 1.360 оклопни возила, 390 артилериски системи, речиси 150 ракетни лансери од типот „Град“, 192 воени авиони и 137 борбени хеликоптери.
НАТО во понеделникот повтори дека постои „голема можност“ Русија да покрене инвазија врз Украина, откако украинската влада објави дека украинската армија му се приближува на Донецк, најголемиот град кој е под контрола на бунтовниците. Од друга страна донецките бунтовници соопштија дека се подготвуваат да тргнат во масивен напад врз артилериските единици на украинската армија која со седмици наназад го гранатира градот./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Украина: Русите го нападнаа Харков, уништени се згради, меѓу повредените има и дете
Украина ги уништи сите 10 беспилотни летала во руски напад во текот на ноќта, но две лица се повредени, а станбени згради во регионот Харков беа зафатени од пожар, соопштија денеска украинските власти.
Воздухопловните сили на „Телеграм“ соопштија дека Русија лансирала и две противвоздушни наведувани ракети. Портпаролот на украинските воздухопловни сили во телевизиски пренос изјави дека руските ракети, најверојатно, биле насочени кон североисточниот град Харков.
Гувернерот на регионот Харков, Олех Синехубов, рече дека три станбени куќи биле запалени, а десетици биле оштетени како резултат на рускиот напад, чија цел, според него, биле и инфраструктурата и станбените области. На фотографиите што ги објави Синехубов на „Телеграм“ се гледаат големи пламени јазици од станбените згради.
„Две лица, меѓу кои и едно 11-годишно дете, се ранети во нападот и се на медицинска помош“, рече Синехубов на апликацијата „Телеграм“.
„Ројтерс“ сè уште не ја потврди независно оваа вест. Москва негира дека цели на цивили во овие „легитимни напади врз воената, енергетската и транспортната инфраструктура на Украина“.
Европа
Повредени двајца полицајци во Париз кога маж им го украл пиштолот и пукал во нив
Двајца полицајци се повредени во престрелка во полициската станица во Париз, кога на еден од нив му бил одземен пиштолот од маж кој претходно бил приведен поради напад со нож врз жена.
„Полицијата интервенираше и го донесе овде, во полициската станица, и тој потоа му го грабна пиштолот на полицаецот“, изјави началникот на полицијата Лорен Нунес.
Обвинителството соопшти дека еден од полицајците е во тешка состојба, пренесува „Монд“.
Полицијата возвратила, а напаѓачот се здобил со повреди во пределот на градниот кош, по што бил пренесен во болница.
Како што информираат од болницата, животот на напаѓачот не е во опасност.
Европа
Путин го избра премиерот
Рускиот претседател Владимир Путин предложи повторно именување на Михаил Мишустин за премиер во неговиот нов претседателски мандат, изјави утрово претседателот на Државната дума, долниот дом на рускиот парламент.
Откако Путин во вторникот положи заклетва за нов шестгодишен претседателски мандат, тамошната влада, според одредбите на рускиот Устав, поднесе оставка.
И додека во последните денови се шпекулираше дека може да има промени на некои важни и суштински позиции, а руските независни медиуми споменуваа евентуално заминување на Михаил Мишустин од премиерската позиција, Путин повторно го предложи за таа функција.
„Претседателот Владимир Владимирович Путин достави до Државната дума предлог за кандидатурата на Михаил Владимирович Мишустин за функцијата премиер. Денеска претставниците ќе донесат одговорна одлука за ова прашање во име на нивните гласачи“, изјави претседателот на Думата, Вјачеслав Володин на апликацијата Телеграм.
Ова е петти мандат на Путин на власт, а тој го номинираше Мишустин за премиер за прв пат во јануари 2020 година, кога Владата предводена од Дмитриј Медведев поднесе оставка по најавените важни уставни промени во политичкиот систем на земјата од страна на претседателот.
Мишустин, кој ќе зборува во Думата пред гласањето, мора да одговори како ќе реши низа задачи што Путин и ги постави на владата, вклучително и „зголемување на одбранбената способност на нашата земја“, рече Володин.