Крим се отцепи од Украина со нарушување на територијалниот интегритет на земјата и признавањето на тоа од меѓународната заедница ќе создаде опасен преседан за цела Европа, изјави во саботата германската канцеларка Ангела Меркел на заедничката прес-конференција со украинскиот претседател Петро Порошенко за време на нејзината посета на Киев, и порача дека интересот на Германија е да се сочува територијалната целокупност на Украина.

„Сето тоа (отцепувањето на Крим) се случи со кршење на територијалниот интегритет во Европа, и доколку таквиот принцип го признаеме, тогаш кај нас во цела Европа може да се случува, и тогаш не станува збор само за Крим и за Украина, туку потоа секоја европска земја може да се соочи со оспорувања од други земји на одредени области, што ќе го наруши мирниот соживот во Европа“, истакна на прес-конференцијата германската канцеларка Ангела Меркел одговарајќи на прашањето да ги коментира изјавите на германскиот вицеканцелар Зигмар Габриел дека е за федерализација на Украина.Имено во интервјуто за весникот Welt am Sonntag објавено токму на денот кога канцеларката Меркел престојува во официјална посета на Украина, нејзиниот заменик Зигмар Габриел, покрај тоа што рече дека е приоритет да се спречи директен воен судир меѓу Украина и Русија, се зазема за воведување федерален систем во Украина, по завршувањето на вооружениот конфликт во источните региони на земјата.„… Мораме да ја развиеме идејата за процесот на помирување кој би можел да биде покренат по завршувањето на воениот суди во источна Украина. Територијалната целост на Украина може да биде сочувана само доколку нешто им се понуди на регионот со руско мнозинство. Разумен концепт на федерализација изгледа како единствениот начин“, вели во интервјуто германскиот вицеканцелар. Габриел така стана првиот висок германски политичар кој ја понуди федерализацијата на Украина како можно решение на кризата. Меркел во продолжение на одговорот во Киев додаде дека имајќи ги предвид таквите околности, многу е важно признавањето од страна на меѓународната заедница на границите воспоставени по Втората светска војна.Црноморскиот полуостров Крим, кој отсекогаш бил седиште на руската воена Црноморска флота, на кој живее мнозинско етнички руско население (58 отсто, покрај 16 отсто Украинци и 12 отсто кримски Татари), откако со февруарските протести во Киев беше соборен претседателот Виктор Јанукович, на 16-ти февруари со референдум и огромно мнозинство изгласа враќање на автономијата укината во 1990 година со осамостојувањето на Украина и присоединување на Руската Федерација, што западот го смета за руска анексија на украинска територија. Од околу два милиона житела на Крим, според Москва досега само 3.427 лица се изјасниле дека се откажуваат од руското државјанство. Крим, инаку, во составот на Руската Советска Федеративна Република се наоѓал до 19-ти февруари 1954 година, кога Президиумот на Врховниот совет (владата) на поранешниот СССР, издал указ со кој го пренесува во составот на Украинската Советска Република, во периодот на советскиот челник Никита Хрушче(о)в за кој е нејасно дали имал украински корени покрај тоа што политичката кариера ја градел во Украина. На прес-конференцијата со Порошенко, германската канцеларка истакна и дека територијалниот интегритет на Украина и просперитетот на земјата е важна политичка цел на политиките на Германија.„Мојата посета означува дека сојузната влада (на Германија) и јас лично сакаме да демонстрираме дека територијалната целост на Украина и нејзиниот развој е важната цел на нашата политика“, изјави Меркел на заедничката прес-конференција со украинскиот претседател.Меркел потсети и на 75-годишнината од пактот Рибентроп – Молотов, односно договорот за интересните сфери меѓу  нацистичка Германија на Адолф Хитлер и комунистичкиот Советски сојуз на Јосиф Висарионович Џугашвили Сталин. „Моето присуство тука покажува дека работите се променети и дека двете земји можат да ги менуваат политичките односно, и оти Германија не сака да причинува никаква нова политичка штета, таа многу добро ја проучи својата историја“, истакна канцеларката.Меркел, исто така, посочи дека Германија го поддржува планот на претседателот Порошенко за децентрализација на власта во Украина, повторно обидувајќи се да ја појасни изјавата на вицеканцеларот Зајберт за федерализација. „Тоа што ние го подразбираме под федерализација, во Украина го нарекуваат децентрализација. И тоа е она што го сака претседателот. Тоа претставува важен чекор со цел рускојазичното население да почувствува дека и’ припаѓа на Украина. И јас сметам дека тој процес нужно мора да продолжи“, додаде појаснувајќи дека во Украина тоа се поврзува со поголем степен на независност „што во никој случај не го сакаме“. Во почетокот од бунтот на проруските региони каде над 78 отсто од населението се изјаснува дека рускиот му е мајчин јазик, кој започна откако прозападните власти во Киев го укинаа законот за јазиците со кој рускиот јазик го загуби статусот на официјален, во почетокот бараа федерализација и поголема автономија на регионите каде што се мнозинство. Потоа тие одржаа референдум при што прогласија таканаречен Народни Републики во Донец и Лугaнаск, кои се поврзаа во „државна заедница“ Новорусија.Меркел истакна и дека Германија заедно со украинските власти ќе сторат сé што е возможно за да најдат дипломатско решение на конфликтот на истокот од земјата. Според неа, тоа во носењето на тоа решение мора да учествуваат сите засегнати страни и да стане основа за зачувување на територијалниот интегритет на Украина.Покрај тоа, германската канцеларка порача дека кризата во Украина може да се реши доколку биде подобрена контролата на украинско-руската граница преку којашто како што тврди Западот а Москва упорно демантира, Русија испраќа оружје на проруските бунтовници. „За успех се потребни двете страни. Не можете да постигнете мир самите. Се надевам дека разговорите со Русија ќе бидат успешни. Плановите се на масата (…) сега треба да следат делата“, истакна Меркел асоцирајќи на скорешната средба на украинскиот претседател Петро Порошенко и рускиот претседател Владимир Путин на регионалниот самите во Минск.Меркел порача дека мора да се договори прекин на огнот, и како главна пречка за тоа ја гледа слабата контрола на границата долга речиси две илјади километри. Таа предложи Киев и Москва да се договорат границата да ја набљудува ОБСЕ, на што нејзиниот украински домаќин дополни дека „има простор за договор, но не по цена на суверенитетот, интегритетот и независноста на Украина“./крај/мф/сн

Извор: Макфакс