Европа
САД испраќаат воена опрема на Балтик
САД испратија повеќе од сто парчиња тешка воена опрема, особено тенкови и други борбени возила во поранешните три советски републики на Балтикот со објаснување дека ги зајакнуваат своите одбранбени капацитети и да ја одвратат Русија од евентуални закани, изјави во понеделникот во Рига американскиот генерал Џон О’Конор.
„Целта на испораката на оружје во Рига е да им се покаже нашата решителност на рускиот претседател Владимир Путин и на Русија дека можеме да ги обединиме силите“, изјави американскиот генерал Џон О’Конор кој е задолжен за транспортот на опремата.
Тенковите „Абрамс“, борбените возила „Бредли“ и возилата „Скот Хамви“ ќе останат во Естонија, Латвија и Литванија „колку што ќе биде потребно да ја одвратиме Русија од напад“, истакна О’Конор.
По присоединувањето на црноморскиот полуостров Крим на Русија во февруари 2014 година, што Западот го смета за нелегална руска анексија на украинска територија и почетокот на судирот во источна Украина во април истата година за што ја обвинува Москва, САД најавија дека на териториите на балтичките земји и Полска трајно ќе распоредат зголемен број американски војници.
Засилената активност на НАТО е забележлива и на 190 километри од руската граница со Норвешка, исто така членка на Алијансата, каде што во комбинираните десетдневни воени вежби под името „Joint Viking“ ќе бидат ангажирани околу пет илјади војници повеќе од 400 единици воена опрема.
Норвешкиот министер за одбрана Ине Ериксен Серејде и началникот на Генералштабот претходно неколкупати изјавија дека не сметаат оти постои руска закана за Норвешка, но потенцираа дека земјата мора да работи на зголемување на својата одбранбена способност „во врска со коренитите промени во европската ситуација во сферата на безбедноста,
На почетокот од февруари Норвешка најави дека на нејзина територија во 2018 година ќе се одвива масивна воена вежба на НАТО во којашто е планирано да учествуваат до 25.000 војници.
Во понеделникот, исто така, започнаа и заедничките поморски маневри на НАТО, во чиј состав се бродови на САД, Италија, Канада, Германија и Турција, со Бугарија и Романија, исто така членки на Алијансата, во водите на Црното Море. Како што во неделата објави американскиот контраадмирал Бред Вилјамсон, вежбите на бугарското крајбрежје се дел од регуларните ротациони вежби и имаат цел да се увежба маневрирање на блиски растојанија и со учество на хеликоптерски екипажи. Нагласи дека според меѓународните конвенции бродовите на НАТО во овие води не можат да се задржат подолго од 21 ден.
Минатите денови беше објавено дека САД планираат да испратат во Украина во периодот од март до октомври најмалку 300 војници во рамките на проектите за соработка со украинската армија. Американскиот воен персонал ќе биде сместен во Меѓународниот центар за поддршка на мирот и безбедноста (International Peacekeeping and Security Center — IPSC) на Јаворовскиот полигон во Л“вовската област во рамките на заедничките воени вежби. Според соопштението на Киев, „предвидено е овие активности да траат од 5-ти март до 31-ви октомври 2015 година, само околу осум месеци“./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
16-годишно момче избодено во училиште во Германија
16-годишно момче е тешко повредено кога утрово околу 8 часот било избодено од тинејџер (17) во училиште во Нојкирхен-Влуин.
На нападот наводно му претходела вербална расправија.
Постариот ученик наеднаш извадил нож и го ранил 16-годишникот во горниот дел од телото.
Момчето итно било пренесено во болница, а лекарите велат дека неговата состојба е стабилна.
По прободувањето напаѓачот побегнал од училиштето, но полицијата брзо го лоцирала и го уапсила.
Според инспекторот, немало опасност по безбедноста на другите деца во училиштето.
Европа
Во Англија извикал „Алах Акбар“ и убил случаен минувач: „Го направив тоа за луѓето од Газа“
45-годишниот Ахмед Алид вчера беше прогласен за виновен за убиство и обид за убиство. На 15 октомври минатата година, барател на азил од Мароко со нож го уби 70-годишниот Теренс Карни во центарот на англискиот град Хартлпул. Тој претходно го избодел со нож својот заспан цимер Џавед Нури додека викал „Алах Акбар“.
Алид и рекол на полицијата дека сето тоа го направил „за луѓето од Газа“. Само осум дена пред да убие случаен минувач и да го рани својот цимер, милитантите на Хамас го нападнаа Израел. Алид се заколнал дека ќе убиел повеќе луѓе доколку имал митралез и друго оружје, изјави обвинителот Џонатан Сендифорд во Судот во Тесајд.
Алид делел куќа со други баратели на азил во североисточна Англија. Тој бил вознемирен што Нури го прифатил христијанството. Цимерите рекле дека Алид почнал да носи нож откако на телевизија видел прилог за настаните во Газа.
Европа
Крим главна цел: Пентагон откри за што Украина ќе ги користи моќните ракети АТАКМС
Министерството за одбрана на САД ја појасни целта за испорака на ракети со долг дострел во Украина, кои неодамна беа испорачани во тајност. Како што објави „Њујорк тајмс“, целта на испораката на американските ракети АТАКМС е да се зголеми притисокот врз Крим, кој беше анектиран од Русија по референдумот во 2014 година.
Крим го претставува центарот во кој се лоцирани голем број руски воздушни и копнени сили и кој досега, како што пишува американскиот дневен весник, „за нив бил релативно безбедно засолниште“. Ова го тврди анонимен американски функционер. Сепак, Пентагон одби да каже колку точно од овие проектили со дострел од 300 километри се испорачани на украинската страна.
Советникот за национална безбедност на Белата куќа, Џејк Саливан, претходно ја потврди испораката на овие ракети без да прецизира дали тие се модифицирани и имаат зголемен дострел.
Украинските сили веќе употребија АТАКМС, што претседателот Володимир Зеленски го потврди на 17 април, објавувајќи дека бил извршен напад врз воздухопловната база Џанкој, која се наоѓа на 165 километри од линијата на фронтот. Министерството за одбрана на Руската Федерација не ги коментираше овие наводи.
Pentagon reveals Ukraine’s targets for ATACMS missiles – NYT — (the usual baffling lack of retaliation threats from #Putin– instead just the usual bleating that ‘it’s impossible to justify’..Bring Stalin back to life please, Russia) https://t.co/8pi0Lx8tbt #CapeTown #SouthAfrica pic.twitter.com/ZtI5cG3r2m
— Peter Mayson (@theforeverman) April 26, 2024
Американскиот дневен весник потсетува дека Украина првпат добила ракети АТАКМС во септември минатата година, но дека станува збор за верзија со половина дострел. Се шпекулираше дека Украина можеби користела американски ракети за да го урне кримскиот мост, што на почетокот на месецов го потврди и самиот претседател Зеленски, велејќи дека неговата влада „навистина сака да го уништи мостот на Крим“.
Тој е симбол на руската окупација и преку овој мост Русија испорачува воена опрема и ги снабдува војниците во Украина. Во неколку наврати досега мостот беше цел на украински напади.
– Мислам дека е вистинското време, а шефот (Бајден) донесе одлука дека е вистинско време да и го обезбеди на Украина оружјето неопходно за тековната борба. Тоа е добро осмислена и многу конструктивна одлука – изјави адмирал Кристофер Грејди, заменик командант на Здружениот генералштаб на американската армија.
Руската страна го осуди потегот на САД, а рускиот амбасадор во Вашингтон Анатолиј Антонов рече дека тоа „ја зголемува заканата за безбедноста на Крим, вклучително и Севастопол и другите руски градови“.