Францускиот премиер Мануел Валс, кој во понеделникот поднесе оставка на својата владата, појасни дека тоа го сторил поради тоа што министерот за економија Арно Монтебур „ја минал црвената линија“ кога ги нападнал владините мерки за кои тврди дека го задушуваат економскиот раст.

Премиерот Мануел Валс поднесе оставка на социјалистичката влада на претседателот Франсоа Оланд кој од него, пак, побара веднаш да состави нов кабинет. Новата влада би можела да биде формирана веќе во вторник, согласно „насоките на земјата коишто ги одреди“ претседателот, се вели во соопштението на Елисејската палата.Оставката на владата уследи ден откако министерот за економија Арно Монтебур остро ги критикуваше економските политики на владата на Франција. Монтебур, исто така, во неделата во интервју за францускиот весник Le Monde остро ја критикуваше економската политика на Европската унија, која според него е форсирана од Германија, истакнувајќи дека Париз повеќе нема намера да ја следи Притоа министерот ја критикуваше и пасивноста на Германија во давањето поддршка на Европската централна банка (ЕCB) во определување на монетарно-кредитната политикана еврозоната, а исто така истакнува и дека германските политичари ги затвораат очите пред основните проблеми на Европската унија.Економските мерки, коишто ги предлага Германија, претпоставуваат намалување на буџетските расходи поради кризата во еврозоната. Некои земји од Европската унија, особено Франција и Италија, сметаат дека ваквата буџетска политика е многу остра и се залагаат за зголемување на државните трошоци.Критиката на францускиот министер за економија, во француската јавност се толкуваа како најверојатна последица на германското пренебрегнување на барањата на францускиот претседател Франсоа Оланд за промена на економските политика на ЕУ со цел да се стимулира растот.Монтебур истовремено во неделата на состанок на француските социјалисти во источна Франција изјави дека е неопходно да се покрене „праведен и здрав отпор на опсесиите на германските конзервативци“, откако претходно во Le Monde изјави дека „Германија се најде во стапицата на политиката на штедење која и’ ја наметна на цела Европа“, како и дека француската влада е „германски опседната“ со буџетската дисциплина.Монтебур подоцна во понеделникот изјави дека не жали за ваквите свои изјави, тврдејќи дека тие не претставуваат уривање на нечиј авторитет, туку „расправа за економската насока на земјата“. Мануел Валс стана француски премиер во март годинава по многу лошиот резултат на социјалистите на локалните избори. Француската економија последните месеци стагнира, а претседателот Франсоа Оланд најави, што во август го потврди и неговата влада, дека до крајот на 2014 година нејзиниот раст нема да достигне ниту 1 отсто, како што претходно беше најавено./крај/мф/сн

Извор: Макфакс