Потпретседателот на Соединетите Американски Држави, Џеј Ди Венс, ги критикуваше европските земји, велејќи дека тие „апсолутно тргнале по патот на цивилизациско самоубиство“.

Во интервју за „Newsmax“, Венс објасни дека критиките кон администрацијата на американскиот претседател Доналд Трамп кон Европа произлегуваат од желбата за зајакнување на европскиот континент политички, економски и воено.

„Ние споделуваме заедничко цивилизациско наследство. Не можете да ја турнете вашата економија од карпа. Зошто ни е грижа за НАТО? Затоа што сакаме Европа да може да се одбрани ако, не дај Боже, биде нападната. Ние всушност ја сакаме Европа“, рече Венс, според „CNN“.

Истиот ден, Венс разговараше со „Washington Examiner“ за Гренланд и преговорите со европските лидери, кои ги води заедно со државниот секретар Марко Рубио.

Тој изјави дека јавното непријателство на европските земји кон барањата на Трамп за Гренланд е „само изговор“ и дека европските лидери биле „многу поразумни“ во приватните разговори.

„Тие беа неверојатно непријателски настроени јавно, но зад сцената признаа дека Гренланд е важен за нашиот заеднички безбедносен сојуз на НАТО“, рече Џ.Д. Венс.

Тој додаде дека и Русија и Кина посочиле планови за дејствување во Гренланд во следните неколку години, што, според него, го прави американското присуство „клучно за одбраната и проекцијата на моќ“.

Венс истакна дека евентуалната руска или кинеска контрола врз Гренланд би ја ослабнала безбедноста на САД и на НАТО алијансата и би ја загрозила ракетната одбрана.

„Тоа би им дало можност да проектираат моќ. Тоа би ја ослабнало нашата ракетна одбрана и затоа сето ова зборува во прилог на зајакнувањето на таа област, обезбедувањето на нејзината безбедност“, рече тој.

Унгарскиот премиер Виктор Орбан го критикуваше претседателот на Украина, Володимир Зеленски, за неговиот говор во Давос, во кој, како што велат од Будимпешта, тој „повторно ја нападна унгарската влада и него лично“.

Сепак, како што истакна Орбан во својата објава на мрежата Икс, Зеленски го критикуваше и „секој друг европски лидер“. „Зеленски вели дека поддршката испратена до Украина е недоволна, оружјето е недоволно и дека решителноста на Европа е недоволна. Не мораше долго да чекаме на одговорот од Брисел. Синоќа претседателката на Европската комисија, Урсула фон дер Лајен, презентираше патоказ за развој на Украина. Во него, Брисел го прифати секое украинско барање – 800 милијарди долари за Украина, забрзан пристап во ЕУ до 2027 година и понатамошна поддршка до 2040 година“, рече Орбан.

Тој рече дека Зеленски „сè погрешил“, но дека Брисел е „подготвен да плати“.

„И ќе кажеме неколку зборови за тоа. Доаѓа национална петиција, со која можеме да испратиме јасна порака до Брисел: нема да плаќаме“, заклучи Орбан, пренесува Танјуг.

Во своето вчерашно обраќање на Светскиот економски форум во Давос, Зеленски, меѓу другото, ги илустрираше своите ставови споредувајќи го со филмот „Денот на мрмотот“, велејќи дека Европа, како херојот од филмот, „ги повторува истите зборови“ без промена во дејствувањето, и покрај изминатата година и повторените апели дека „Европа знае како да се брани“.

Руските сили вчера извршија напади со беспилотни летала и ракети врз два града во југоисточна Украина, при што загина едно лице, а повеќе од дваесет беа повредени, објавија денес локалните власти.

Гувернерот на Запорошката област во објава на Телеграм кажа дека руските сили извршиле четири напади врз градот Комишуваха, при што загина едно лице, а други 10 беа повредени. Во нападот беа оштетени неколку семејни куќи.

Во комбиниран руски напад со беспилотни летала и ракети беа повредени 13 лица, вклучувајќи четири деца, во индустрискиот град Кривји Рог, родното место на претседателот Володимир Зеленски во регионот Дњепропетровск, напиша шефот на воената администрација на градот, Олександр Вилкул, во објава на Телеграм.

Нападите погодија станбени згради, училишта и стратешка инфраструктура.

„Главната работа е што сите преживеаа“, напиша Вилкул, додавајќи дека шест лица, вклучувајќи ги и повредените деца, се хоспитализирани.

„Ројтерс“ не можеше независно да потврди дека се случиле нападите, а руските претставници не коментираа за ситуацијата.

фото/украинска војска