Регион
Директорот на косовската полиција уапсен во Србија по потерница за тероризам
Српската полиција го уапсила високиот функционер на косовската полиција, 40-годишниот Нехат Тачи од Урошевац, врз основа на потерница од Вишиот суд од Ниш поради тероризам, потврди во четвртокот српското министерство за внатрешни работи.
Нихат Тачи, како што се наведува во соопштението, бил уапсен во средата вечерта околу 20 часот на административниот премин Кончуљ, при влегување на територијата на Србија. Врз основа на решението на Вишиот суд во Ниш од 2010 година, за одредување мерка притвор, Тачи е спроведен во притвор, според соопштението на министерството за внатрешни работи на Србија.
Според јавниот сервис Радио-телевизија Србија, Тачи е директор на Полицијата на Косово за регионот на Косовска Митровица.
Апсењето на Тачи за агенцијата Бета го потврдил портпаролот на косовската полиција, Даут Хоџа, според кого, пак, косовскиот полициски функционер бил уапсен доцна ноќта кон четвртокот, по полноќ, на преминот Бела кај Бујановац, како и дека патувал во „една западноевропска земја, со автомобил преку територијата на Србија“. Портпаролот не можел да ги наведе причините поради кои Тачи е уапсен, освен дека имаат сознание дека во текот на денот треба да биде сослушан во Основниот суд во Ниш.
Според сознанијата на регионалната телевизија TV N1, Нехат Тачи е уапсен на барање на српските правосудни власти од април 2009 година.
„Според барањето за спроведување истрага на Окружното јавно обвинителство во Приштина, истражниот судија донел на 23-ти април 2009 година решение за спроведување истрага против осомничените Т.А и Н.Т, поради основано сомнение дека извршиле кривично дело тероризам“, изјавиле за TV N1 во нишкото обвинителство повикувајќи се на Кривичниот законик на Србија.
Истражен судија на Вишиот суд во Ниш од 17-ти септември 2010 година донел решение со кои на осомничените им се одредува притвор и издал наредба за распишување потерница, о Вишиот суд во декември истата година донел решение за прекин на истражната постапка, бидејќи лицата против кои е покрената истрагата „не им се достапни на државните органи на Србија“.
Засега нема повеќе поединости за ова апсење на висок косовски полициски функционер, ниту за конкретните дела за кои се товари Нехат Тачи./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Лекари во Загреб вградиле мозочен стимулатор на маж со Паркинсонова болест : „Може да вози велосипед, да плива“
Уште еден голем успех на хрватските лекари. Тим хирурзи во болницата Дубрава прв во овој дел од Европа вгради мозочен стимулатор. Пред еден месец новата технологија ја примил загрепчанец кој поради Паркинсоновата болест речиси станал неподвижен.
„Поентата на таа електрода е што стимулира дел од мозокот и на тој начин ја подобруваме клиничката слика, а батеријата освен што стимулира, купува и информации од тој дел од мозокот што го стимулираме и на тој начин можеме да ги подобриме симптомите“, изјави неврохирургот Фади Алмахарик за RTL.
Во КБ Дубрава изминативе 24 години се врши длабока мозочна стимулација, но првиот пациент беше опериран со оваа најнова технологија на крајот на март. Станува збор за 67-годишен загрепчанец со Паркинсонова болест, кој сега е пуштен на домашно закрепнување.
„Во договор со неврологот, стимулацијата се вклучува, терапијата се намалува, пациентот веднаш по вклучувањето на стимулацијата покажува знаци на моторно подобрување. Беше отпуштен дома на физикална терапија и дополнително прилагодување на стимулацијата“, изјави неврохирургот Марина Рагуж.
Веднаш штом ги отстранивме шевовите по 10 дена, почнавме со стимулација и денес пациентот може да вози велосипед, да плива, да се врати на своето секојдневие“, вели хирургот.
Регион
Додик не го признава геноцидот во Сребреница: „Ќе однесеме цвеќе, ако не навредува никого“
Во четвртокот, лидерот на Србија во Босна и Херцеговина, Милорад Додик, изрази подготвеност да го посети Меморијалниот центар Поточари во Сребреница и да положи цвеќе на заедничкиот споменик подигнат во спомен на масакрот на Бошњаците за време на војната, но тој повторно негираше дека таму имало геноцид.
Во интервју за новинската агенција на Република Српска, претседателот Додик најави дека владата и целото раководство на овој ентитет ќе заседаваат во Сребреница на 2 мај 2024 година, кога ќе се одржи дискусија пред Обединетите нации и се очекува гласање за Резолуција за осуда на геноцидот во тој град во летото 1995 година.
Резолуцијата е поддржана од дваесет земји, меѓу кои САД, Обединетото Кралство и Германија и се очекува нејзино усвојување. Целта е да се интернационализираат страдањата на Бошњаците во Сребреница.
Водечките српски претставници од Белград и Бања Лука, претседателите Александар Вучиќ и Милорад Додик, тврдат дека ова е обид да се префрли вината на српскиот народ.
„Република Српска нема да ја прифати резолуцијата за Сребреница за која ќе се одлучува во Генералното собрание на ОН бидејќи се што е напишано во неа е лага. Босна и Херцеговина не може да живее врз основа на тоа дека едната нација во неа е оквалификувана како геноцидна“, рече Додик.
Сепак, тој изрази подготвеност да им оддаде почит на жртвите од масакрот во Сребреница.
„Ако ни се укаже можност, на 2 мај ќе однесеме венци во Поточари, ако тоа не навреди никого. Не се плашам дека би можел да завршам како Вучиќ, кој дојде да им оддаде почит на жртвите, изрази сочувство, а доби камен во главата и никој не одговараше за тоа“, истакна Додик.
Тој смета дека Резолуцијата за Сребреница сепак нема да го добие потребното мнозинство на седницата на Генералното собрание на ОН.
Регион
Двајцата осомничени за убиството на малата Данка испратени во Специјалната затворска болница
Двајцата осомничени Срѓан Јанковиќ и Дејан Драгијевиќ денеска се испратени во Специјалната затворска болница во Белград на психијатриско вештачење, пишува „Телеграф“.
Во написот медиумот пишува дека осомничениот Дејан Драгијевиќ (50) деталите за убиството на детето ги изнесе во Вишото јавно обвинителство во Заечар. Сепак, тој не сакаше да открие каде го оставил телото на Данка.
Срѓан Јанковиќ (50) не зборувал за делото.
Во Вишото јавно обвинителство во Заечар биле сослушани и родителите на Данка, Ивана и Милош, кои, како што се наведува, опишале како течел денот кога исчезнала ќерка им.
Додека давале исказ, во иста просторија седеле и осомничените за убиството на детето.
Пред рочиштето исказ за „Телеграф“ дал таткото на убиената Данка.
„Смртната казна не им е доволна, треба да бидат во затвор до крајот на животот. Тоа се чудовишта, она што постојано го доживуваме не се опишува. Тоа може да го разбере само родител. Неколкупати ни дојде полиција, ѝ зедоа разни работи на Данка, ништо не знаеме, ниту за крвта на патот ниту во автомоблилот, ништо. Не ни е јасно зошто не се јавиле во итната помош, зошто не помогнале, но го направиле ова што го направиле. Тоа што јас и Ивана постојано страдаме е страшно, разни луѓе ни се јавуваат, нѐ навредуваат, ни ја префрлаат вината. Морав да побарам да го сменам бројот, не можеме повеќе. Кога сѐ ќе заврши, ќе кажеме сѐ“, рече тој.