Регион
Две Бугарски фаворитки за генерален секретар на ОН
Директорката на Организација на Обединетите нации за образование, наука и Култура (UNESCO), Ирина Бокова и потпретседателката на европската комисија, Кристалина Георгиева се фаворитки во трката за нов генерален секретар на ОН, но шанси имаат и поранешниот министер за надворешни работи на Србија, Вук Јеремиќ и шефот на словачката дипломатија Мирослав Лајчак, пишува лондонски The Economist.
Весникот потсетува дека новиот генерален секретар на ОН треба да биде од источна Европа, а вториот мандат на Бан Ки Мун истекува следната година.
Според пишувањето на Economist, САД би сакале на чело на светската организација првпат да биде една жена.
Бугарскиот премиер Бојко Борисов е близок со Георгиева и би сакал таа, како негов сојузник да остане во Брисел, но сепак би можел да ја предложи за генерален секретар на ОН.
Бокова е поврзана со бугарската опозиција, но има поддршка од дел од владејачката коалиција, која се закани дека ќе се повлече од владата доколку Борисов не ја кандидира за генерален секретар на ОН.
Бокова, сепак, ја загуби наклонетоста на САД со залагањето Палестина да стане членка на UNESCO.
Останатите кандидати се надеваат дека Георгиева и Бокова меѓусебно ќе се елиминираат, но и тие имаат свои проблеми, наведува Economist.
Поранешниот шеф на хрватската дипломатија Весна Пусиќ не може да смета на поддршка на новата влада во Загреб.
Кандидатурата на поранешниот претседател на Словенија Данило Турк не предизвика интерес.
Министерот за надворешни работи на Црна Гора Игор Лукшиќ има мали шанси и се смета дека цел на неговата кандидатура е добивање на поени за некоја друга функција.
Аутсајдер, според весникот, е и поранешниот шеф на македонската дипломатија, Срѓан Керим.
Economist оценува дека Јеремиќ има малку подобри шанси, иако на Западот стекнал непријатели противејќи се на независноста на Косово. Јеремиќ неодамна пронајде влијателни сојузници во САД, но мора да ја убеди сопствената влада да го кандидира.
Лајчак веројатно ќе биде номиниран доколку сегашната словачка влада повторно биде избрана во март.
Доколку САД и Русија не постигнат согласност за некој од овие кандидати, можно е да се појават и нови кандидати во последен момент. Можно е некој од нив и да не бидат до источна Европа, но моментно најмногу шанси имаат кандидатите од Балканот, заклучува Economist. /крај/мф/ап
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Додик не го признава геноцидот во Сребреница: „Ќе однесеме цвеќе, ако не навредува никого“
Во четвртокот, лидерот на Србија во Босна и Херцеговина, Милорад Додик, изрази подготвеност да го посети Меморијалниот центар Поточари во Сребреница и да положи цвеќе на заедничкиот споменик подигнат во спомен на масакрот на Бошњаците за време на војната, но тој повторно негираше дека таму имало геноцид.
Во интервју за новинската агенција на Република Српска, претседателот Додик најави дека владата и целото раководство на овој ентитет ќе заседаваат во Сребреница на 2 мај 2024 година, кога ќе се одржи дискусија пред Обединетите нации и се очекува гласање за Резолуција за осуда на геноцидот во тој град во летото 1995 година.
Резолуцијата е поддржана од дваесет земји, меѓу кои САД, Обединетото Кралство и Германија и се очекува нејзино усвојување. Целта е да се интернационализираат страдањата на Бошњаците во Сребреница.
Водечките српски претставници од Белград и Бања Лука, претседателите Александар Вучиќ и Милорад Додик, тврдат дека ова е обид да се префрли вината на српскиот народ.
„Република Српска нема да ја прифати резолуцијата за Сребреница за која ќе се одлучува во Генералното собрание на ОН бидејќи се што е напишано во неа е лага. Босна и Херцеговина не може да живее врз основа на тоа дека едната нација во неа е оквалификувана како геноцидна“, рече Додик.
Сепак, тој изрази подготвеност да им оддаде почит на жртвите од масакрот во Сребреница.
„Ако ни се укаже можност, на 2 мај ќе однесеме венци во Поточари, ако тоа не навреди никого. Не се плашам дека би можел да завршам како Вучиќ, кој дојде да им оддаде почит на жртвите, изрази сочувство, а доби камен во главата и никој не одговараше за тоа“, истакна Додик.
Тој смета дека Резолуцијата за Сребреница сепак нема да го добие потребното мнозинство на седницата на Генералното собрание на ОН.
Регион
Двајцата осомничени за убиството на малата Данка испратени во Специјалната затворска болница
Двајцата осомничени Срѓан Јанковиќ и Дејан Драгијевиќ денеска се испратени во Специјалната затворска болница во Белград на психијатриско вештачење, пишува „Телеграф“.
Во написот медиумот пишува дека осомничениот Дејан Драгијевиќ (50) деталите за убиството на детето ги изнесе во Вишото јавно обвинителство во Заечар. Сепак, тој не сакаше да открие каде го оставил телото на Данка.
Срѓан Јанковиќ (50) не зборувал за делото.
Во Вишото јавно обвинителство во Заечар биле сослушани и родителите на Данка, Ивана и Милош, кои, како што се наведува, опишале како течел денот кога исчезнала ќерка им.
Додека давале исказ, во иста просторија седеле и осомничените за убиството на детето.
Пред рочиштето исказ за „Телеграф“ дал таткото на убиената Данка.
„Смртната казна не им е доволна, треба да бидат во затвор до крајот на животот. Тоа се чудовишта, она што постојано го доживуваме не се опишува. Тоа може да го разбере само родител. Неколкупати ни дојде полиција, ѝ зедоа разни работи на Данка, ништо не знаеме, ниту за крвта на патот ниту во автомоблилот, ништо. Не ни е јасно зошто не се јавиле во итната помош, зошто не помогнале, но го направиле ова што го направиле. Тоа што јас и Ивана постојано страдаме е страшно, разни луѓе ни се јавуваат, нѐ навредуваат, ни ја префрлаат вината. Морав да побарам да го сменам бројот, не можеме повеќе. Кога сѐ ќе заврши, ќе кажеме сѐ“, рече тој.
Регион
Воз налета на пешак: трагедија кај Стара Пазова
Вечерва околу 19:15 часот брз воз налетал на пешак на брзата пруга Нови Сад-Белград.
Несреќата се случила меѓу станиците Инѓија и Стара Пазова.
Засега не се знае точно како дошло до несреќата, а полицијата врши увид на лице место.
Информирани се сите надлежни служби, пишуваат српските медиуми.