Регион
Приштина: Илјадници на закопот на убиените терористи во Куманово

Илјадници косовски Албанци, меѓу кои и припадници на поранешната Ослободителна војска на Косово (ОВК – УЧК), присуствуваа во вторникот на закопот на осумте вооружени напаѓачи, косовски државјани, убиени во судирот со македонската полиција, коишто македонските власти но и дел од европските политичари ги прогласија за терористи.
Осумте ковчези прекриени со албански знамиња беа изложени во спортската сала во Приштина, а покрај нив се изменуваше почесна стража на мажи во воени униформи, пренесува AFP.
„Им оддаваме почест бидејќи учествуваа во три војни, на Косово (1998/1999), во долината на Прешево (југот на Србија во 2001), и во Македонија (2001), каде што се бореа за ослободување на окупираните албански територии“, изјавил за AFP претставникот на Здружението на поранешните борци на ОВК, Џавит Јашари.ж
„Иста беше целта на нивната присутност во Македонија“, каде што на 9-ти мај во кумановската населба Дива населба се судрија со македонската полиција кога загинаа и осум македонски полицајци, десет терористи и околу 30 беа заробени.
„Горд сум што го жртвував синот за албанската работа, за Албанците кои немаат никакви права. Неговото семејство е горди што даде маченик за слободата“, вели во репортажата на AFP Ќерим Реџа, чиј син Арбен загина во Куманово. „Гордоста“ што нејзиниот сопруг загинал во судирот не ја сокрива ниту 30-годишната Беса Кастрати, бидејќи нејзиниот маж „умре жртвувајќи се за својот народ“. „Отсекогаш сонуваше слобода за сите Албанци, каде и да живеат“, рекла.
Поинаку размислува пак, забележува агенцијата, 60-годишниот Тим Зумбери кој го загуби синот Џафер: „Да ме послушаше, немаше да замине во Македонија. Зад себе сотави три деца“.
Загинатите се погребани на Гробиштата на мачениците покрај Приштина, каде што се погребани останките на најпознатите припадници на ОВК./крај/мф/сн
Извор: AFP
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Парламентот во Бугарија одби воведување на еврото

Претседателката на бугарскиот парламент, Наталија Киселова, го отфрли предлогот на претседателот Румен Радев за организирање референдум за воведување на еврото, велејќи дека тоа е спротивно на уставот, објави бугарската новинска агенција БТА.
Радев предложи одржување референдум за воведување на еврото следната година.
„Дали се согласувате дека Бугарија треба да ја воведе единствената европска валута „евро“ во 2026 година?“ е прашањето што би се поставило.
Владата го критикуваше ова, а еден министер рече дека тоа е обид за саботирање на нејзините напори за воведување на еврото.
Враќајќи го предлогот, Киселова рече дека тој е неконзистентен со неколку членови од бугарскиот устав и договорите на ЕУ, како и со одлуката на бугарскиот Уставен суд.
Бугарскиот Уставен суд претходно го отфрли барањето за организирање референдум за воведување на еврото.
Бугарската влада планира да го воведе еврото во јануари доколку Европската комисија и Европската централна банка во јуни оценат дека земјата ги исполнила сите критериуми.
Регион
Вучиќ: Политичката волја на Србија е да биде на европскиот пат; Разбирам што мисли ЕУ за моето патување во Москва

Претседателот на Република Србија, Александар Вучиќ, го пречека претседателот на Европскиот совет, Антонио Кошта, во Палатата на Србија.
Претседателот на Србија, Александар Вучиќ, изјави дека никого не довел во заблуда со тоа дали ќе оди на прославата на Денот на победата во Москва.
„Србија, како што рече Кошта, секогаш е на европскиот пат и, како што рече, можеби има непослушен претседател, но тој претседател никогаш не го довел во прашање тој пат“, рече Вучиќ на прес-конференција.
„Многу сум среќен што имав можност да разговарам со претседателот на Европскиот совет и сум задоволен од содржината на нашите разговори. Му благодарам на претседателот Кошта за посетата на Србија, за тоа што донесе добра волја во разговорите за пристапување на Србија во Европската Унија“, рече Вучиќ на почетокот од своето обраќање.
Тој зборуваше и за дијалогот меѓу Белград и Приштина.
„Реков дека Србија е секогаш подготвена за разговори, дека никогаш не сме бегале од дијалог“, нагласи тој.
„Разговаравме и за неопходноста од спроведување реформи во нашата земја. ЕУ е најважниот партнер за нас. Имаме најголем обем на размена со ЕУ. Нашиот извоз е 52 процента од Западен Балкан. Важно е што 4 од 10-те најголеми извозници од нашата земја се инвеститори од ЕУ“, рече Вучиќ.
Тој истакна дека со Кошта разговарал и за неговата посета на Москва.
„Добро знам и разбирам што мисли ЕУ за моето патување во Москва, што чувствуваат тие. Мислам дека е исклучително важно да повторам каква е политичката волја на Србија, а тоа е Србија да биде на европскиот пат, да го отвори Кластерот 3 што е можно побргу. Атмосферата не е толку добра поради патувањето во Москва. Верувам дека ќе има разбирање во Европа, напредок базиран на заслуги“, рече Вучиќ.
„Верувам дека ќе можеме да добиеме зелено светло. На секое место, и јас отсекогаш сум велел, дека сегашноста и иднината на Србија припаѓаат на соработката и членството во ЕУ. Многу добро ги разбирам нивните приговори дека не воведовме санкции врз Русија. Од самиот почеток Србија стоеше на принципи почитувајќи ја Повелбата на ОН“, рече Вучиќ.
„Се надевам дека ќе го завршам мојот мандат како претседател на Републиката, така што Србија ќе биде поблиску на патот кон ЕУ“, рече претседателот на Србија.
„Не е мое да слушам, туку да му служам на народот, јас сум претседател на Србија. Ја најавив мојата посета на Москва и никогаш не излажав, „непослушниот“ претседател никогаш не го доведе во прашање европскиот пат на Србија“, рече Вучиќ.
„Јас сум претседател на Србија и морам да се грижам за патот на нашата земја. Морам да ги замолам сите државни органи да работат на европскиот пат. Да се натпреваруваме во таа позитивна смисла“, додаде Вучиќ.
Регион
Двокатен автобус oд Косово се заглави под подвозник во Загреб

Автобус од Косово се заглави пред најпознатиот подвозник во Загреб на улицата Мирамарска.
Возачот на автобусот се обидел да помине под подвозникот висок 3,65 метри.
Инцидентот предизвикал голем метеж во градското подрачје, пренесе „Индекс“.