Регион
Шешељ одбива доброволно да се врати во Хаг на изрекување на пресудата
Обвинетиот во Хаг за воени злосторства во војните во поранешна Југославија и челник на Српската радикална партија (СРС), Воислав Шешељ, потврди во четвртокот дека е покрената постапка за негово предавање на Меѓународниот суд за воени злосторства на територијата на поранешна СФРЈ, и порача дека ќе ја почитува судската процедура во Србија, но дека доброволно нема да замине во Хаг.
На редовната прес-конференција на неговите радикали, Воислав Шешељ изјави дека му е предадена судска покана да, по налог на Жалбениот совет на Хашкиот трибунал, на 10-ти март, како обвинет да се појави пред Вишиот суд во Белград.
„Ќе се одзвам на поканата. Нема да бегам, ниту да се кријам, но нема да одам доброволно во Хаг. Ќе се повикам на Европската конвенција за човекови права, на правото на правично судење, правото на судење во разумен рок и правото самиот да се бранам“, изјави Шешељ пред новинарите.
Хашкиот трибунал претходно од српските власти побара да обезбедат присуство на Шешељ при изрекувањето на пресудата, закажана за 31-ви март.
Шешељ истакна дека, доколку владата на српскиот премиер и негов поранешен партиски колега Александар Вучиќ, одлучила да го предаде на Хаг, ќе пружи пасивен отпор и дека Српската радикална партија, без оглед на тие околности, ќе учествува во предизборната кампања за вонредните парламентарни избори, кои најверојатно ќе се одржат на 24-ти април.
„Верувам дека Александар Вучиќ е на тешки маки, бидејќи е свесен што за него би значело доколку ме предаде на Хаг. Тоа би била дамка којашто би го ставила во редот со (Борис) Тадиќ, (Зоран) Ѓинѓиќ, (Зоран) Живковиќ и другите кои ги предаваа Србите на Хаг“, изјави Шешељ.
Најави дека СРС на 24-ти март ќе одржи митинг на Плоштадот на републиката во Белград, а ќе го нарече „Бунт против режимот на Вучиќ“.
Хашкиот трибунал, Воислав Шешељ, кој доброволно се предаде на 24-ти март 2003 година, го судеше по обвинение за прогон на несрпското население на политичка, расна и верска основа, депортација и нехумани дела и злосторства против човечноста над Хрватите и Бошњаците во Хрватска, Босна и Херцеговина и во српската северна покраина Војводина, во периодот од 1991 до 1993 година. Во притворот на хашкиот суд беше до ноември 2014 година, кога привремено беше ослободен поради здравствени причини, со обврска за Србија на барање на Трибуналот да ги испорача за изрекување на пресудата.
Обвинителите во завршниот збор во март 2013 година за Шешељ бараа затворска казна во траење од 28 години, а Шешељ, кој се бранеше самиот со логистичка поддршка на правен тим од СРС, бараше ослободителна пресуда.
Пред да биде пуштен на привремена слобода, на Шешељ во болницата во Хаг му беше дијагностициран тумор на црниот дроб, а на 12-ти ноември 2014 година, по речиси 12 години се врати во Србија поради влошената здравствена состојба. По доаѓањето во Белград изјави дека не бега, но и дека нема доброволно да се врати во Хаг, каде што ниту по 11 ипол години, колку што траеше судскиот процес, сé уште не е изречена пресуда по обвинението за воени злосторства.
Во меѓувреме, по интензивната терапија, Шешељ кон средината на јануари 2015 година тврдеше дека му се запрени метастазите на ракот на црниот дроб, како и дека тој сега е „најздравиот на српската политичка сцена“.
Политичките коментатори оценуваат дека неговата Српска радикална партија (СРС) на претстојните предвремени парламентарни избори со партиите од корпусот на десницата и евроскептиците, би можеле да го минат изборниот праг и да се вратат во парламентот по тешките изборни порази откако од радикалите се издвоија претседателот на Србија Томислав Николиќ и премиерот Александар Вучиќ и ја формираа сега владејачката Српска напредна партија (СНС)./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Додик не го признава геноцидот во Сребреница: „Ќе однесеме цвеќе, ако не навредува никого“
Во четвртокот, лидерот на Србија во Босна и Херцеговина, Милорад Додик, изрази подготвеност да го посети Меморијалниот центар Поточари во Сребреница и да положи цвеќе на заедничкиот споменик подигнат во спомен на масакрот на Бошњаците за време на војната, но тој повторно негираше дека таму имало геноцид.
Во интервју за новинската агенција на Република Српска, претседателот Додик најави дека владата и целото раководство на овој ентитет ќе заседаваат во Сребреница на 2 мај 2024 година, кога ќе се одржи дискусија пред Обединетите нации и се очекува гласање за Резолуција за осуда на геноцидот во тој град во летото 1995 година.
Резолуцијата е поддржана од дваесет земји, меѓу кои САД, Обединетото Кралство и Германија и се очекува нејзино усвојување. Целта е да се интернационализираат страдањата на Бошњаците во Сребреница.
Водечките српски претставници од Белград и Бања Лука, претседателите Александар Вучиќ и Милорад Додик, тврдат дека ова е обид да се префрли вината на српскиот народ.
„Република Српска нема да ја прифати резолуцијата за Сребреница за која ќе се одлучува во Генералното собрание на ОН бидејќи се што е напишано во неа е лага. Босна и Херцеговина не може да живее врз основа на тоа дека едната нација во неа е оквалификувана како геноцидна“, рече Додик.
Сепак, тој изрази подготвеност да им оддаде почит на жртвите од масакрот во Сребреница.
„Ако ни се укаже можност, на 2 мај ќе однесеме венци во Поточари, ако тоа не навреди никого. Не се плашам дека би можел да завршам како Вучиќ, кој дојде да им оддаде почит на жртвите, изрази сочувство, а доби камен во главата и никој не одговараше за тоа“, истакна Додик.
Тој смета дека Резолуцијата за Сребреница сепак нема да го добие потребното мнозинство на седницата на Генералното собрание на ОН.
Регион
Двајцата осомничени за убиството на малата Данка испратени во Специјалната затворска болница
Двајцата осомничени Срѓан Јанковиќ и Дејан Драгијевиќ денеска се испратени во Специјалната затворска болница во Белград на психијатриско вештачење, пишува „Телеграф“.
Во написот медиумот пишува дека осомничениот Дејан Драгијевиќ (50) деталите за убиството на детето ги изнесе во Вишото јавно обвинителство во Заечар. Сепак, тој не сакаше да открие каде го оставил телото на Данка.
Срѓан Јанковиќ (50) не зборувал за делото.
Во Вишото јавно обвинителство во Заечар биле сослушани и родителите на Данка, Ивана и Милош, кои, како што се наведува, опишале како течел денот кога исчезнала ќерка им.
Додека давале исказ, во иста просторија седеле и осомничените за убиството на детето.
Пред рочиштето исказ за „Телеграф“ дал таткото на убиената Данка.
„Смртната казна не им е доволна, треба да бидат во затвор до крајот на животот. Тоа се чудовишта, она што постојано го доживуваме не се опишува. Тоа може да го разбере само родител. Неколкупати ни дојде полиција, ѝ зедоа разни работи на Данка, ништо не знаеме, ниту за крвта на патот ниту во автомоблилот, ништо. Не ни е јасно зошто не се јавиле во итната помош, зошто не помогнале, но го направиле ова што го направиле. Тоа што јас и Ивана постојано страдаме е страшно, разни луѓе ни се јавуваат, нѐ навредуваат, ни ја префрлаат вината. Морав да побарам да го сменам бројот, не можеме повеќе. Кога сѐ ќе заврши, ќе кажеме сѐ“, рече тој.
Регион
Воз налета на пешак: трагедија кај Стара Пазова
Вечерва околу 19:15 часот брз воз налетал на пешак на брзата пруга Нови Сад-Белград.
Несреќата се случила меѓу станиците Инѓија и Стара Пазова.
Засега не се знае точно како дошло до несреќата, а полицијата врши увид на лице место.
Информирани се сите надлежни служби, пишуваат српските медиуми.