Регион
Вучиќ: Нападот во Сребреница е организиран, раката на помирување кон Бошњаците останува подадена
Српскиот премиер Александар Вучиќ порача по вонредната седмица на неговата влада во Белград откако претходно во саботата беше нападнат во Поточари на комеморацијата на жртвите од масакрот во Сребреница кој Србија не го прифаќа како геноцид туку како воено злосторство со конкретни извршители, изјави дека неговата рака на помирување останува подадена и дека жали за тоа што некои не ја препознале неговата порака до Србите и Бошњаците дека треба заедно да го градат мирот.
„И покрај тоа што денеска го доживеав, мојата рака кон бошњачкиот народ останува подадена и јас ќе продолжам со таа политика и секогаш ќе бидам подготвен да ги решаваме и надминуваме проблемите“, истакна српскиот премиер Александар Вучиќ во обраќањето за медиумите по вонредната владина седница.
Оцени дека нападот врз него и врз српската делегација во комплексот кај Поточари бил организиран и дека првите повици со омраза од масата му ги упатиле припадници на една навивачка група до Србија, ненаведувајќи за кој клуб станува збор.
„Тоа не беше никаков инцидент, тоа беше организиран напад. Прво група навивачи на еден фудбалски клуб од Србија почна да извикува навреди, а потоа од масата следеа повиците ‘Алаху акбар’, ‘убиј го Вучиќ’, ‘убиј го четникот’… Прво не сакав да се засолнам, туку да ги запрашам зошто тоа го прават кога веќе дојдов и подадов рака за помирување, но веќе започна кошкањето, па реагираа момчињата од обезбедувањето“, појасни српскиот премиер.
Потврди дека во мешаницата бил удрен со камен во усната, како и дека во мешаницата останал без очилата.
Вучиќ порача дека тие луѓе не се свесни дека „ги навредија мајките и семејствата на жртвите, бидејќи на денешен ден повеќе се зборува за тие будали кои сакаа да организираат нечиј линч, отколку за одавањето чест на жртвите“.
Го повтори ставот на владата и својот личен дека раката на помирување и соживотот останува подадена за Бошњаците.
Она што му го забележуваат бошњачките медиуми во Босна и Херцеговина, е што Србија одбива масакрот на како што се наведува осум илјади машко население во Сребреница да го карактеризира како геноцид, како што го квалификуваат Меѓународниот кривичен суд за воени злосторства сторени на територијата на поранешна СФРЈ и Меѓународниот суд на правдата. Русија во средата на Советот за безбедност при ОН ја блокираше резолуцијата за Сребреница со која тоа злосторство се карактеризира како геноцид, откако претходно не беше прифатена нејзината резолуција, со образложување дека таквиот текст на резолуцијата ќе предизвика нови омрази и напнатости во регионот. Европскиот парламент во четвртокот, пак, усвои резолуција со која настаните во Сребреница се квалификуваат како геноцид остро осудувајќи го и критикувајќи го „негирањето и релативизирањето на тој геноцид“.
Вучиќ, пак, ги повика сонародниците и сограѓаните и покрај денешниот инцидент во Поточари да не покажуваа омраза кон Бошњаците. „Будали има во секој народ, во тоа ниту ние сме во дефицит… Тој напад бил добро организиран и подготвен, имаше многу политички пораки, но среќен сум што тоа не беа семејствата на жртвите, рече српскиот премиер.
„Никој сега нема права по ова што денеска се случи да прави што ќе му се посака… Соседи и пријатели Бошњаци, уште еднаш ја подавам раката. И не грижете се за будалите коишто го сторија ова денеска, такви има насекаде“, порача Вучиќ.
Му се заблагодари на градоначалникот на Сребреница, Ќамил Дураковиќ, кој му испратил извинување по нападот.
На бошњачкиот член на Претседателството на БиХ, Бакир Изетбеговиќ, кој претходните денови му упатуваше остри пораки во врска со апсењето на воениот командант на бошњачките сили во текот на војната од 1992 до 1995 година Насер Орлиќ, кого Србија го товари за воени злосторства врз босанските Срби, и во контекст на подготовката на резолуцијата во ОН за Сребреница, Вучиќ му порача дека „никогаш ништо лошо нема да му се случи во Србија“ и дека не сака да го доведува Изетбеговиќ во никаква врска со инцидентот.
„Не сакам сега да зборувам. Јас не организирав никаква хајка против друга држава и народ… Кога ќе можам да се седнам морно и трпеливо, тогаш (Изетбеговиќ) ќе го повикам телефонски и ќе разговараме“, рече српскиот претседател.
На новинарско прашање призна оти свесно ги прекршил безбедносните протоколи по предупредувањата од разузнавачко-полициските служби. „Ги прекршив безбедносните протоколи, да, Но, доколку не ги прекршев, ќе рековте дека сум кукавица. И да ја загубев главата, јас ќе бев виновен“, рече српскиот премиер Александар Вучиќ./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Сијарто: Фокусот на унгарското претседателство со ЕУ ќе биде проширувањето на Унијата на Западен Балкан
За време на претстојното претседавање со ЕУ, Унгарија планира да се фокусира на прашања кои се важни за централна Европа, како што се борбата против илегалната миграција, проширувањето на Унијата кон Западен Балкан и енергетската безбедност, изјави денеска унгарскиот министер за надворешни работи, Петер Сијарто.
Кога станува збор за проширувањето на ЕУ, Сијарто на прес-конференција со својот чешки колега Јан Липевски рече дека регионот на Западен Балкан не заслужува да чека 14 години и 11 месеци за членство, што, како што вели, го поткопува кредибилитетот на политиката на Унијата, објави унгарската агенција МТИ.
„Тоа е ситуација што треба да се реши, така што унгарското претседателство (со Унијата) има јасна агенда да им помогне на земјите од Западен Балкан да го забрзаат пристапниот процес“, рече Сијарто.
Посочи дека ефектите од миграцијата директно се чувствуваат во Централна Европа од 2015 година и неопходна е сериозна регионална соработка за да се запре мигрантскиот прилив.
„Чешката, словачката и полската полиција ни помогнаа и ни помагаат на јужните граници на Унгарија да ги задржиме илегалните мигранти кои и се закануваат на Европа надвор од границите. Потребни се континуирани заеднички напори на четворицата централноевропски премиери за да се држи под контрола прашањето за квотите и да не се дозволи илјадници или десетици илјади илегални мигранти да се шетаат неконтролирано“, додаде Сијарто.
Шефот на унгарската дипломатија нагласи дека централна Европа „ќе продолжи да се спротивставува на притисоците поврзани со квотите“. Сијарто се осврна и на енергетската безбедност, наведувајќи дека Унгарија и Чешка планираат нуклеарен развој и затоа ќе продолжат да се борат против негативната дискриминација поврзана со нуклеарната енергија во Брисел.
Нуклеарната енергија е одржлив начин за производство на енергија, тоа е безбеден, еколошки и евтин метод за производство на големи количини електрична енергија“, заклучува Сијарто.
Регион
Ана Брнабиќ за 2 јуни распиша локални избори во 66 единици на локалната самоуправа
Претседателката на српското собрание Ана Брнабиќ распиша избори за 2 јуни во 66 единици на локалната самоуправа, бидејќи Националното собрание неодамна со две третини ги усвои измените на Законот за локални избори.
Изборите во овие локални самоуправи ќе се одржат на ист ден со изборите за советници во Градското собрание на Белград, односно на 2 јуни годинава.
„Среќна сум што испративме силна порака од парламентот до сите наши граѓани дека како нивни избрани сме способни да разговараме и да постигнеме договор и покрај сите наши разлики“, рече Брнабиќ по објавата.
Регион
(Видео) Уапсени Срби во Атина, поранешни членови на „Пинк Пантер“: осомничени се за украден накит вреден 315.000 евра
Двајца Срби, кои во минатото биле членови на организацијата „Пинк Пантер“, се уапсени во Атина под сомнение дека ограбиле две познати златарници во центарот на грчката престолнина, соопшти атинската полиција.
Според соопштението на грчката полиција, уапсените оперираат најмалку од минатиот декември, а се претпоставува дека имале соодветна мрежа за канализирање на украдени предмети, бидејќи оствариле добивка од над 315.000 евра.
По претресот во нивните домови, меѓу другото, пронајден е алат користен при кражбата, три рачни часовници, накит, 190 евра, лажна возачка дозвола, три мобилни телефони, лични предмети, како и дополнителен мотоцикл и автомобил што служеле за превоз.