Италијанскиот премиер Марио Драги изјави дека очекува туризмот да се отвори од средината на мај, кога е дозволено патување меѓу италијанските региони, пренесува „Ројтерс“.

Говорејќи на состанокот со министрите за туризам од Групата 20, Драги рече дека здравствената патна документација ќе биде оперативна до средината на јуни, со што ќе се олесни патувањето низ континентот.

„Чекаме европски сертификат. Имаме национална зелена пропусница кој ќе им овозможи на луѓето да одат од регион во регион и ќе биде оперативна до средината на мај. Не мора да чекаме до средината на јуни на европски сертификат за да патуваме“, рече Драги.

Тој додаде дека во средината на мај, туристите ќе имаат италијанска пропусница.

„Време е да резервирате одмор во Италија“, рече Драги.

Американското воено присуство во Сирија е нелегално, за разлика од Русија, објави руската амбасада во САД.

„Би сакале да ве потсетиме дека военото присуство на САД во Сирија е, пред сè, незаконско. Затоа, тие немаат право да ги критикуваат легитимните постапки на руските вооружени сили кои дејствуваат во Сирија на покана на сириската влада“, изјавија од руската амбасада. Инспекторот на Пентагон Шон О’Донел, тврди дека дејствијата на руската армија во североисточна Сирија го кршат механизмот за спречување конфликти.

Во извештајот се вели дека „иако руските сили претежно се придржуваа на механизмот, бројот на прекршувања значително се зголеми во споредба со последниот квартал“, рече тој.

Според американската страна, повредата се однесува на вклучување на дополнителни превозни средства во претходно организирана колона за патроли.

Извозот на злато во Русија во март годинава скокна за 220 проценти на годишно ниво, на 26,5 тони, достигнувајќи вредност од речиси 1,5 милијарди долари, покажуваат податоците на Руската федерална царинска управа.

Извозот на тој благороден метал беше 2,3 пати поголем во март од претходниот месец, пренесува „Раша Тудеј“, повикувајќи се на податоците и извештајот за царина.

Велика Британија е сè уште најголем купувач на руско злато, со купени 21,1 тон во вредност од 1,2 милијарди долари.

Податоците, сепак, не покажуваат дали откупеното злато ќе остане во Велика Британија или ќе се продава на други земји, бидејќи Лондон е важен светски центар за трговија и складирање на благородни метали.

Според статистичките податоци, околу 1,5 тони руско злато биле извезени во Турција и Индија, а меѓу купувачите на „жолт“ метал од Русија биле Казахстан, Швајцарија, Ерменија и други земји.

Вкупно, извозот на руско злато во првиот квартал од 2021 година изнесувал 51,8 тони и вредел 3 милијарди долари. Што се однесува до количината, тоа е зголемување за 72 проценти во споредба со истиот период во 2020 година.