Извештаите на американските разузнавачки служби покренаа сомнежи за тоа дали новата лидерка на Венецуела, Делси Родригез, ќе соработува со администрацијата на Трамп и формално ќе ги прекине врските со американските противници, изјавија во последните денови четири лица запознаени со извештаите.

Американските претставници јавно изјавија дека сакаат привремениот претседател да ги прекине врските со блиските меѓународни сојузници на Венецуела, како што се Иран, Кина и Русија, вклучително и протерување на нивните дипломати и советници од земјата.

Но, Родригез, на чија церемонија на положување заклетва присуствуваа претставници на тие земји претходно овој месец, сè уште јавно не го објавила таков потег. Таа стана претседател откако САД го киднапираа поранешниот венецуелски претседател Николас Мадуро на 3 јануари.

Извештаите на американските разузнавачки служби велат дека не е јасно дали таа целосно се согласува со стратегијата на САД во нејзината земја, според извори кои побараа да не бидат именувани. Директорот на ЦИА, Џон Ратклиф, отпатува во Каракас на 15 јануари за да разговара за политичката иднина на земјата со Родригез. Ројтерс не можеше да утврди дали разговорите го промениле мислењето на разузнавачките агенции.

Вашингтон сака да го ограничи влијанието на своите непријатели од западната хемисфера, вклучително и Венецуела, каде што Трамп се обидува да ги искористи огромните резерви на нафта на земјата од ОПЕК.

Доколку Родригез ги прекине врските со американските ривали, тоа би отворило повеќе можности за американски инвестиции во енергетскиот сектор на Венецуела. Но, неуспехот да се контролира Родригез би можел да ги поткопа напорите на Вашингтон да ги води привремените владетели на земјата од далеку и да избегне подлабока воена улога на САД.

Централната разузнавачка агенција и венецуелската влада не одговорија на барањата за коментар.

Запрашан за коментар, висок функционер од администрацијата на Трамп, кој зборуваше под услов да остане анонимен, рече дека американскиот претседател Доналд Трамп „продолжува да има максимална моќ“ врз венецуелските лидери и „очекува таа соработка да продолжи“.

ЦИА претходно процени дека функционерите лојални на Мадуро, вклучувајќи ја и Родригез, биле во најдобра позиција да ја водат земјата по неговото соборување.

Но, критичарите на стратегијата на Трамп за Венецуела изразија сомнежи во мудроста лојалистите на Мадуро да останат привремени лидери. Загриженоста за Родригез беше присутна дури и пред воената операција на САД, велат два извори.

За Венецуела, барањето на САД значи напуштање на своите најблиски сојузници надвор од регионот. Иран ѝ помогна на Венецуела да ги поправи своите рафинерии за нафта, додека Кина земаше нафта како отплата на долгот. Русија снабдуваше оружје, вклучително и ракети, на венецуелската војска.

Трамп, исто така, ја наведе Куба, предводена од комунистите, како уште еден непријател на САД што сака Венецуела да го напушти.

По соборувањето на Мадуро, Родригез, чии длабоки врски со нафтениот сектор се клучни за одржување на стабилноста на земјата, презеде чекори за да остане во добри односи со Вашингтон, вклучително и ослободување на политички затвореници и одобрување на продажба на 30 до 50 милиони барели нафта на Соединетите Американски Држави.

Џо Бајден им се придружи на американските претседатели од редовите на Демократската партија во осудата на смртоносната пукотница во Минеаполис. Коментирајќи ја веста дека федералните агенти го убиле 37-годишниот медицински техничар Алекс Прети, Бајден рече дека чинот претставува „предавство на најосновните вредности на Американците“.

Во изјавата во која се повикува на уставното право на правична постапка, Бајден рече: „Ние не сме земја што пука во своите граѓани на улица. Ние не сме земја што дозволува бруталност врз граѓаните за остварување на нивните уставни права. Ние не сме земја што го гази Четвртиот амандман и толерира тероризирање на нашите соседи“.

„Луѓето од Минесота нè потсетија на сè што значи да се биде Американец, а тие веќе претрпеа премногу под оваа администрација. Насилството и теророт немаат место во САД, особено кога нивната сопствена влада ги таргетира американските граѓани“, додаде тој.

Во малку прикриена критика кон Доналд Трамп, чија администрација се соочува со растечки критики за тактиките за имиграција, Бајден истакна: „Никој не може да го уништи она за што се залага и во што верува Америка, дури ни претседателот, ако ние, целата Америка, се заложиме и проговориме“.

„Знаеме кои сме. Време е да го покажеме тоа на светот. Уште поважно, време е да го покажеме и на самите себе“, истакна тој. Тој повика на „целосни, фер и транспарентни“ истраги за „бесмислените“ убиства на Прети и Рене Гуд.

Изјавата на Бајден следува по осудите што ги упатија претходно Барак Обама и Бил Клинтон. И двајцата ги повикаа Американците да проговорат и предупредија дека основните американски вредности се нападнати по засилената репресија на администрацијата на Трамп против имиграцијата во Минеаполис.

По напуштањето на функцијата, Бајден претежно се држеше подалеку од јавноста. Тој моментално се лекува од рак на простата и е ангажиран во пишување мемоари и развивање на претседателската библиотека.

Неговите изјави доаѓаат во време кога многу демократи се незадоволни од неговата одлука да остане претседателски кандидат на партијата долго време во текот на изборниот циклус во 2024 година, потег што критичарите го оценија како ослабување на моментумот на партијата.

Бајден на крајот ѝ ја отстапи номинацијата на потпретседателката Камала Харис, која Трамп ја победи и освои втор мандат во Белата куќа.

Крајбрежната стража на Грција вчеравечер уапси маж кој со брод се обидел да избега додека криумчарел мигранти, додека пак пред два дена, по дојава дека биле истоварени мигранти кај Икарија, властите пронашле тело на четиригодишно дете.

Патрола на крајбрежната стража го забележала бродот како се движи со голема брзина кон западниот брег на Хиос, по што започнала потера, а криумчарот отишол кон плажата Гларој каде ги „истоварил“ сите патници кои избегали.

Подоцна, Крајбрежната стража и локалната полиција подоцна пронајдоа 16 мажи, 11 жени и девет деца, по што биле однесени во прифатен центар на Хиос.