Од Берлин за „Макфакс“ Ана В.

Во рамките на Берлинскиот филмски фестивал на европскиот филмски маркет за денеска попладне се закажани проекции на три македонски играни филма. Со овие проекции филмовите добиваат можност да се претстават пред 1.623 професионалци од 110 земји во светот и да бидат откупени или селектирани на некои од филмските фестивали. Европскиот филмски маркет е еден од најважните случувања во светот на филмската индустрија, што им овозможува соработка и промоција на филмските професионалци на глобалната филмска сцена. Промоцијата на македонските филмови е поддржана од Агенцијата за филм на Република Македонија.

Трката за престижната „Златна мечка“ на 68. издание на Берлинскиот филмски фестивал почна на 15 февруари. Во изминатите три дена фестивалот е во атмосфера на дискретен гламур. Иако беше побарано црвениот тепих да биде заменет со црн за да се сврти вниманието кон темата за сексуалното вознемирување во филмската индустрија, директорот на Фестивалот, Дитер Кошлик, реши препознатливата црвена шамија што ја носи да ја замени со црна.

„Во знак на солидарност со жешката тема што го тресе Холивуд и нашиот Фестивал се приклучи за да го сврти вниманието за да укаже на големината на проблемот. Сметам дека мојата црна шамија доволно говори за мојот став кон оваа тема“, рече Кошлик.

Дека овие случаи на сексулано вознемирување во филмската индустрија станале ситем и не се изолирани настани, вчера беше констатирано на големата дебата со мото „Спик ап“, организирана од Шведскиот и Норвешкиот филмски институт, што ја проследија и некои филмски звезди.

„Филмската уметност е благородна и со големо социјално влијание, па не може да дозволиме овие големи афери да ја извалкаат. Кога беше посочено дека во филмската индустрија тоа станало пракса и систем на дејствување, а предаторите воопшто тоа не го сметале за прекршок, мораме постојано да потсетуваме дека за нив ќе нема место во филмот“, беше општиот заклучок на дебатата.

Актерите Брајан Кранстон, Џеф Голдблум, Бил Мареј и Боб Балабан, дел од екипата во филмот „Островот на кучињата“ на Вес Андерсон, со кој започна манифестацијата, ги споделија размислувањата на темата.

Според Бил Мареј, проблемот не се однесува само на забавната индустрија. „Ако одиме во Њујорк по некоја жена, ќе забележите како мажите ја раскинуваат со поглед“, вака Бил Мареј го опиша однесувањето на модерниот сексуален предатор.

Берлиналето е првиот од големите европски фестивали по секс-скандалот што избувна во Холивуд и наиде на одек во светот и набљудувачите очекуваа организаторите соодветно да реагираат.

На церемонијата на отворањето на фестивалот во Берлин многу ѕвезди го следеа примерот на актерките што поминаа на црвениот килим во црни фустани за наградите „Златен глобус“. Актерката Тилда Свинтон, истакнат поддржувач на Androgenic View, се појави во смокинг.

Филмот за диктатурата на Франко ја расплака публиката

Освен оваа тема, на годинешното Берлинале се отвора и темата за политиката и филмот, па по вчерашната светска премиера на шпанско-американската копродукција на документарниот филм „Тишината на другите“, следуваа овации од публиката во преполната сала. Со многу емоции и силен аплауз беше поздравена екипата што го реализирала овој комплексен докумантарен филм кој зборува за диктатурата на шпанскиот генерал Франко. Од публиката следуваа низа прашања за оваа тема и воопшто за нарушувањата на човековите права од страна на политичките диктатури во светот.

„Се надеваме дека филмот во Шпанија ќе наиде на добар прием кај публиката иако очекуваме дека ќе има и такви што нема до крајот да сакаат да ги спознаат вистините за големата неправда и скршените човечки судбини предизвикани од фашистичкото владеење на Франко. Сакавме да проговориме со многу факти, но и најважно од сè беше да се видат емоциите и личните приказни на луѓето што настрадале“, рече режисерката на филмот.

Интересни прашања беа упатени и на прес-конференцијата до екипата на филмот „Среќниот принц“, германско-белгиско-италијанска копродукција во режија на Руперт Еверт.

Филмот кој зборува за животот на големиот писател Оскар Вајлд и неговата хомосексуалност нафрли прашања за толкувањето на правата на ЛГБТ-заедницата и колку за нив се избориле од времето на Вајлд до денес.

„Сметам дека животот на Вајлд бил возбудлив на секаков можен начин. Неговата биографија неправедно се поврзува единствено со неговата хомосексуалност, но секако се согласувам дека тоа е важна тема и дека сега живееме сосема поинакво време и неправдата од минатото е исправена“, рече Руперт, кој, освен режијата, игра и главна улога во филмот.

Идната недела во вторник во рамките на Фестивалот светска премиера ќе има филмот „Кога дрвјата паѓаат“, дебитантски филм на Марисја Никитук, кој е копродукција помеѓу Украина, Полска и Македонија. Тој е селектиран во програмата „Панорама“, а во текот на Фестивалот филмот ќе има 5 фестивалски проекции и 2 затворени проекции за филмските професионалци.

Фестивалот ќе биде затворен на 25 февруари, а веќе почнуваат да се насетуваат фаворитите што ќе ги освојат престижните статуетки „Златна“, „Сребрена“ и „Бронзена мечка“.