Помеѓу 100 и 200 лица загинаа во борбите што последниве два дена се водат во јужните авганистански провинции.

Помеѓу 100 и 200 лица загинаа во борбите што последниве два дена се водат во јужните авганистански провинции.

Најголем број од загинатите се авганистански бунтовници предводени од талибанците, кои загинаа во најжестокиот напад поведен откако НАТО ја започна својата мисија на оддржување на мирот во Авганистан.

Официјални претставници соопштуваат дека во борбите учествувале американски, канадски и силите на авганистанската полиција, од една страна, и бунтовниците од друга.

НАТО силите не пријавуваат загуби во сопствените редови, но затоа загинале најмалку 13 авганистански полицајци и повеќе десетици талибански бунтовници.

Авганистанскиот претседател Хамид Карзаи обвини дека талибанците биле помагани од Пакистан, кој ги обучувал и логистички ги помагал бунтовниците.

Ова не е прво обвинување од ваков тип. Неодамна авганистански министер го обвини Пакистан дека ја знае точната локација каде се крие терористичкиот лидер бр.1 Осама бин Ладен, некаде на авганистанско-пакистанската граница, но оти ништо не презема за негово апсење.

Исламабад решително ги отфрли обвинувањата на авганистанскиот претседател дека им пружа подршка на бунтовниците во Авганистан.

„Нема никакви вистини во тоа. Пакистан не тренира и не испраќа бунтовници во Авганистан“, изјави портпаролот на пакистанската дипломатија.

Над илјада нови војници на НАТО ова лето треба да бидат стационирани во јужните авганистански покраини Хелманд и Кандахар.

Македонија и Бугарија неодамна соопштија дека во НАТО мисијата испраќаат 90, односно 70 војници.

Македонските војници од механизирана пешадиска чета, треба да бидат под британска команда, но, не се соопштува каде точно ќе бидат распоредени.

Бугарските војници, како што соопшти вчера Владата во Софија, ќе бидат распоредени во мисија на обезбедување на аеродромот во Кабул. Владата оценува дека мисијата на бугарските војници нема да биде особено ризична.