Европската унија има историска одговорност да ја отвори вратата за сите држави од западен Балкан.

Европската унија има историска одговорност да ја отвори вратата за сите држави од западен Балкан.

Ова во денешното интервју за агенцијата „Deutsche Presse-Agentur“ (ДПА) го изјави претседателот на Европската комисија (ЕК), Жозе Мануел Баросо.

„Имаме историска одговорност да дадеме се од себе да ги интегрираме тие држави“, нагласи Баросо.

Според него, неуспехот да се отворат вратите на ЕУ на државите во нестабилниот регион ќе ги забави реформите на Балканот, но би можел да предизвика и нови војни и да ги засили проблемите со илегалната трговија со луѓе и стока.

„Ако балканските држави бидат примени во ЕУ, тоа ќе биде вистински тест за лидерите на Унијата“, рече Баросо во интервјуто за ДПА.

Претседателот на ЕК понатаму додава дека челниците на ЕУ би морале да се договорат околу идното проширување на Унијата до крајот на 2006 година, со цел „бесконечната расправа околу овој проблем да не стане деморализирачка за идните членки на Унијата“.

Баросо истакна дека проширувањето на ЕУ на исток ќе го засили блокот на глобален план каде што ќе можат да се соочуваат со клучните конкуренти како Кина, Русија, Индија и САД.

Тој нагласи дека поголема Европа, со поголем број членки, ќе биде поимпресивна и на светската сцена и дека се повеќе ќе биде почитувана.

„Проширена ЕУ е Европа која повеќе ја почитуваат, тоа е услов за посилна Европа“, рече Баросо.

ДПА оценува дека коментарите на Баросо ја одразуваат растечката загриженост во Комисијата, дека неколку членки на ЕУ не сакаат да ги прифатат земјите од западен Балкан.

Франција, која е поддржана од Холандија и Данска, бара ЕУ да ја разгледа „апсорпционата моќ“ што се однесува до финансиските ресурси и механизмот на донесување одлуки пред да заземе став за идните проширувања.