Израелската армија рано изутрина започна копнена офанзива во јужниот дел на појасот Газа, соопшти официјален претставник на армијата.

Израелската армија рано изутрина започна копнена офанзива во јужниот дел на појасот Газа, соопшти официјален претставник на армијата.

Формално оправдување за акцијата е оценката на посредниците, дека се многу мали шансите да биде ослободен израелскиот војник, кој беше уапсен во неделата од страна на палестински вооружени групи.

Палестинските организации бараат ослободување на жените и децата од израелските затвори во замена за војникот.

Се верува дека околу 300 палестински жени и околу 100 момчиња под 18 години се држат во израелските затвори без обвинение, меѓу 8.000 палестински затвореници. Но, изралеските власти одбиваат било каков разговор и истакнуваат дека тоа прашање не е на дневен ред на израелската влада.

Единици на израелската војска синоќа влегоа најмалку еден километар од границата на Газа, и се стационираа близу поранешниот меѓународен аеродром кој не е во употреба.

Тенковските единици и моторизираната пешадија биле поддржани со борбени акции на артилеријата, борбени хеликоптери и авиони.

Засега нема извештај колкав е обемот на акцијата, односно со колку борбени единици се изведува, но воени извори наведуваат дека операцијата ќе биде „силна и хируршки прецизна“ и наменета за ослободување на заробениот војник.

При нападот се бомбардирани неколку објекти, меѓу кои и главниот трансформатор за снабдување на појасот со електрична енергија.

Офанзивата на израелската армија е прво влегување во Газа по ланското целосно повлекување од окупираните територии уште од 1967.

Акцијата започна откако ХАМАС, движењето кое е на власт во Палестина, доцна синоќа ја демантираше веста дека донел одлука за признавање на Израел.

Палестинскиот министер Абдел Рахман Зеидан од Хамас, изјави за Би-Би-Си дека за тоа „нема ниту збор’’ во договорениот документ.