Финскиот премиер Мати Ванханен денеска го отфрли предлогот на новите земји кандидати за членство во Европската унија да им се воведат дополнителни критериуми.

Финскиот премиер Мати Ванханен денеска го отфрли предлогот на новите земји кандидати за членство во Европската унија да им се воведат дополнителни критериуми.

„Новите критериуми не треба да се воведуваат за земјите кандидати, но императивно е постоечките критериуми да бидат исполнети“, изјави финскиот премиер, чија земја од 1 јули го презема претседавањето со ЕУ.

Ванханен, кој пред Европскиот парламент ја претстави програмата на својата земја во текот на шестмесечното претседавање со Унијата, изјави дека ЕУ и натаму треба да биде една „отворена унија“ и дека европските земји што ќе ги исполнат критериумите за членство треба да станат членки.

„Одлуката за датумот за пристапување на Романија и Бугарија ќе биде донесена во текот на финското претседавање со ЕУ. Преговорите со Хрватска и Турција ќе бидат продолжени врз основа на напредокот што ќе биде постигнат“, истакна финскиот премиер.

Во заклучоците од самитот на ЕУ се наведува дека анализата на Европската комисија за „абсорпциската моќ“ на ЕУ за прием на нови членки мора да го опфати и објаснувањето на тој процес на европските граѓани.

Тоа е нагласено имајќи предвид дека на референдумите за европскиот устав во Холандија и Франција не беше прифатен заедничкиот европски документ, пред се како противење на турскиот влез во ЕУ, но и поради убедувањето дека последното проширување со 10 нови земји членки ги загрозува работните места и животниот стандард на постарите членки на Унијата.

Во заклучоците исто е наведено дека со „влегувањето на нови членки ја потврди историската шанса за придонес кон мирот, безбедноста, стабилноста, демократијата, владеењето на законите, како и развојот и благосостојбата на ЕУ во целост“.