Израел денеска го предупреди либанското население дека ќе ги бомбардира сите возила што ќе се движат јужно од реката Литани, вклучувајќи го и градот Тир.

Израел денеска го предупреди либанското население дека ќе ги бомбардира сите возила што ќе се движат јужно од реката Литани, вклучувајќи го и градот Тир.

„Секое возило што ќе се движи јужно од Литани ќе биде бомбардирано поради сомнение дека превезува ракети или оружје за терористите“, се вели во летоците напишани на арапски јазик што ги исфрлиле израелски авиони.

Одлуката на израелската војска е образложена со неможноста да знаеле во кој камион се наоѓало оружје, наместо хуманитарна помош. На ова реагираат службениците од Обединетите нации, оценувајќи дека со ова дополнително се отежнува и онака лошата состојба со помошта.

Во текот на денешните операции најмалку 15 либански цивили загинаа при бомбардирање на цели во претежно шиитскиот дел од Бејрут. Израелците пак пријавија дека еден војник загинал, а петмина други се повредени во борби со Хезболах во јужниот дел од Либан.

Израелскиот премиер Ехуд Олмерт денеска изјави дека синоќешната одлука на Либан да размести 15.000 војници во јужниот дел на земјата е „интересен чекор“, што неговата влада ќе го разгледа.

„Одлуката е интересен чекор што треба да биде разгледан, да се види во која мерка е практичен и во која временска рамка“, рече Олмерт.

Дипломатските напори во Обединетите нации, во меѓувреме, продолжуваат, во обид да се постигне договор околу резолуциите кои би го запреле конфликтот.

Основата на француско-американскиот предлог која бара итен прекин на непријателствата и од страна на Хезболах и од страна на Израел, е неприфатлива за Либан и за Арапската лига, која преку амандмани ќе се обиде во документот да биде побарано и итно повлекување на Израел од јужен Либан.

Рускиот амбасадор во ООН веќе соопшти дека за Москва нема да биде прифатлива ниту една резолуција за која нема да постои одобрување и од либанската Влада.

/крај/ббц/риа/б