Uncategorized
Историски концерт во Скопје, Бољшој и Трпчески – идеална комбинација
Скопската публика синоќа беше привилегирана во живо да ја слушне магичноста на звукот и суптилната интерпретација на најреномираниот руски и светски оркестар на театарот Бољшој од Москва, која во исполнетата Метрополис арена беше надополнета со виртуозната изведба на нашиот пијанист Симон Трпчески
Стотина членови на најпознатиот ансамбл, предводени од диригентот и музички директор на куќата Александар Ведерников, го исполнија ветувањето дека покрај својата професионалност, на концертот ќе внесат и душа и многу емоции, што резултираше со фантастичен амбиент и одушевеност на околу 2.500 гледачи.„Неверојатно е што по толку труд, ентузијазам и емоции вечерва го слушаме Бољшој во Скопје, а уште поневеројатно мене ми е што јас свирам со нив – во Скопје, им рече Трпчески на своите сограѓани за кои на крајот заедно со оркестарот имаше специјално изнанедување – премиерна верзија на „Во Струга дуќан да имам“ во аранжман на Панде Шахов. Концертот го претстави развојот на руската класична музика од 19-ти до средината на 20 век – на програмата беа дела од големите руски автори Чајковски, Рахмањинов и Прокофјев. Оркестарот ја отвори вечерта со Хамлет – фантазија увертира, на Петар Илич Чајковски, која ја напишал во 1888 г. и му ја посветил на норвешкиот композитор Едвард Григ по нивната средба во Лајпциг. Трпчески настапи на Концертното дело за соло-пијано и симфониски оркестар Рапсодија на тема Паганини од Сергеј Рахмањинов, последниот претставник на рускиот доцен романтизам во класичната музика и две години диригент на Оркестарот на Бољшој (1904-1906) кога ансамблот претрпел значајна реорганизација. По паузата членовите на Бољшој ја изведоа Петтата симфонија на Сергеј Прокофјев, која славниот композитор ја напишал во Втората светска војна и се смета за негово најпопуларно дело. На крајот следуваше специјалното изненадување Во Струга дуќан да имам и уште два биса – минијатурите за пијано Песни без зборови од Феликс Менделсон, кои Трпчески ги отсвири во чест на 200-годишнината од раѓањето на композиторот, а вечерта оркестарот од Москва ја затвори со енергичниот Руски танц – Трепак на Чајковски. Спектакуларниот концерт ќе биде печат на културата во Македонија во оваа година, а има и историско значење за музичкиот летопис поради првото гостување на оркестарот на Бољшој во земјава. Се одржа под покровителство на Министерството за култура, во организација на КултурОп и агенцијата ИМГ-Артист, одговорна за целата турнеја на оркестарот низ Европа. Идеалната комбинација на Бољшој и Трпчески ја потенцираа и првите луѓе на ансамблот на прес-конференцијата пред концертот во Скопје, задоволни од претходниот заеднички блескав настап во Лугано, Швајцарија. Зборувајќи со пофалби за македонскиот пијанист за кого рече дека е брилијантен талент, директорот на театарот Бољшој Александар Шанин на новинарите им откри дека Трпчески ќе биде нивниот гостин солист во следната концертна сезона во Москва. Бољшој е најстариот оркестар во Русија и меѓу најголемите симфониски оркестри во светот, основан во 1776 г. Се етаблирал во најавторитетен музички ансамбл, а потврда за неговото културно и музичко наследство е тековната 232 сезона и илјадниците туристи кои го посетуваат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Uncategorized
Oсмани: Ја победивме албанската опозиција со над 40.000 гласа, да се почитува волјата на народот
Прелиминарните резултати покажуваaт длабока победа на Европскиот Фронт, наспроти албанската опозиција со над 40 илјади гласа, изјави кандидатот за претседател, Бујар Османи, кој според првичните неофицијални резултати е пред неговиот опонент од албанскиот опозициски блок, Арбен Таравари.
„Оваа победа само докажува дека Европскиот фронт станува една голема локомотива за европската иднина на нашата држава“, рече Османи, додавајќи дека волјата на народот е јасна и треба да се почитува од сите.
Како што додаде, резултатите покажуваат дека се уште имаме поделено општество, притоа нагласувајќи дека Албанците, Турците, Бошњаците, Ромите кажале дека самите одлучуваат за својата иднина и никогаш нема да дозволат некој друг да одлучува за нив.
Приврзаниците на ДУИ вечерва се собраа на плоштадот „Скендербег“ во Скопје за да ја слават објавата на првичните неофицијални резултати од првиот круг.
Uncategorized
Демири, Ставридис, Ди Џовани и Јохансен: Бележиме зголемување на опфатот со вакцинација, но сè уште е под препорачаните 95 отсто
Министерот за здравство д-р Илир Демири, специјалната претставничка на СЗО во земјава, д-р Ане Јохансен, претставничката на УНИЦЕФ за Република Северна Македонија, Патриција ДиЏовани и д-р Кети Ставридис од Институтот за јавно здравје, одржаа заедничка прес-конференција, на која информираа за опфатот со имунизација во државата по повод одбележување на Европската недела за имунизација.
Демири, потенцираше дека Министерството за здравство со поддршка на УН агенциите презема повеќе активности за одбележување на Европската недела на имунизација.
-Се организира акција која веќе е во тек, таканаречена „спринт за имунизација“, каде над 70 тимови на доктори и медицински сестри ќе излезат на терет и ќе посетат над 3.000 семејства на невакцинирани деца со фокус на вакцинација за пертусис и морбили. Исто така, Министерството за здравство од Програмата за имунизација обезбеди средства за сите вакцинални пунктови при здравствените домови низ Македонија достојно да ја одбележат неделата за имунизација со настани поврзани за прмоција, рече Демири.
Тој апелираше до родителите да ги вакцинираат децата, затоа што високиот опфат на вакцинација на соодветна возраст, создава колективен имунитет.
-Со редовна вакцинација ги заштитуваме децата, најблиските и пошироката заедница од тешки заразни заболувања. Вакцините се апсолутно безбедни, а со воведувањето на вакцинацијата како мерка за заштита од заразни болести се постигнати најдобрите резултати во историјата на медицината“, изјави Демири.
Д-р Ставридис ги презентираше најновите бројки во однос на стапката за вакцинација во 2023 година, од што може да се констатира дека опфатот со задолжителните вакцини во земјава сè уште е под препорачаните 95% и за сите вакцини е под 90 отсто.
-Во нашата земја по дваесет години, првпат во 2020 година, е регистриран опфат под 90 отсто за примовакцинација со три дози на ДиТеПер/ИПВ вакцина. Во текот 2023 година, опфатот за примовакцинацијата со три дози на ДиТеПер/ИПВ/ХиБ вакцина, како и вакцината против хепатит Б, бележи зголемување во однос на 2021 и 2022 година, но сепак е понизок од 90%. Опфатот на примовакцинација (со три дози) со вакцините вклучени во поливалентните вакцини (ХиБ/ДиТеПер/ИПВ), бележи зголемување во однос на 2022 година (84,1%) и изнесува 86,3 %, а за вакцината против Хепатит Б изнесува 85,8%, посочи д-р Ставридис.
ДиЏовани ги повика родителите да ги вакцинираат своите деца за враќање на колективниот имунитет.
-Не чекајте да избие епидемија за да ги заштитите вашите деца. Веројатно не се сеќавате дека вашите родители ве одвеле на вакцинација, но со тоа помогнале да станете дел од едно од најголемите достигнувања на човештвото. Обезбедете им ја на вашите деца заштитата што ви ја дале вашите родители во минатото. Заедно можеме да направиме пресврт и да го вратиме колективниот имунитет, изјави ДиЏовани.
Јохансен потенцираше дека во моментов со финансиска поддршка на УСАИД, Светската здравствена организација ја поддржува иницијативата „Спринт за имунизација“ низ целата земја.
-Оваа иницијатива има за цел да ја подобри пристапноста и да ги зголеми стапките на покриеност во сите региони на државата преку проширување на достапноста за услугите за вакцинација на локално ниво, обезбедување вакцинација на самото место преку мобилни тимови за вакцинација на национално ниво и делење информативни материјали за имунизација базирани на докази. Овие наши активности ќе траат сè додека секое лице кое ги исполнува условите не биде целосно вакцинирано. СЗО ќе продолжи и во иднина да ги поддржува владините напори за зајакнување на програмите за имунизација, вклучително и поддршка во развојот на новиот Правилник за имунизација, зајакнување на капацитетите за планирање и спроведување на процесите на вакцинација и поддршка на успешното спроведување на националниот план за вакцинација и многу повеќе, истакна Јохансен.
Во однос на вакцинацијата, опфатот со ротавирусната вакцина (од воведувањето во 2019 година) континуирано бележи пораст, достигнувајќи 67,9 отсто.
Опфатот со МРП вакцинација, бележи зголемување во однос на 2022 година (70,7%), но сè уште има низок опфат од 73,4 отсто што е далеку од препорачаниот опфат од 95 отсто.
Вакцината против ХПВ инфекција, како и секоја година од воведувањето, има најнизок опфат (56,6%). Сепак, бележи зголемување на опфатот во однос на 2022 година (52,5%), а особено во однос на 2020 година (35,5%).
Со исклучителен успех е спроведена вакцинацијата на територијата на Пехчево, каде опфатот за сите вакцини е 100 отсто. На територијата на ЦЈЗ Кочани, ЦЈЗ Кочани/ПЕ Виница, ЦЈЗ Охрид/ПЕ Дебар и ЦЈЗ Куманово/ ПЕ Кратово за сите вакцини опфатот е над 90 отсто, а за одредени вакцини достигнува 100 отсто.
Uncategorized
Изведба на балетскиот триптих „Молитви на моето тело“ во рамките на фестивалот „Танц фест Скопје 2024“
На 23 април, со почеток во 20 часот, ќе се изведе балетскиот триптих „Молитви на моето тело“, инспириран од циклусот поезија со истоимениот наслов од поетот Ацо Шопов. Балетскиот триптих ќе се изведе во рамките на јубилејното 20. издание на интернационалниот фестивал „Танц фест Скопје 2024“.
Креативниот мозаик е составен од авторите: идејата за проектот и костимографијата се на Александар Ношпал, драматург е Соња Здравкова-Џепароска, кореографи се: Ивана Коцевска, Адријана Данчевска, Саша Евтимова, музиката е на Дарија Андовска, Александар Гроздановски и Александар Пејовски (изведба: диригент Сашо Татарчевски со Женскиот младински хор при МКЦ), сценограф е Михајло Стојановски, визуелен уметник – Флоријан Чанга од Албанија, камера и видеомонтажа на филм – Доријан Миловановиќ, мултимедија и графички дизајн – Лазе Трипков.
Поезијата на Шопов, односно истоимениот циклус поезија на сцената на Националната опера и Балет, ќе биде прочитана со јазикот на танцот создаден од тројца македонски кореографи на музика на тројца македонски композитори и другите уметници. Во формат на триптих балетската претстава „Молитви на моето тело“ претставува 90-минутно креативно сплотување на тим од тринаесет уметници, сценски пренесено од првенците, солистите и балетскиот ансамбл на Националната опера и Балет.