Министрите за надворешни работи на Европската унија денеска одржуваат состанок на кој расправаат за проширувањето, односите со Русија и за воените мисии во Конго и БиХ.

Министрите за надворешни работи на Европската унија денеска одржуваат состанок на кој расправаат за проширувањето, односите со Русија и за воените мисии во Конго и БиХ.

На шефовите на дипломатиите во расправата за воените мисии на ЕУ им се приклучиле и министрите за одбрана. Покрај заедничкиот, министрите за одбрана ќе имаат и одвоен состанок на кој ќе се расправа за развојот на европската безбедносна и одбранбена политика.

По овој состанок, предвидена е средба на министерската тројка на ЕУ со министрите за одбрана на земјите кандидатки Хрватска, Македонија и Турција, како и со министрите од земјите што се надвор од ЕУ, но се членки на НАТО, Исланд и Норвешка.

Во склоп на подготовките за самитот на ЕУ, планиран за средината на декември, што речиси во целост ќе се однесува на проширувањето, комесарот за проширување Оли Рен ќе ги запознае министрите со минатонеделниот извештај на Европската комисија за напредокот на земјите кандидатки и потенцијалните кандидати, како и со документот за стратегијата за понатамошно ширење.

Министрите, меѓу другото, ќе разговараат за продолжувањето на преговорите со Турција, за што во Унијата нема согласност.

Во расправата за западен Балкан, министрите треба да го одобрат мандатот на ЕК да започне преговори за олеснување на постапката за издавање визи за граѓаните од Македонија, БиХ, Србија, Црна Гора, Косово и Албанија.

Министрите ќе разговараат и за односите со Русија, со која ЕУ би требало на 24 ноември во Хелсинки да започне преговори за нов договор за стратешко партнерство.

/крај/хн/ст