Издавачката куќа „Феникс“ и Фондацијата „Македонија презент“ од Скопје, с цел да се афирмира и да се стимулира литературата за деца и млади, од оваа година започнува со доделување награда насловена како „Ана Франк“

Прва добитничка на наградата Ана Франк е канадската писателка на книги за деца, Криста В. Јохансен. Наградата ќе и биде доделена на Меѓународниот  саем на книгата во Скопје, што се одржува во април. Жирито во состав, Христо Петрески, Александар Прокопиев, Велко Неделковски, Тоде Илиевски и Светлана Ивановска, одлучија наградата да и ја доделат на Јохансен за книгата Тори и принцот-змија, која кај нас е во издание на Вермилион.Во образложението на жирито стои дека романот Тори и принцот-змија е магична авантура полна со акција и неодолив хумор.Криста В. Јохансен е автор на бројни фантастични и научно фантастични романи за деца и млади, како и збирки на раскази за возрасни и серијата на сликовници Пипин и Мејбл. Јохансен е родена во Кингстон, Онтарио, Канада во 1968 година. Студирала англиски јазик и историја на Универзитетот Маунт Алисон, а магистрирала средновековни студии во Центарот за средновековни студии на Универзитетот во Торонто, како и англиски јазик на Универзитетот Мекалистер во Хамилтон. Живее во Саквил, Канада. Член е на Унијата на писатели на Канада, Толкиновото здружение и Друштвото за проучување на раноанглиски текстови.Автор е на сериите Вештерите од Талвердин, Патник во ноќта (2007), Предавство во Исви (2008), Темничарот од Грејрок (2009), Патот на сенките (2010).Од нејзиното перо излегле и Авантурите на Тори, Тори и змејот (1997), Тори и пиратската кралица (2005), Тори и жар-птицата (2006), Тори и принцот-змија (2007), Тори и убијците на змејови (2009), потоа Вирусот Касандра (2006), Војната на Дроновите (2007), па сликовниците за Пипин, раскази и научни тругдови, за кои има добиено бројни награди.