Трговијата со фалсификувани лекови зема се поголем замав и се претвора во добро платен меѓународен бизнис, предупреди Агенцијата за контрола на наркотици при Обединетите нации.

Трговијата со фалсификувани лекови зема се поголем замав и се претвора во добро платен меѓународен бизнис, предупреди Агенцијата за контрола на наркотици при Обединетите нации.

Во својот годишен извештај, Меѓународниот совет за контрола на наркотиците со седиште во Виена, наведува дека околу 10 отсто од лековите што се во оптек во светот, всушност се фалсификат, пренесува британското радио Би-Би-Си.

Според истиот извор, процентот на фалсификувани лекови е најголем во земјите во развој, каде што се движи од 25 до 50 отсто.

Едно неодамна спроведено истражување покажува дека трговијата со лажни лекови за четири години би можела да донесе приход од дури 75 милијарди долари годишно.

Потрошувачите лажните лекови ги купуваат од повеќе причини, но најмногу поради тоа што се евтини, лесно се доаѓа до нив, а понекогаш копиите се толку добри, што тешко се воочува разликата меѓу оригиналот и фалсификатот.

Лажните пакувања, предупредуваат стручните лица, можат да сокриваат опасни, па дури и смртоносни супстанци.

„Потрошувачите најчесто не се свесни за ризикот што го преземаат, бидејќи лековите што ги пијат се со проблематична безбедност, ефикасност и квалитет. Лековите и останатите медицински препарати не се луксузна стока и треба да бидат регулирана. Ако тоа не биде направено, последиците по здравјето на населението би можеле да бидат огромни“, смета професорот Хамид Годсе, еден од авторите на Извештајот.

Дел од лековите што се продаваат нелегално се вистински медикаменти што се украдени, но поголемиот дел се чист фалсификат.

Според една студија спроведена во југоисточниот дел на Азија, чиј предмет беше лекот против смртоносниот вид маларија, покажа дека речиси половината тестирани примероци биле лажни, без било какво лековито дејство.

Агенцијата на ОН бара од сите земји да го подобрат надгледувањето и регулативата на лекови, бидејќи, како што наведува Хамид Годсе, 60 отсто од земјите во светот немаат системи што би го овозможиле тоа.

„Цената на недостаток на регулатива и здравствените проблеми што произлегуваат од тоа, е многу поголема од цената на самата регулатива и нејзиното спроведување“, вели Годсе.

Проблемот на лажните лекови главно се однесува на земјите во развој, ни ниту развиените земји не се имуни – посебно поради нерегулирањето на трговијата со лекови преку интернет, за што најчесто не е потребен лекарски рецепт.

Се проценува дека 50 отсто од илегалната продажба на лекови преку интернет е всушност продажба на фалсификати.

Светската здравствена организација (СЗО) кон крајот на минатата година покрена глобална акција за борба против фалсификуваните медицински производи.

Планот предвидува развој на подобра технологија, преку која би се предупредило на евентуално фалсификување и би се овозможило откривање и следење на фалсификатите на пазарот на лекови.

Со акциониот план на СЗО се бара од властите да преземат построги законски мерки против оние што прават и продаваат лажни лекови.

/крај/б/ст