Петмина наводни исламски радикали, меѓу кои и тројца браќа, косовски Албанци, се обвинети во вторникот за подготвување завера за напад на американските војници во базата Форт Дикс во Њу Џерси.

Петмина наводни исламски радикали, меѓу кои и тројца браќа, косовски Албанци, се обвинети во вторникот за подготвување завера за напад на американските војници во базата Форт Дикс во Њу Џерси.

Шестиот уапсен се товари за помагање и поддржување при илегално поседување оружје кај обвинетите.

„Филозофијата која ширум светот го поддржува и охрабрува ‘џихадот’ против Американците, дојде да живее во Њу Џерси и ги загрози животите на нашите граѓани преку обвинетите“, рече сојузниот обвинител надлежен за Њу Џерси, Кристофер Кристи.

Групата е уапсена во понеделникот навечер во Чери Хил во Њу Џерси, а во вторникот се изведени пред сојузниот суд во Камден, каде се запознаени со обвиненијата за кои се товарат.

Одреден им е притвор без можност за кауција до сослушувањето во петок, рекоа од обвинителството.

Канцеларијата на сојузниот обвинител објави дека обвинети се тројца браќа со презиме Дука, косовски Албанци со илегален престој во САД – Дритан (28), Шаин (26) и Елвир (23) – кои работеле во градежна компанија.

Освен нив, за учество во заговорот за напад на Форт Дикс се обвинети Мохамед Ибрахим Шневер (22), државјанин на САД роден во Јордан, вработен како таксист во Филаделфија и Сердар Татар (23) роден во Турција, со легален доселенички статус во САД, кој доставувал пици во базата Форт Дикс.

Шестиот обвинет, Агрон Абдулаху (24), исто така Албанец од Косово, имал легален доселенички статус и работа.

Групата планирала да испрати шест или седум луѓе во Форт Дикс да „нападнат и убијат најмалку стотина војници со употреба на минофрлачи, тромблони и автоматско оружје", рече обвинителот Кристи.

„Во овој момент нема докази дека групата добила упатства од меѓународните терористички организации", оцени портпаролот на Белата куќа Тони Сноу, сугерирајќи дека околностите на случајот бараат остар одговор на американското правосудство.

Судот во Камден објави 27 страници со изјави под заклетва, транскрипти од разговорите и изјавите на обвинетите, што ги снимиле двајца агенти на ФБИ уфрлени во групата на почетокот на 2006.

Најмладиот од браќата Дука, Елвир снимен е како зборува: "На крајот, кога станува збор за одбрана на твојата вера, кога некој ја напаѓа твојата вера, твојот начин на живот, тогаш одиш во џихад". Неговиот брат Шаин, цитиран е со зборовите „можеме да им нанесеме голема штета со седум луѓе. Можеме да направиме големи работи“.

Петмината уапсени живееле во Чери Хил, околу 16 км источно од Филаделфија и триесетина километри југозападно од Форт Дикс, база на копнената војска во која од 1999 година се сместени бегалци од Косово.

Шестмината систематски ја надгледувале воената база, а уапсени се при обид да купат автоматски пушки АК-47 за да го изведат својот план. Обвинетите вежбале гаѓање со пушки за „пеинтбол“ и со вистинско оружје, а гледале и снимки на Осама бин Ладен во кои тој повикува на мачеништво./крај/хн/ил