Една од најголемите фигури во оперскиот свет Лучиано Павароти почина изутрината на 71.годишна возраст по тешка битка со ракот на панкреас.

Една од најголемите фигури во оперскиот свет Лучиано Павароти почина изутрината на 71.годишна возраст по тешка битка со ракот на панкреас.

Павароти е роден во италијанскиот град Модена, на 12.октомври 1935 година, како единствено дете на пекар.

Како мал, повеќе го интересирало фудбал од музика, добивајќи локална слава како член на градската фудбалска екипа.

Прв пат пропеал во градскиот хор со својот татко, кој инаку бил голем љубител на операта и талентиран тенор-аматер.

Одлуката да продолжи да се занимава со музика ја донел откако градскиот машки хор Rossini доби прва награда на меѓународен натпревар.

Неговото професионално деби се случи на 29.април 1961 година, толкувајќи ја тенор-улогата на Родолфо во операта на Пучини La Boheme, во оперската куќа во Reggio Emilia. По италијанскиот успех, следат ангажмани во Амстердам, Виена, Цирих и Лондон.

Во 1965 година го имаше американското деби со Џоан Сатерланд што ќе се покаже како почеток на едно историско партнерство.

Токму во САД, во 1972 година, Павароти продуцираше еден од своите легендарни настапи. Во њујоршката Metropolitan Opera со леснотија испеа девет “високи Це“ тонови што предизвика ерупција на овации меѓу публиката.

Неговите плочи станаа “Best sellers“ покривајќи широка лепеза од оперскиот репертоар како и антологии на италијански песни.

Меѓутоа, славата на Павароти драматично ќе се зголеми при учеството на еден од најмаркантните концерти на класична музика за време на Светскиот куп во 1990 година – како еден од трите тенори.

Тој, со Хозе Карерас и Пласидо Доминго, пееја познати арии и популарни песни. Настапот предизвика рекорден “скок“ на музичките листи и еден од најпродаваните класични дискови на сите времиња.

Неговиот концерт во 1992 година во лондонскиот Хајд Парк, во присуство на принцот и принцезата од Велс, Чарлс и Дајана, беше прв класичен концерт во историјата на паркот каде се собраа околу 150 илјади лица.

Во јуни 1993 година, повеќе од 500 илјади фанови се собраа да уживаат во неговиот перформанс во Централниот парк во Њујорк. Тој септември, пееше и во “сенката“ на Ајфеловата кула во Париз пред околу 300 илјади негови обожаватели.

Голем број на симпатизери на “класичниот“ свет го критикуваа зошто одржува концерти на отворено, но дел од нив го бранеа со тврдењето дека прави многу вредна работа за популаризација на операта – им овозможува на обичните луѓе, во живо да ги слушнат “историските“ гласови.

Во март 2004 година, Павароти го одржа својот последен настап со улога во “Тоска“ на Пучини, во њујоршката опера, каде доби 11-минутни овации од публиката.

Подоцна истата година, ја најави својата последна турнеја низ 40 градови.

/крај/ббц/ис