Градоначалникот на Њу Орлеанс Реј Нагин и нареди денеска на војската и полиција да почнат со присилни евакуации од поплавениот град.

Градоначалникот на Њу Орлеанс Реј Нагин и нареди денеска на војската и полиција да почнат со присилни евакуации од поплавениот град.

Нивото на водата во Њу Орлеанс полека опаѓа, но и натаму има луѓе кои не сакаат да го напуштат градот, и покрај предупредувањето на Хагин за опасност од болести поради загадената вода.

Се претпоставува дека во градот се останати околу 10,000 жители, меѓу кои и семејства што повеќе од една недела се заробени во нивните домови.

Полицијата соопшти дека присилната евакуација се уште не е започната, бидејќи и натаму ги убедува луѓето мирно да ги напуштат своите куќи.

Градоначалникот ги повика “непослушните“ барем на кратко да заминат и да им овозможат на надлежни да го “исчистат“ Њу Орлеанс.

За таа цел, Пентагон почна со испраќање на 5,000 падобранци, кои со мали бродови ќе почнат нови потраги и спасувачки операции во градот.

Напоредно, инженерите забрзано работат на испумпување на водата од поплавениот град и се надеваат дека целата работа ќе може да ја завршат за неколку недели.

Воените инженери тврдат дека рокот за испумпување на водата варира од три недели до три месеци, зависно од тоа какви ќе бидат временски услови, состојбата на пумпите и пред се од тоа колку мртви тела и остатоци од разурнатите згради се под вода.

“Работата дополнително ни ја отежнуваат и спорадичните пресметки меѓу вооружените криминалци“, изјави главниот воен инжинер Ричард Бегнар.

Началникот на полицијата во Њу Орлеанс Еди Компоас изјави дека безаконието во градот драстично опаднало, а полицијата предупреди дека на сите кои ќе бидат фатени како крадат им се заканува казна затвор и до 15 години.

Секретарот за заштита на животната средина на Луизијана Мајм Мекданиел рече дека и покрај сите компликации, водата од градот мора да се испумпа, или во спротивно “ноќната мора ќе продолжи“.

Според него, водата ќе се излева во езерото Понкартрејн, иако е загадена од одводната канализација, тешки метали, нафта и од други опасни супстанци.

Додека во погодените подрачја траат операциите за расчистување и потрага по преживеани, во Вашингтон се разжестува расправата за тоа кој е одговорен за доцнење на спасувачката акција, бидејќи од порано беше предупредено дека ураганот “Катрина“ќе ја пробие браната што го штитеше Њу Орлеанс.

Белата куќа најави оти ќе издвои 40 до 50 милијарди долари за помош на настраданите во три сојузни држави – Мисисипи, Луизијана и Алабама, кои пред повеќе од една недела ги погоди Катрина и предизвика една од најголемите природни катастрофи во американската историја./крај/б/ег/