Лидерите на повеќе од 170 држави ќе се соберат в среда, во центарот на Светската организација, во обид да влијаат врз сузбивањето на сиромаштијата, јакнење на човековите права и глобалната безбедност, иако се помали се шансите за позначаен договор.

Лидерите на повеќе од 170 држави ќе се соберат в среда, во центарот на Светската организација, во обид да влијаат врз сузбивањето на сиромаштијата, јакнење на човековите права и глобалната безбедност, иако се помали се шансите за позначаен договор.

Завршниот документ, што би требало да биде усвоен на крајот од тридневниот светски самит, како што пренесуваат агенциите, се уште не е готов и се стравува дека во конечната верзија, амбициозните цели би можеле да бидат “разводнети“ во општи фрази и добра волја.

Генералниот секретар на ООН Кофи Анан, една година се обидуваше да издејствува, на Самитот што се одржува по повод 60. јубилејна седница на Генералното собрание, да се зацрта и усвои нов пристап во решавање на светските проблеми на сиромаштијата, заканите со војна и тероризмот, јакнење на човековите права, како и да се постигне согласност за реформите во ООН.

Сепак, и покрај напорите на дипломатите, преговорите се одвиваат тешко и споро и се верува дека ќе траат до последен час.

Несогласувања постојат по речиси сите прашања, меѓу Северот и Југот, меѓу одделни групи на земји во развој и меѓу САД и ЕУ. Ситуацијата дополнително ја комплицира и методологијата на работа на ООН која предвидува консензус 191 земја-членка.

Развиените земји би требало да се согласат со програмата за помош на неразвиените, а за возврат да добијат поддршка за предлозите за тероризмот, човековите права, интервенција во случај на геноцид и воени злосторства и реформа на ООН.

САД, во изминатиот месец, ги вознемирија земјите во развој со барањето од документите што ќе се усвојуваат на светскиот самит, да се исфрли повикот на богатите да ја зголемат помошта за развој на 0,7 насто од бруто домашниот производ. ЕУ вети дека тоа ќе го стори до 2015 година.

Оваа помош би овозможила постигнување на Милениумските развојни цели договорени во 2000 – намалување за половина на степенот на сиромаштија, намалување на смртноста на децата за две третини, сузбивање на сидата и општо основно образование за сите деца до 2015 година.

Несогласувања се јавија и околу воспоставување на новиот Совет за човекови права, прашањата за заштита од геноцид и воени злосторства, дефинициите на тероризмот, а во застој се и плановите за поголеми овластувања на генералниот секретар на ООН.

Една од најважните реформи на ООН, проширување на Советот за безбедност од 15 на 25 членки, исто така е оставена за подоцна, најрано за крајот на годинава./Крај/бе/ис