Доминираат екс претставници на НВО кај нововработените во владиниот пиар

Доминираат екс претставници на НВО кај нововработените во владиниот пиар

Откако Макфакс објави дека во службите за односи со јавност на министерствата и Владата се вработени најмалку 120 лица, а истовремено стигнаа и критики од Брисел вчера премиерот Зоран Заев најави намалување на бројот на вработени во владиниот пиар. По вчерашната објава на дел од биографиите на нововработените во пиар службата на Владата, Макфакс денеска ги објавува и останатите биографии и имиња на дел од ангажираните во овој сектор. Според биографиите до кои дојдовме кај оние кои работат во овој сектор доминираат искуствата и праксата во невладиниот/граѓански сектор, но има и поранешни новинари, познати фејсбукџии и твитерџии.

 „Предупредувањата од Брисел дека треба да се внимава на Секторот за односи со јавност, Владата ќе го почитува стопроцентно, со објаснување и на своите аргументи. Во овој дел никако не смееме да кикснеме“, порача вчера премиерот Зоран Заев. Тој најави и намалување на вработените во овие сектори.

Пораките од Брисел дека владата повеќе посветува внимание на односите со јавност отколку на реформите стигнаа во ист ден кога Макфакс објави дека во Владата и министерствата во моментот најмалку 120 луѓе работат односи со јавност (ПР) и комуникации. Платите и хонорарите на вработените што работат односи со јавност во Владата и министерствата ги чинат граѓаните најмалку 690 илјади евра годишно, покажуваат податоците за 2016.

Заев вчера рече дека ги отфрла се почестите тврдења и информации дека во Владата имало 120 вработени во пиар службите, туку 39 а тоа го пренесоа и бројни медиуми. Она што заборави да го спомене тој како и многу од медиумите е дека бројката од 120 лица не претставува тврдење, туку факт и бројка на лица кои работат на пиар во сите министерства и во Владата поткрепен со документи до кои дојдовме во нашето истражување со Барања за слободен пристап до информации од самите институции и Владата. Макфакс уште на самиот старт кога го објави истражувањето, објави дека во Владата биле ангажирани најмалку 40 лица на односи со јавност, кои се дел од овие 120 лица.

Во вториот дел од истражувањето повторно објавивме дека најмалку 40 лица биле ангажирани да работат на односи со јавност и комуникации во Владата. 13 лица се таму од претходната гарнитура, додека годинава во Владата во Секторот за односи со јавност дополнително биле ангажирани 25 лица, како и 1 портпарол, и 1 посебен советник за односи со јавност во кабинетот на Претседателот на Влада.

Уште пред неколку месеци кога јавноста прв пат слушна за формирањето на овој сектор во Владата, се појавија многу реакции за начинот на кој се ангажирани лицата кои работат во него, како и тоа според кои критериуми или услови се избрани. Вчера објавивме дел од биографиите на лицата, а во продолжение ги објавуваме и други биографии и имиња на вработените во овој сектор.

Во Секторот за комуникации на Владата работи Зоран Бојаровски кој долги години беше новинар и уредник во повеќе македонски медиуми. Тој според неговата биографија достапна на РесПублика, дваесеттина години е посветен во сферата на неформалното медиумско образование како тренер и предавач во Македонскиот институт за медиуми, на Високата школа за новинарство и односи со јавноста и во други граѓански организации. Автор е, и коавтор на десеттици истражувања и публикации од сферата на медиумите и граѓанскиот и медиумски активизам. Тој беше дел и од списанието „Форум Аналитика“ а последен текст на овој веб портал објавил во април годинава. Во Издавачкиот совет на Форум Аналитика, на нивниот веб сајт стои и името на Бојан Маричиќ, кој сега исто така е дел од Владата.

Во секторот работи и Демијан Хаџи Ангелковски кој според неговиот Фејсбук профил студирал политички науки на Универзитетот ФОН а претходно студирал на Медицинскиот факултет. Тој како волонтер помагаше за време на поплавите во Стајковци и во 2016-тата година за медиумите давал изјави претставен како студент по медицина.

Во овој сектор на Владата работи и Адријана Селмани која претходно работеше како програмски асистент во невладината организација Метаморфозис. Таа од 2006-та година започнала со студии во област на бизнис администрација на УЈИЕ во Тетово, а во 2010-та се префрлила на Државниот Тетовски Универзитет.

Во Метаморфозис била задолжена за проекти поврзани со напредни технологии, и била обучувач за градење мобилни и веб апликации и примена на нови технологии. Како дел од работните обврски во Метаморфозис извршувала работни задачи поврзани со односи со јавност. Била и асистент на академскиот програмски менаџер за Балканот во Мајкрософт, каде помагала во обучувањето на повеќе од 150 просветни работници како да ги користат напредните технологии за примена во образованието.

Во Секторот за комуникации работи и Влатко Васиљ, популарен фејсбукџија и твитерџија. Тој е познат во јавноста по своите статуси и твитови, а интересно е што тој е меѓу вработените во овој сектор кои се уште коментираат дневна политика на своите Фејсбук профили.

Според претходни негови интервјуа давани за медиумите, работел во агенцијата Елемент ПР и студирал на студии по новинарство. Тој до неодамна пишуваше и колумни за порталот на магазинот Фокус.

Во секторот работи уште една популарна личност на социјалните мрежи, Дарко Лешоски кој стана познат објавувајќи ја својата поезија на Фејсбук. Тој исто така издаде и две книги со поезија „Дете од лоша фамилија“ и „И тогаш Јаков му дари на Јосиф шарена облека“. Тој претходно работел на проект на УСАИД и како комуникациски службеник за невладината организација “Milieukontakt Macedonia”. Според претходни интервјуа давани за медиумите, посакувал да биде правник, но завршил на Општа и компаративна книжевност.

Во последниот период најмногу реакции во јавноста покрај информацијата дека е вработен во Владата, предизвика неговото поставување како нов претседател на Управниот одбор на Струшките вечери на поезијата. По бројни критики за неговото искуство и несоодветно поставување на оваа позиција, тој се повлече од одборот на СВП и сега работи само во Владата.

Во Секторот за комуникации работи и Викторија Николовска, која според нејзиниот Linkedin профил завршила факултет пред две години на УКИМ за енергетика и животна средина.

Таа била презентер на емисија за Радио МОФ, радиото кое е дел од организацијата Младински образовен форум МОФ. Од 2016 до 2017 била маркетинг координатор во компанијата Hyper Arrow, а повеќе години била дел од студентската невладина организација EESTEC LC Skopje. Сега работи на социјални медиуми и дигитална транспареност.

На ПР секторот во Владата му се приклучи и Светлана Сиљјаноска која според биографијата достапна на (gdfunityindiversity.org) има дипломирано правни студии и магистерски по меѓународно право на Универзитетот на ЈугоИсточна Европа, а нејзината магистерска се фокусира на женски права.

Според оваа биографија, таа била дел од високиот менаџмент на скопскиот аеродром каде работела на капитален проект при реконструкцијата на аеродромот. Таа била дел од невладиниот сектор во повеќе невладини организации, меѓу кои и ЏЕФ Македонија (Млади Европски Федералисти Македонија).

Меѓу имињата кои ги добивме дека се дел од овој сектор се и екс новинарката Весна Коваческа Трпчевска која претходно беше во СДСМ, Елена Ласло, основачот на порталот 10bez10.com, Божидар Барлакоски, преведувачката Луљета Клица, Ангела Велинова, Ѓорѓи Тасев, Христина Панева, фотографот Ангел Ангеловски, Мартин Маневски, Сашко Алексовски, камерманот Дамјан Чунихин, Нита Хаџихамза Гаши, Јане Качански, Братољуб Шурлановиќ и Елена Ѓорѓиевска.

Вчера ги објавивме и биографиите на портпаролот Миле Бошњаковски, посебниот советник за односи со јавност на премиерот, Марјан Забрчанец, Мила Стаменова и Илија Жупаноски.

Продолжува…

Кристина Озимец