Свет
ММФ: На Грција ѝ треба поголемо отпишување на долгот
На Грција, поради разорените економија и банки во изминатите две седмици, ѝ е потребно многу поголемо отпишување на долгот од она кое се подготвени да го разгледуваат нејзините партнери во еврозоната, покажува доверливото истражување на Меѓународниот монетарен фонд (ММФ).
Агенцијата Reuters на увид ја добила ажурираната студија за одржливоста на грчкиот долг која била испратена до владите на сите земји членки на еврозоната во понеделникот навечер, неколку часа откако Атина и нејзините 18 партнери од економската унија начелно се договорија за третата програма за странска финансиска помош со заемот во вредност од 86 милијарди евра За возврат, грчката влада треба да ги зголеми одредени даноци, да спроведе реформа на пензискиот систем и во приватизацијата, структурни реформи чија цел е намалување на јавната потрошувачка.
„Драматичното влошување на одржливоста на долгот укажува на потребата од значително поголемо отпишување од она коешто досега се разгледуваше, и коешто го предлагаше Европскиот механизам за стабилност (ESM)“, заклучиле во ММФ, цитира агенцијата.
Европските земји би морале на Грција да ѝ одобрат 30-годишен почек за сервисирање на сите европски договори, вклучително и на новите кредити, и многу драматично да ги продолжат роковите на доспевањата на ратите, сугерираат натаму од ММФ во споменатиот документ. Алтернативните опции, според документот, вклучуваат експлицитни годишни финансиски трансфери во грчкиот буџет, односно моментални значителни отпишувања на кредитите одобрени на Атина/
Одвоено неименуван функционер од Европскиот механизам за стабилност (ESM) во вторникот изјавил дека придонесот на овој фонд со тригодишната програма за финансирање за Грција ќе изнесува меѓу 40 и 50 милијарди евра.
Во финансирањето на оваа програма, според Reuters, би требало да учествува и Меѓународниот монетарен фонд (ММФ), на кој му преостануваат 16 милијарди евра од програмата на истечената програма во март годинава, а и Грција на крајот од тригодишниот период би требала да може сама да набавува пари на финансиските пазари.
Во анализата на грчкиот долг што Reuters ја направи кон крајот на јуни се покажа дека тој изнесува 242,8 милијарди евра, и ги обединува двата пакета од финансиската помош за Грција, коишто ги одобрија земјите членки на еврозоната и Меѓународниот монетарен фонд од 2010 година, како и грчките државни обврзници кои ги држат Европската централна банка (ЕЦБ) и централните банки на државите од еврозоната. Приватните инвеститори држат 38,7 милијарди евра во грчки државни обврзници, по големото отпишување и замена на долгот од 2012 година, со што е намален нивниот удел во грчкиот долг за 107 милијарди евра, а вредноста на долгот во рацете на приватните вложувачи за проценетите 75 отсто.
Меѓу најголемите економии во еврозоната, далеку најголем кредитор на Грција е Германија со 42,98 милијарди евра, Италија со 37,76 милијарди и Шпанија со сума од 25,1 милијарди евра. Тоа е прилог на придонесите за заемите од ММФ, сразмерни со квотите коишто тие земји ги имаат во овој глобален кредитор./крај/мф/сн
Извор: Reuters
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
РЕ-Ново
Жена лажирала дури 17 бремености во текот на 24 години, добила 100.000 евра
Италијанка завршила во затвор бидејќи лажирала дури 17 бремености во текот на 24 години за да добие речиси 100.000 евра породилни надоместоци.
Барбара Џоел (50) излажала дека родила пет деца и направила уште 12 спонтани абортуси, а за да успее измамата, носела перници под кошулата за да изгледа како да има труднички стомак, пренесува „Јутарњи лист“.
Го лажирала и начинот на кој оди за да изгледа како да носи дете, а со тоа акумулирала значителен број слободни денови од работа. Џоел ги отфрли сите обвинувања и продолжува да тврди дека нејзините пет деца навистина постојат и дека сите нејзини бремености, вклучително и спонтани абортуси, биле реални.
Џоел тврдеше дека го родила своето последно дете во декември, но полицајците рекоа дека ја набљудувале претходните девет месеци и дека целата бременост била лажна. Таа е обвинета и за кражба на изводи од матичната книга на родените и други документи од клиника во Рим, пренесува италијанскиот весник „Ил Матино“.
Со ваков вид измама се занимава од 2000 година и на тој начин обезбедила бенефиции од над 94.000 евра. Дејвид Пичинато, 55-годишниот партнер на Џоел, наводно ѝ кажал на полицијата сè, а за време на испрашувањето рекол дека „добро знаел“ дека таа никогаш не била бремена.
Се верува дека сведочел против Барбара за да добие помала казна, иако и самиот бил обвинет за помагање во нејзината измама.
„Направила лажни сертификати и ги донела“, наводно им рекол Пичинато на истражителите. „Тоа го знам од 2012 година, односно од почетокот на нашата врска. Џоел беше осудена на една година и шест месеци затвор, но не се појави на изрекувањето на пресудата. Нејзиниот адвокат наводно покажал две потврди, кои потврдуваат дека е болна.
Економија
Еврото го слави својот 25-ти роденден: Треба да се воведе во дигиталната ера
Неопходно е еврото да се внесе во дигиталната ера и да се изгради унија на пазарот на капитал и посилна банкарска унија, најавија европските лидери во пресрет на 25-годишнината на европската валута.
Еврото стапи на сила пред 25 години, на 1 јануари 1999 година, а денес е валута на дваесет земји со 350 милиони жители, од кои Хрватска стана последна членка на почетокот на оваа година.
Претседателот на Еврогрупата Пашал Донохое, претседателката на Европската централна банка (ЕЦБ) Кристин Лагард, претседателката на Европскиот парламент Роберта Мецола, претседателот на Европскиот совет Шарл Мишел и претседателката на Европската комисија Урсула фон дер Лајен ја одбележаа таа годишнина со заедничка напис објавен на веб-страницата на ЕЦБ.
„Заедничката валута го олесни животот“
Во написот објавен вчера, тие пишуваат дека заедничката валута ѝ даде на Европската унија „едноставност, стабилност и суверенитет“ и го олесни животот на европските граѓани кои сега можат лесно да ги споредуваат цените, трговијата и патувањето.
Со текот на годините, еврото се соочуваше со големи предизвици, вклучително и прашања за неговото опстанок, пишуваат европските лидери, нагласувајќи дека „секогаш ќе се најдат вистинските одговори“, како што е усогласениот систем на супервизија на банките по големата криза во 2008 година.
„Денес поддршката за заедничката валута меѓу граѓаните на еврозоната се приближува до рекордни нивоа“, посочија тие, предупредувајќи дека работата „не е завршена“ бидејќи Европа се соочува со нови предизвици со кои поединечни држави не можат да се справат сами.
Унијата се соочува со растечки геополитички тензии, првенствено руската „илегална војна“ против Украина, забрзана климатска криза и невидени предизвици за европската конкурентност од другите делови на светот.
Затоа, прашањата како одбраната, зелената и дигиталната транзиција ќе бидат клучни во иднина. Само за декарбонизација на економиите ќе бидат потребни 620 милијарди евра годишно до 2030 година, предупредија тие.
ЕУ мора да изгради вистинска унија на пазарите на капитал за да ги „мобилизира приватните финансии“, да ја зајакне банкарската унија и да ги реформира фискалните правила. Еврото треба да влезе во „дигиталната ера“ и мора да се подготват темелите за потенцијално „дигитално евро“ кое ќе биде комплементарно на готовината.
Лидерите предупредуваат дека „со неколку земји кои моментално се во процес на пристапување во ЕУ“, алијансата мора да го задржи капацитетот да „дејствува решително“.
„Проширувањето и продлабочувањето меѓусебно не се исклучуваат. Но, проширувањето може да бара промени во организацијата на ЕУ“, се заклучува во написот.
Свет
Убиени 41 член од исто семејство во Газа
Министерството за здравство во Појасот Газа соопшти дека 41 член на исто семејство загинале во израелското бомбардирање на нивната куќа во централниот дел на градот Газа.
Министерството објави список со имињата на 41 член на семејството Малка, од кои сите загинаа во нападот што се случи во зори во населбата Зајтун во Појасот Газа, пренесува AFP.
На ова следуваа реакциите на корисниците на социјалните мрежи на веста за смртта на толку голем број членови на исто семејство, кои споделија список со имињата на загинатите, како што наведоа.
Тие ги осудија злосторствата на окупацијата со која беа истребени цели семејства и избришани од матичната евиденција, наведуваат некои од нив во своите објави.