Скопје
Врачени наградите „13 ноември“ на Град Скопје
Во петок вечер, во Македонската опера и балет, се одржа свеченоста по повод одбележување на Денот на ослободување на Скопје, 13 Ноември.
Во рамки на свеченоста, градоначалникот на Град Скопје, Коце Трајановски, на добитниците на признанието „13 Ноември“ на Град Скопје, за 2015 година, им ги врачи наградите и им се обрати на присутните гости.
„И по 71 година од ослободувањето на Скопје, 13 Ноември не го губи значењето како најзначаен датум во поновата историја на главниот град на Република Македонија.13 Ноември сé уште е симбол на слободата, мирот и достоинството на граѓаните од сите националности, но и почеток на забрзан развој, на креативен подем, но и на засилена урбанизација. Иако, има уште многу да се изгради, уреди и дополни како урбани содржини, сметам дека денес скопјани се горди на својот град и на условите за заедничко живеење. Ние не запираме на постигнатото, затоа што на сите нивоа на власта постои очигледна решеност да се искористат сите постоечки ресурси за достигнување на идеалот за модерно, современо и европско Скопје, а пред сé да се создаде град соодветен за брзиот начин на живот на 21-от век. Историјата не може да се врати, но секако и денес вреди да се потсетиме на херојските дела на генерал Михајло Апостолски, на Цветан Димов, на Кузман Јосифовски – Питу, на Панче Неделковски и на сите други што ги посветиле животите за слободниот просперитет на нашиот град. Скопје бил и останува политички и културен центар на нашата татковина и затоа сметам дека ова е вистинска прилика да им се оддаде целосна почит на плејадата борци и преродбеници од разни периоди на историјата кои или постојано дејствувале во Скопје или поминале значителен дел од својот живот во нашиот град. Затоа што делото на ослободителите не е изолиран чин на ангажман предизвикан од актуелните настани во Втората светска војна, туку континуитет на вековна организираност во разни форми на борба за самостоен развој. Секоја активност бара да се направи најдоброто што може и затоа Градот Скопје денес е безрезервно посветен на реализирањето на програмите и проектите. Оваа градска власт нема избор освен да го задржи ова ниво на ангажираност и во иднина. Наша обврска е на идните генерации да им оставиме град во чиј лик ќе препознаваат висок степен на ангажман, односно да им ја пренесеме нашата енергија на посветеност кон потребите на граѓаните, како што тоа го направија претходните генерации неимари“, рече градоначалникот Трајановски. Годинешни добитници на Наградата „13 Ноември“ на Град Скопје за 2014 година се: од областа на науката и публицистиката Димитар Мирчев и Беким Кадриу, од областа на образованието и воспитанието Баки Бакиу, од областа на културата Џабир Ахмети и Братислав Димитров, од областа на уметноста и архитектурата Јелена Жугиќ и Јован Стефановски –Жан, од областа на здравствената заштита и хуманитарната активност Поликсена Илиоска и Гордана Петрушевска, од областа на спортот Стојна Вангеловска и Игор Стефановски и за ученици и студенти Марко Младеновски.
Во името на добитниците, пред присутните се обрати проф. д-р Димитар Мирчев, кој се заблагодари за ова високо признание и на присутните им го честита 13 Ноември, Денот на ослободување на Скопје.
„Скопје како главен град на Република Македонија во изминативе 71 година стана центарот на творештвото и развојот, каде се остварени многу дела во многу сфери: културата, спортот, уметноста и науката. Ние сме горди што имавме можност да дадеме мал придонес во овој развој. Денес, Скопје претставува една модерна европска метропола“, изјави Мирчев.
Во рамки на свеченоста по повод Денот на ослободувањето на Скопје, во фоајето на МОБ, беше отворена и изложба на ликовните дела, што беа насликани на Меѓународната ликовна колонија „Скопје 2015“, а по доделувањето на наградите, во чест на добитниците и по повод празникот на Скопје, се одржа концерт на првенците на Македонската опера и балет./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Посебен режим на сообраќај в недела во Скопје
СВР Скопје ги известува граѓаните на Скопје дека на 12.5.2024 (недела) од 8.30 до 10.30 часот, поради одржување улична трка, од страна на Единицата за безбедност на патниот сообраќај при СВР Скопје ќе бидат преземени мерки за посебен режим на сообраќај, и тоа на сообраќајниците по кои ќе се движат натпреварувачите, кои имаат стартна позиција на булеварот Илинден – локација Фонтана, ќе се движат по булеварот Илинден до крстосницата со улицата Никола Парапунов, потоа до крстосницата со булеварот Партизански одреди, десно (кон населбата Ѓорче Петров) до мостот „Влајко“, каде што вртат полукружно и назад по истиот коловоз до крстосницата со улицата Љубљанска, каде што вртат полукружно и по истиот коловоз се враќаат назад на улицата Никола Парапунов и по булеварот Илинден до целта на локација Фонтана на булеварот Илинден.
СВР Скопје апелира до граѓаните да ги почитуваат наредбите што ги издаваат полициските службеници на сообраќајниците на кои ќе се одвива настанот.
Скопје
Герасимовски: Лицата со попреченост ќе може да користат бесплатен превоз до болница, издвоивме 500.000 денари за оваа намена
Градоначалникот на општина Центар Горан Герасимовски ги повикува граѓаните со попреченост да ја користат услугата за бесплатен транспорт до здравствените установи за што општината има потпишано Меморандум за соработка со Црвен крст на Република Северна Македонија.
Станува збор за бесплатен превоз до здравствените установи со наменски возила на Црвениот Крст за корисници над 18 години, кои користат ортопедско помагало (инвалидски колички, дубаци или одалки), а живеат на територија на Општина Центар, како и лица над 18 години кои не користат ортопедско помагало, но поради болест се во лежечка состојба (неподвижни). За оваа услуга општината издвои 500.000 денари од сопствениот буџет со цел да им го олесни пристапот до болниците и лекарите на граѓаните кои имаат најголема потреба за тоа. Оваа услуга само за еден месец ја искористиле 42 граѓани. Градоначалникот на општина Центар Горан Герасимовски упатува апел до граѓаните кои ги исполнуваат условите да го закажат својот бесплатен превоз до потребната болница.
„Бесплатниот превоз до болниците верувам дека е големо олеснување за семејствата и корисниците кои не се во можност често да ги користат здравствените услуги. Ова е исклучително важна мерка особено за лицата кои немаат помагала или не се во состојба да се движат. Затоа доколку корисникот е подвижен превозот ќе биде реализиран со мало наменско возило на Црвениот крст, а доколку тој е неподвижен превозот ќе се спроведе со специјално наменско возило. Граѓаните кои имаат потреба ги повикувам да ја користат оваа услуга. Бесплатниот транспорт граѓаните мора да го закажат минимум 24 часа однапред јавувајќи се на телефонскиот број 02/15330, во контакт центарот на ЦКРСМ или секој работен ден од 6:00 до 0:00 часот. Со остварување на еден телефонски повик може да се закаже превоз за еден корисник, до една конкретна дестинација од 8:00 до 16:00 часот. И еден корисник бесплатниот превоз во еден правец може да го користи максимум 10 пати во текот на 1 година, но доколку имаат потреба од повеќе истиот може да го платат согласно ценовникот на Црвен крст“, потсетува градоначалникот Герасимовски.
Герасимовски исто така потсетува и на другите проекти кои се реализираат во општината како едукативните работилници и обуки за давање прва помош со кои воспитувачите, негувателите, наставниците, осмооделенците и другиот стручен кадар во детските градинки и училиштата се здобија со знаења и вештини за соодветно и навремено постапување во ургентни ситуации, односно давање на прва помош, пред се, на децата. Како и едукативните работилници преку кои децата од возрасните групи од сите градинки и клонови се здобиваат со знаења во врска со здравите навики и одржувањето на личната хигиена како и многуте реализирани крводарителски акции за обезбедување крвни компоненти за потребите на здравствениот систем.
Општина Центар ќе продолжи да ги негува проектите со Црвениот Крст кои имаат за цел да им помогнат на граѓаните и го олеснат нивното секојдневие.
Скопје
Скопје да се врати на скопјани, а Данела Арсовска да поднесе оставка, вели Стефковски
Во објава на својата официјална страница на „Фејсбук“, градоначалникот на општина Гази Баба, Бобан Стефковски, се осврна на изборните резултати и побара оставка од градоначалничката на град Скопје, Данела Арсовска, бидејќи, како што вели Стефковски, тоа е волјата на скопјани.
„Време е Скопје да се врати на скопјани, а Данела Арсовска да поднесе оставка! Кредибилитетот и легитимитетот на секој вршител на јавна функција, која се избира на непосредни избори, извира и им припаѓа директно на граѓаните, без разлика дали се работи за претседател на држава, пратеник, градоначалник или советник.
Бројките велат дека во 2021 година Данела Арсовска е избрана за градоначалник на град Скопје со гласовите на 118.545 скопјани, а на вчерашните избори Данела Арсовска преку својата партија во општините Гази Баба, Ѓорче Петров, Бутел, Чаир, Кисела Вода, Аеродром, Центар, Сарај и Шуто Оризари освои вкупно 2.584 гласа.
По ваквиот резултат, јасно е дека Данела Арсовска го загуби кредибилитетот да продолжи да го води градот Скопје. Скопје му припаѓа на скопјани, а не на Данела Арсовска.
Скопјани вчера ѝ порачаа на Арсовска дека е време да си замине! Затоа ја повикувам Данела Арсовска да поднесе оставка од функцијата градоначалник на град Скопје бидејќи тоа е волјата на скопјани. Време е Скопје да се врати на скопјани!“, пишува Стефковски.