Европа
Киев не воведува воена состојба, Русија негира учество а активисти тврдат дека 100 руски војници загинале во Украина
Украина нема да воведе воена состојба во земјата поради напредувањето на бунтовниците на истокот од земјата но ќе ја врати обврската за редовно служење на воениот рок, Москва негира дека воено учествуваат во судирите во Украина, а опозициски активисти во Русија тврдат дека на боиштето во соседната земја загинале стотина руски војници.
Руското министерство за одбрана во четвртокот навечер негираше какво и да е присуство на руски единици во источна Украина. „Обвинувањата немаат никаква врска со вистината. Ги примивме на знаење тие лажни информации и мораме да ги разочараме нивните автори преку Атлантикот и некои коишто ги поддржуваат во Русија а станува збор за единствен фронт во клеветење на руското министерство за одбрана“, изјави портпаролот на министерството, генералот Игор Конашенков, пренесува агенцијата Интерфакс. Русија одлучно ги отфрла тврдењата на Киев и на Западот дека испраќа единици кои ги водат операциите на проруските бунтовници во источна Украина. Киев во понеделникот објави дека уапсил на своја територија десет руски падобранци, кои како и нивното министерство на прес-конференција изјавија дека при патролирање случајно заталкале на украинска територија. Премиерот на самопрогласената Народна Република Донецк, Александр Захарченко, во четвртокот во интервју за руските телевизии и за Reuters потврди дека во редовите на бунтовниците во Донбас се борат околу три до четири илјади руски доброволци, меѓу кои има и војници кои за време на одморот или отсуството доаѓаат да се борат на страна на проруските бунтовници, но негираше помош и учество на организирани руски единици и воена помош од Русија.Опозициски активисти известија во четвртокот дека во северна Русија во тајност биле погребани двајца падобранци кои според наводно тврдење на нивните семејства загинале во Украина. Двајца членови на Советот за човекови права на рускиот претседател објавија дека повеќе од сто руски војници биле убиени во август во еден напад на украинската армија додека помагале на проруските бунтовници, како и дека руските власти и спречиле протестот на сопругите на војниците северно од Москва.Околу 300 луѓе биле ранети на 13-ти август во близина на гратчето Снижне во областа на Донецк, кога конвој со камиони кој превезувал муниција бил погоден од украински ракетен систем „Град“, рекле Ела Полјакова и Сергеј Кривенко од Рускиот претседателски совет за човекови права, пренесува Reuters. „Конвојот руски војници бил нападнат со ракети ‘Град’ и повеќе од 100 луѓе се убиени. Сето тоа се случило во градот Снижни во областа Донецк“, рекол Кривенко. И Полјакова добила податоци за повеќе од сто убиени руски војници во тој напад.AFP јавува дека руските власти забраниле протест на жените на руски војници кои пред воена база на 331-та регимента на 98-та воздушна дивизија во Кострома, 330 километри северно од Москва, барале објаснување да се видат со сопрузите. „Единствено се согласуваат да ни кажат дека тие не се во Русија“, рекла за AFP Валерија Соколова, која имала сопруг во таа регимента. Според неа, на почетокот од седмицата 15 војници се вратени во Русија ранети, а други во ковчези, пренесува агенцијата.Претседателката на Одборот на мајките на руските војници Валентина Мелникова рекла за опозициската телевизија Дожд дека речиси 15 илјади руски војници се борат во Украина со проруските бунтовници.Москва повторно во четвртокот навечер ги отфрли овие тврдења на Киев и Западот дека нејзини војници се борат во источна Украина. „Тие информации ги проверуваат надлежните власти“, изјави портпаролот на Кремљ, Дмитриј Песков за агенцијата Итар-Тасс.Во меѓувреме, на повеќечасовната седница на Советот за национална безбедност и одбрана на Украина посветена на напредувањето на проруските бунтовници кој југоисточните области заземајќи повеќе градови и избивајќи на брегот на Азовското Море, било решено дека е несоодветно да се воведе воена состојба во земјата поради ситуацијата во источна Украина, изјавил за РИА Новости, портпаролот на Советот и на воената операција, Андриј Лисенко. „Прашањето беше покренато на состанокот, но учесниците дојдоа до заклучокот дека прогласувањето воена состојба“, рекол портпаролот.Меѓутоа, Советот донеле одлука дека уште од оваа есен ќе го воведе задолжителното отслужување на воениот рок, но регрутите нема да служат војска во областите во кои се водат борби со бунтовниците, пренесе украинската агенција Интерфакс. Меѓутоа, засега не се знае колку долго ќе трае воениот рок. Служењето воен рок беше задолжително за сите Украина повозрасни од 18 година, но поранешниот претседател Виктор Јанукович, кој го собори сегашната прозападна власт со безредијата во Киев во февруари, ја прекина таа практика и воведе професионална војска. Полскиот министер за надворешни работи, Радослав Сикорски, кој беше еден од претставниците на ЕУ потписник на договорот меѓу Јанукович и тогашната опозиција за спречување на крвопролевањата во Киев во кои загинаа сто луѓе кој веќе следниот ден беше изигран од страна на опозицијата, рече дека руската акција во источна Украина е „агресија“ која ја создала најголемата безбедносна криза во Европа последните децении и повика на акција, „Најдобро е ако акцијата ја преземе џелата меѓународна заедница“, изјави Сикорски кој смета дека акциите мора да бидат „одлучни, но разборити“, бидејќи последиците би можеле да бидат „несогледливи“.Амбасадорите на 28-те земји членки на НАТО и на Украина, во рамките на Советот Украина – НАТО, ќе одржат во петокот итна средба на којашто ќе се разговара за украинската криза, потврди неименуван функционер на Алијансата. Состанокот ќе се одржи на барање на Украина која ја обвинува Русија дека испраќа војници во југоисточниот дел од земјата да се борат на страна на проруските бунтовници./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Двегодишната Софи родителите ја капеле во топла вода и ѝ предизвикале изгореници, од страв не повикале помош: телото го пронашла нејзината баба
Бабата на двегодишното девојче Софија, кое во понеделникот беше пронајдено починато во нејзиниот стан, за германските медиуми раскажа како се случила трагедијата.
Кристин (63) живее во станот над оној во кој живеела Софија со родителите и братот и сестрата.
„Тој ден изгледаше нормално. Ја хранеше својата кукла, си играше со неа, а потоа наеднаш стана многу бледа. Престана да се движи”, ја почнува својата исповед бабата Кристин.
Таа веднаш повикала брза помош, но кога лекарите пристигнале во станот, не успеале да ја спасат Софија.
Иако резултатите од обдукцијата не се целосни, се верува дека девојчето починало од изгорениците што ги добило.
„Сакав да ја истуширам. Додека ја бањав, таа рече дека водата е многу ладна. Кога ја зголемив топлината, врела вода се истури по нејзиниот грб. Јас сум виновен“, рекол таткото Андре.
Мајката вели дека девојчето не плачело по туширањето.
„Како може дете да издржи толку болка, не ни врескаше. Тие изгореници не изгледаа страшно, повеќе личеа на изгореници од сонце“, вели мајка ѝ Надин.
Родителите одбиле да повикаат брза помош бидејќи се плашеле дека социјалните служби ќе им ги однесат децата.
Сличен инцидент се случил и минатата година кога таткото ја спуштил малата Софи во када. Притоа девојчето скршило ребро и бутна коска.
„Поради тоа и поради моите проблеми со дрогата, шест недели ни ги одзедоа децата. Сакавме да го спречиме тоа овој пат“, вели расплаканиот татко.
Полицијата интензивно го истражува овој случај, а грижата за нивните деца ја презеде Центарот за социјална работа.
Телото на девојчето е испратено на обдукција.
Европа
ЕУ и НАТО бараат од грузиската влада да го повлече спорниот „руски закон“
Европската Унија и НАТО денеска ја предупредија Грузија дека со усвојувањето на законот за странски агенти, колоквијално наречен руски закон, се оддалечува од своите евро-атлантски аспирации и ја повикаа владата да го почитува правото на мирни протести.
„И покрај големите протести и недвосмислените повици на меѓународната заедница, владејачкото мнозинство го усвои законот за транспарентност на странски влијанија. Европската Унија јасно и постојано кажува дека духот и содржината на тој закон не се во согласност со основните норми и вредности на ЕУ“, се вели во изјавата на високиот претставник на ЕУ за надворешна и безбедносна политика, Жозеп Борел.
Грузискиот парламент усвои закон со кој невладините организации финансирани од странство се назначуваат како странски агенти.
Европската Унија беше критикувана за нејзината задоцнета реакција на настаните во Грузија, која доби кандидатски статус во декември минатата година. Првата идеја беше Борел да издаде изјава во име на сите 27 земји членки, но тоа пропадна поради несогласувањата меѓу Унгарија и Словачка. По тоа, се потроши многу време за да се договори изјава меѓу Борел и комесарот за проширување, Оливер Вархељ, унгарски член на Комисијата, чија земја е најголемиот поддржувач на Русија во ЕУ.
Законот за странско влијание предизвика големо незадоволство во Грузија и донесе многу демонстранти на улиците. И покрај тоа, проруската владејачка партија Грузиски сон упорно го носеше законот. Со политиката на владејачкото мнозинство не се согласува и проевропската грузиска претседателка, Саломе Зурабичвили.
„Усвојувањето на овој закон има негативно влијание врз напредокот на Грузија на патот кон ЕУ. Изборот на патот напред е во рацете на Грузија. Ги повикуваме грузиските власти да го повлечат законот и да ја задржат својата посветеност на патот кон ЕУ“, се вели во изјавата на Борел.
На донесувањето на законот реагира и НАТО. „Одлуката на грузиската влада да го донесе законот за странски агенти е чекор во погрешна насока и ја оддалечува од европските и евро-атлантските интеграции. Ја повикуваме Грузија да го промени курсот и да го почитува правото на мирни протести“, изјави портпаролката на НАТО, Фарах Даклала.
Европа
Ердоган: На Нетанјаху му претстои судбина слична како на Хитлер
Претседателот на Република Турција, Реџеп Таип Ердоган, изјави дека израелскиот премиер Бенјамин Нетанјаху, кого го нарече касапот на Газа, го чека судбина слична со онаа на Хитлер.
Ердоган денеска во турскиот парламент им се обрати на членовите на пратеничката група на Партијата на правдата и развојот. За време на своето обраќање тој направи паралела меѓу холокаустот, геноцидот во Сребреница и израелските масакри што тие ги вршат во Газа повеќе од половина година.
„Запомнете, Хитлер не беше сам кога го изврши холокаустот. Многу земји во Европа го поддржаа Хитлер. Додека Хитлер вршеше безмилосни масакри и геноцид, тој се чувствуваше многу силен, моќен и непобедлив. Што се случи? Се застрела во главата, а неговото изгорено тело беше пронајдено во неговиот бункер, кој беше во урнатини, како Германија“, рече Ердоган.
Тој нагласи дека Европа и многу земји исто така застанаа зад водачите на босанските Срби, Радован Караџиќ и Ратко Младиќ, кога извршија масакри во Босна.
„Додека тие вршеа геноцид во Сребреница, која наводно беше под заштита на Обединетите нации, моќните земји во светот застанаа зад нив. Убија 8.372 наши босански браќа (маченици) пред очите на светот. Не ни помислуваа дека еден ден ќе треба да платат за тоа. И што се случи? Тие беа фатени, изведени пред суд и оние некогаш моќните политичари и геноцидни генерали беа повикани на одговорност. Сега чекаат смрт во затвор. „Не заборавајте, касапот на Газа, Нетанјаху, и неговите соучесници во геноцидот во Газа, порано или подоцна го чека истата судбина“, истакна Ердоган.
Ердоган потсети дека Палестинците денеска ја слават 76-годишнината од Накба и додаде:
„Ја чувствуваме тагата на Накба исто колку и Палестинците, кои порано или подоцна ќе се вратат во своите домови.
„Нетанјаху и соучесниците во геноцидот ќе одговараат за секоја пролеана капка крв. Ќе извршиме притисок врз сторителите на геноцидот да одговараат пред законот“, посочи Ердоган и додаде:
„Немојте да мислите дека Израел ќе застане во Газа. Ако оваа неконтролирачка и терористичка држава не биде запрена, таа порано или подоцна ќе се сврти кон Анадолија со илузијата на ветената земја“.
Зборувајќи за активностите за усвојувањето на новиот Устав во земјата, Ердоган рече: „Сметаме дека е корисно да се прекинат консултативните контакти и да се преземат конкретни чекори, без брзање, но и без преголемо одлагање“.