Европа
Полицијата интензивно трага по третиот напаѓач од аеродромот во Брисел
Белгискиот сојузен обвинител Фредерик ван Лев, потврди во вторникот вечерта дека активно се трага по лицето кое е снимено утрото пред терористичките напади на меѓународниот аеродром во Брисел, како и дека во интерес на истрагата не сака да зборува за иследувањата кои интензивно се вршат.
Ван Леув изјави дека двајцата од тројцата мажи кои се гледаат на снимките од безбедносните камери се сметаат за бомбашите самоубијци, додека третиот млад човек во бела јакна и со црна шапка на главата е во бегство и по него интензивно се трага.
На снимката е гледаат тројца мажи кои туркаат колички кои се користат на аеродромите за багаж. Двајцата мажи во дно имаат на левата рака ракавици и се шпекулира дека во тие ракавици се детонаторите со кои ги активирале самоубиствени појаси со експлозив кои ги носеле на себе.
Белгискиот сојузен обвинител Фредерик ван Лев изјави дека во нападите на аеродромот Завентем и метро станицата Малнек има повеќе мртви и ранети, но не сака да прецизира бројки. Според привремените податоци во двата напада во Брисел се убиени 34 луѓе, а околу 230 се ранети, од кои десетина се во критична состојба.
Ван Лев истакна дека во интерес на истрагата нема да објавува поединости. Кога станува збор за преземањето на одговорноста за нападите од страна на Исламската држава, белгискиот обвинител рече дека тоа уште треба да се провери и дека сé уште не утврдена поврзаност меѓу бриселските напади и оние од Париз ланскиот 13-ти ноември кога беа убиени 130 луѓе. Истакна, дека во моментов се вршат полициски претреси на повеќе локации низ Белгија.
Претходно белгиската агенција Belga од неименувани полициски извори добила потврда дека полицијата на аеродромот Завентем пронашла отфрлен појас со експлозив кој го уништиле во контролирана експлозија. Бил пронајден наводно и автомат „калашников“./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Британска компанија ги тужи „Фајзер“ и „Бионтек“: Ја украдоа нашата технологија за вакцина против Ковид
Британската фармацевтска компанија GlaxoSmithKline (GSK) денеска поднесе тужба пред федералниот суд во Делавер против американскиот Pfizer и германскиот BioNTech, тврдејќи дека тие ги прекршиле нејзините патенти за технологијата на гласник РНК (mRNA) во нивните вакцини против Ковид-19.
Вакцините Comirnaty на Pfizer и BioNTech ги прекршуваат иновациите на GSK заштитени со патент во mRNA вакцините, развиени „повеќе од десет години пред“ пандемијата на ковид-19, се вели во тужбата.
Патентите ја покриваат технологијата за пренос на нестабилна гласничка РНК во човечки клетки, која научниците почнаа да ја развиваат во 2008 година, а GSK стана сопственик кога го купи бизнисот со вакцини на Novartis во 2015 година, се додава.
Британската компанија бара парична отштета од Pfizer и BioNTech, вклучително и такси за патент, без да наведе износ.
Портпаролката на Pfizer во соопштението нагласи дека компанијата е „сигурна во својата позиција во однос на интелектуалната сопственост поврзана со Comirnaty“ и дека има намера „енергично да се брани“ од тврдењата на GSK. Портпаролот на BioNTech одби да ја коментира тужбата.
Портпаролот на GSK рече дека компанијата верува дека нејзините патенти „ја обезбедуваат основната технологија што се користи во mRNA вакцините на Pfizer и BioNTech против ковид-19“. GSK е „подготвен да ги лиценцира овие патенти под комерцијално разумни услови за да обезбеди пристап“ до вакцините.
Европа
(Видео) 19-годишна девојка во Украина се обидела да го продаде синот, барала 23.500 евра
Во украинскиот град Днипро, 19-годишна девојка се обидела да го продаде сопствениот двегодишен син, соопшти локалната полиција, пренесоа украинските медиуми.
Девојката наводно побарала еден милион гривни, што е околу 23.500 евра за своето дете. 19-годишната девојка наводно му го понудила детето на својот познаник и договорила средба со него. Во вторникот полицијата приведе маж додека носел пари на договорена локација.
Девојката наводно рекла дека не сака да се грижи за својот син, па решила да го продаде. Со парите што ги добила планирала да отвори сопствен бизнис.
Детето е земено во полиција и предадено на надлежните органи. Против неговата мајка е подигнато обвинение за трговија со луѓе.
Европа
Уапсени тројца мажи во истрагата за бруталното убиство на Хрват во Даблин
Уапсени се тројца мажи осомничени за убиството на 31-годишен Хрват, Јосип Штрок во Даблин минатиот месец, пишуваат ирските медиуми.
Тие се осомничени дека ги претепале Штрок, кој живеел и работел во Даблин, и неговиот пријател. Штрок почина од повредите на 3 април.
Неговиот пријател за хрватските медиуми изјавил дека биле во продавница и планирале да се дружат, кога група луѓе им кажала да почнат да зборуваат англиски.
„Немате почит кон нашата земја, ова е Ирска…“, изјави тој за Јутарњи. Тие влегле во автобусот и не забележале дека напаѓачите ги следат и биле нападнати одзади.
„Прво ме удрија со нешто, не знам дали беше шипка или палка. Ги прашав полицајците за деталите што ги виделе на видеото, а кои наводно ги имаат“, рече тој, додавајќи дека следното нешто се сеќава е кога се разбудил во болница.