(Аудио) Палитов испрати демант за лобирањето за Бугарите во „Фени“, „Макфакс“ во целост ја објавува снимката од состанокот

(Аудио) Палитов испрати демант за лобирањето за Бугарите во „Фени“, „Макфакс“ во целост ја објавува снимката од состанокот

Претседателот на Синдикатот на „Фени“, Ѓоре Палитов, вчера не одговараше на телефонските повици и пораките од „Макфакс“, но денес испрати демант на текстот со наслов „Заговор за ’Фени’, излезе аудиоснимка од лобирањето на претседателот на Синдикатот за Бугарите“, објавен вчера.

„По повод вчерашните обвинувања кон мене како претседател на синдикалната организација при ’Фени индустри’ АД од страна на медиумскиот портал makfax.com.mk, упатувам јавен демант. Имено, јас, Ѓорe Палитов, ја имав таа несреќа да бидам претседател на синдикалната организација на ’Фени индустри’ во можеби најтешкиот период во последните 15 години, но во едно сум сигурен, а тоа е дека ја извршувам оваа функција максимално транспарентно, со преголема енергија и само со една цел – враќање на ’Фени’ на правите патеки, односно помагање за негово рестартирање. Во согласност со ова, како и за моите колеги вработени во ’Фени индустри’ АД, јас како борец за општото добро сум во постојан контакт и со другите загрозени субјекти од овој стечај, а тука спаѓаат, секако, и моите сограѓани – транспортерите. Точно е дека јас бев присутен на тој состанок по нивно барање и разговаравме за моментните проблеми и евентуалните последици за сите нас. Ниту имам лична корист некого да фаворизирам ниту имам желба да критикувам. Имам улога на лидер на вработените и тоа го правам. Ние само сакаме ’Фени индустри’ да добие сопственици што го сакаат најдоброто за фабриката и кои се подготвени да инвестираат во неа. А вие што се служите со закани и уцени, ве молам, да се појавите јавно и да не се криете затоа што ви следува и кривична пријава“, стои во демантот на Палитов.

На крајот од демантот Палитов апелира до надлежните дека вработените во „Фени“ не се за издавање на фабриката под наем затоа што со тоа немало никаква иднина за вработените, а закупецот можел да си оди во секој момент затоа што не платил ниту денар за фабриката ниту, пак, инвестирал во неа. Тој тврди дека нема да дозволат некој да прави краткорочни профити без да инвестира и без да се знае судбината на сите вработени и на побарувањата на сите доверители.

„Стечајот треба да заврши во најкраток рок, како и што ни беше ветено независно дали Апелација ќе ја врати фабриката во претстечајна постапка или преку реорганизација“, вели Палитов во демантот.

Во демантот тој не ги спомнува обвинувањата од вработените во „Фени“ објавени на „Макфакс“. Во текстот стои дека вработените во „Фени“ со аудиоснимка ги потврдуваат неколкумесечните тврдења дека претседателот на Синдикатот е продолжена рака на раководството и лобира за бугарската компанија „Енекод“. Тие во „Макфакс“ испратија тонски запис од состанок на Палитов со транспортерите, на кој, како што тврдат, Палитов ги убедува дека најдобро решение за фабриката, и покрај отворената стечајна постапка во велешкиот суд, е бугарската компанија. Снимката е полна со навреди, обвинувања, пцости, а вработените посочуваат дека претседателот на Синдикатот, Ѓоре Палитов, имал главен збор и ги нарекувал банките багра, кои не ги интересираат вработените во „Фени“, швајцарската компанија заинтересирана за фабриката ја нарекува преварантска, а Бугарите биле тие што давале пари. Вработените укажуваат дека Палитов на состанокот го спомнува и „Макфакс“ и им објаснува на транспортерите дека вицепремиерот Кочо Анѓушев наредува што да пишува овој медиум, што е апсолутна невистина, но затоа тој има свои медиуми на кои во секое време може да им се јави и да им каже што да напишаат.

На снимката Палитов ги убедува транспортерите дека „Фени“ е битка меѓу вицепремиерот Кочо Анѓушев и ексдиректорот на УБК, Сашо Мијалков, посочија вработените.

(М.И.П.)