Daily news
(ВИДЕО)Бошњаковски: Владата на Груевски потрошила 38 милиони евра за кампањи
Минатата владата предводена од Никола Груевски и ВМРО-ДПМНЕ за владини кампањи како „Имај трето дете“, „Истражи ја Македонија“, „Против абортус“ во периодот од 2008 до 2015 година потрошила вкупно 38 милиони евра, пари од Буџетот на Македонија, односно пари на граѓаните, информираше портпаролот на Владата, Миле Бошњаковски.
Како што кажа тој во оваа сума не се вклучени годините 2006, 2007 и 2016 бидејќи не успеале да најдат документација за нив.
Владините кампањи финансирани од поранешната влада оделе селективно на неколку телевизии со национална концесија за кои портпаролот Бошњаковски не сакаше да ги открие имињата. Најголем дел од парите од буџетот добила телевизија под шифра „11“ и тоа 7 милиони евра. Исто така, телевизија со национална концесија која е основана во 2012 година и која се води под шифра „33“ по само две години од нејзиното стартување од државата добила пола милион евра, наспроти други телевизии со национална концесија кои добивале само по 20 илјади евра.
Ваквиот тренд продолжил и со регионалните телевизии, каде по промена на раководството, телевизиите почнале да добиваат значителни договори со суми од по 15 илјади евра, а претходно добивале само по 100 евра од владата.
Порпаролот Бошњаковски исто така информираше дека 15 милиони евра од буџетот на РМ биле дадени на неколку маркетинг агенции блиски до тогашната влада, а исто така биле дадени и 200 илјади евра за истражување на јавното мислење.
Електронските медиуми од владините кампањи добивале најмногу, односно во периодот од 2008 до 2015 година, одредени електронски медиуми добиле вкупно 23 милиони евра од буџетот.
Портпаролот Бошњаковски потенцираше дека треба да се обрне внимание на денот 24 декември 2008 година, кога од Буџетот на Македонија биле исплатени 2 милиони и 125 илјади евра на неколку национални телевизии.
Во Владата се уште нема одлука дали ќе се почне судска постапка против членови на поранешната влада околу овие трошења.
Виктор Јованов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.