Daily news
ВМРО-ДПМНЕ не се појави на седницата за предлог-законот за употреба на јазиците
Пратениците на ВМРО-ДПМНЕ повторно не се појавија на седницата на Комисијата за европски прашања, на којашто се разгледува предлог-законот за употреба за јазиците.
„Сакаме опозицијата да дојде во Собрание и заедно да одлучуваме за амандманите. Тие се дел од потписниците на Рамковниот договор, а со овој закон се затвара нормативниот дел од истиот“, рече претседателот на Комисијата, Артан Груби.
На денешната седница присуствуваше Министерот за правда, Билент Салиу, откако минатиот пат поради негово остуство седницата беше одложена.
Првиот претрес на амандманите е за насловот на законот, кој наместо “Предлог закон за употреба на јазиците” бараат да се гласи “Предлог закон за употреба на албанскиот јазик”. Министерот за правда не го прифати овој амандман.
Весел Мемеди од Национална демократска партија (РДК) во врска со промена на името на предлог законот рече дека албанските лидери биле премногу воздржани во минатите 25 години за ова прашање. Според него, она што БЕСА го бара со амандманот е лажен патриотизам.
„Оваа воздржаност треба идентично да се третира од страна на албанците, но и македонските партии. Ова трпение постои поради две причини, а се однесува на тоа што бил потребен подолг временски период каде требало сите да се преиспитаат за унапредување на албанскиот јазик. Втората причина што албанските партии биле воздржани е поради тешката состојба во Албанија и Косово. Тие имаат најголем допринос за статусот на Албанците во Македонија. Ова трпение се заокружува со овој предлог-закон“, рече Мемеди.
Мемеди потенцираше дека со предлог законот не е загрозен уставниот поредок ниту пак, македонскиот јазик. Според тоа што тој го кажа, лажниот патриотизам кој го имало во изминатите 25 години бил причина за денешната состојба во Македонија.
Комисијата треба да одлучува за амандманите кои во најголем дел се поднесени од ВМРО-ДПМНЕ. Предложени се вкупно 90 амандмани.
К.Ландов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.