Полицијата откри насади со марихуана кај местото Јаворица, а притворени се татко и син кои се осомничени дека ги насадиле стеблата.

Основното јавно обвинителство Кавадарци отвори итрага против две лица, татко и син на возраст од 56 и 33 години, поради основано сомнение неовластено производство и пуштање во промет на наркотични дроги, психотропни супстанции и прекурсори и неовластено изработување, држење, посредување и тргување со оружје и распрскувачки материи.

„Во координирана акција и извршен претрес, на 28 септември, во планински предел кај место викано Јаворица во близина на викенд-куќа во сопственост на осомничените, пронајдени се 65 стебла од растението канабис сатива. Осомничените, татко и син, неовластено заради продажба го произведувале растението, за што обезбедиле и опрема за наводнување и обработка на насадите“, соопшти Обвинителството.

При претресот, пронајдено е и оружје кое осомничените неовластено го држеле и тоа 8 патрони за ловечка пушка, 38 куршуми калибар 7,9 мм и затворач за пушка М-48 и ловечка пушка марка „Црвена застава  крагуевка“ со калибар 12мм.

Судот им определи притвор на осомничените од по 30 дена.​

Основното јавно обвинителство Скопје отвори истрага против 28-годишен скопјанец кај кого била пронајдена дрога и оружје.

„Осомничениот 29-годишник на 28 септември во неговото живеалиште на улицата Бранко Заревски и на адресата на која непријавено престојувал на улица Париска во Скопје, неовластено заради продажба држел марихуана спакувана во зипер-кеса, две целофански пакувања и бело најлонско пакување со вкупна нето-маса од 29 грама, 27 семки од растение кое припаѓа на растителниот род Cannabis, како и кокаин во две најлонски пакувања со вкупна нето-маса од 3,77 грама. При претресот била пронајдена и дигиталната вага со остатоци од кокаин. Тој недозволено држел и муниција – 30 куршуми со калибар 6,35 наменети за огнено оружје – полуавтоматски пиштол“, соопштија од скопското Обвинителство.

Поради опасност од бегство, до судот е доставен предлог за определување мерка притвор за осомничениот.

Против 34-годишен стружанец од селото Радолишта поведена е кривична пријава за разбојништво и попречување на правдата.

Од полицијата информираат дека тој минатиот месец на вработен во бензиска пумпа во близина на струшкото село Теферич му упатил сериозни закани за неговиот живот. Му барал пари по што украл поголема количина цигари и избегал.

Сето тоа го видел 22-годишен жител на Радолишта. Крадецот се обидел да влијае врз него барајќи да даде лажен исказ за стореното разбојништво, а потоа и физички го нападнал.