Црна хроника
Спречен обид за шверц на лекови

Цариниците од граничниот премин Табановце автопат спречија обид за криумчарење на лекови за човечка употреба, при што привремено се задржани над 78 илјади разни таблети, капсули, масти, капки и ампули.
Во понеделник, во пладневните часови, за влез во државата се пријавило патничко моторно возило со македонски регистарски ознаки, управувано од македонски државјанин со иницијали Б.Д., во придружба на лице со иницијали С.Д., исто така македонски државјанин.
Патниците изјавиле дека немаат ништо за пријавување за царинска контрола, но сепак царинските службеници одлучиле да извршат контрола на возилото, при што во багажникот биле пронајдени седум картонски кутии полни со разни лекови.
Вредноста на лековите, кои се со потекло од Грција, е процената на преку 380 илјади денари. /крај/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Црна хроника
Малолетници фатени со алкохол в рака и по полноќ, казни за газдите на локалите

Малолетно лице било послужено со алкохол, а друго било затекнато во угостителски објект по полноќ, при акциска контрола што полицијата ја спровела во два локали во Македонска Каменица, соопшти Министерството за внатрешни работи.
Како што информираат од МВР, акцијата била реализирана на 17 мај од страна на СВР Штип – ОВР Делчево, во координација со Државниот пазарен инспекторат и Дирекцијата за заштита и спасување. При контролата биле утврдени сериозни прекршувања на законските прописи.
„Констатирано е кривично дело – точење алкохол на малолетно лице, како и прекршок за присуство на малолетник во угостителски објект после 24:00 часот. За наведените дејствија ќе бидат поднесени соодветни пријави“, стои во соопштението на МВР.
Од Министерството додаваат дека од страна на инспекциските служби се евидентирани и други неправилности, за кои се изречени соодветни мерки.
Црна хроника
Пукал со воздушна пушка кон деца кои му береле цреши во дворот

69-годишен жител на Свети Николе е приведен откако пукал со воздушна пушка од терасата на својот дом кон неколку деца кои береле цреши од дрво во неговиот двор, соопшти денеска Министерството за внатрешни работи.
Инцидентот се случил на 16 мај 2025 година во 14:00 часот на улицата Питу Гули во Свети Николе. Според информациите од СВР, осомничениот В.И. (69) бил лишен од слобода од страна на полициски службеници од ОВР Свети Николе.
„Лицето од тераса на својата куќа испукало со воздушна пушка кон неколку малолетни лица кои береле цреши од дрво кое се наоѓа во неговиот двор. Повредени нема, а по преземените мерки тој е приведен“, информираат од МВР.
По целосно расчистување и документирање на случајот, против осомничениот ќе биде поднесена кривична пријава по член 288 од Кривичниот законик – за „предизвикување општа опасност“.
Црна хроника
Жена нападната на паркинг во Аеродром, полицијата ја бара сторителката

Жена била физички нападната од друго женско лице на паркинг пред угостителски објект во скопската општина Аеродром, по претходен конфликт во сообраќајот, информираат од Министерството за внатрешни работи.
Како што соопшти СВР Скопје, инцидентот се случил на 15 мај 2025 година околу 14:30 часот. Случајот бил пријавен само пет минути подоцна од страна на нападнатата Д.Б. (45) од Скопје.
„Според пријавеното, на паркинг простор пред угостителски објект на подрачјето на општина Аеродром, по претходно недоразбирање во сообраќајот, пријавителката била физички нападната од женско лице“, соопштија од МВР.
Полицијата презема мерки за целосно расчистување на случајот и идентификација на напаѓачката.