Црна хроника
Обвинет во „Монструм“: Никогаш не сум бил на Железарските езера

Никогаш не сум бил на Железарските езера и не сум учествувал во петкратното убиство, изјави Агим Исмаиловиќ, обвинет во случајот „Монструм“, кој се товари дека е еден од извршителите на петкратното убиство кај Смилковското езеро во април минатата година.
На продолжението од судскиот процес тој ги отфрли наводите во обвинението и рече дека не е точно она што го изјавил заштитениот сведок и еден од обвинетите, Хаки Азири. На кобниот ден бил четири до пет пати на „клањање“ во џамијата во Сингелиќ, бил зафатен со изработка на канализација во неговата куќа, а околу 18:30/19:00 часот бил на работа ноќна смена во интернет-кафе во Сингелиќ. Со ова интернет-кафе работеле неговиот брат Африм Исмаиловиќ и Алил Демири, кои моментално се во бегство.
„Покрај Железарските езера сме поминувале кога сме оделе за на гробишта, но никогаш не сум бил на овие езера“, рече Исмаиловиќ. За неговиот брат Африм вели дека не знае каде е и дека не го видел од крајот на април. Ниту тој, ниту, пак, неговиот брат Африм никогаш не биле во Авганистан или друга арапска земја.
Фејзи Азири, кој е обвинет за организација и логистика на петкратното убиство, во детали опиша како го поминал 12-ти април, денот кога се случи убиството. Тој ден, рече дека бил на неговата фарма во Белимбегово, во општина Илинден, каде се видел со министерот за транспорт и врски, Миле Јанакиески, како и со градоначалникот на оваа општина, Жика Стојановски.
На оваа средба, на градоначалникот Стојановски му ветил дека ќе му даде и едно јагне за Велигденските празници. Остатокот од денот го минал на неговата фарма во близина на општината. Се сретнал со неколку пријатели и во 22:00 часот се вратил дома. Вели дека освен неговите внуци, Хаки Азири и Алил Демири, другите обвинети не ги познава.
Судењето е во тек. Обвинителството, судот и адвокатите му поставуваат прашања на обвинетиот Азири.
Судскиот процес за грозоморното убиство коешто ја потресе целата земја почна на 20-ти декември, а на обвинителната клупа седнаа Агим Исмаиловиќ, Фејзи Азири, Рами Сејди и Хаки Азири. Судењето се снимаше визуелно и тонски со две камери. На другите двајца обвинети, Алил Демири и Африм Исмаиловиќ кои се во бегство, ќе им се суди во отсуство.
Според обвинението, шестмината обвинети се товарат за тероризам, освен Хаки Азири, кој се товари за помагање.
Обвинетите, како што пишува во обвинението, имале намера со загрозување на животот и телото да создадат чувство на несигурност и страв кај граѓаните, па на свиреп и подмолен начин лишиле од живот пет лица од македонска националност. Во обвинението, освен обвинетите, се споменуваат и други непознати лица кои биле заедно со обвинетите. Како извршители на убиството се товарат Африм и Агим Исмаиловиќ и Алил Демири.
Во убиството коешто се случи на 12-ти април без причина беа убиени матурантите Кире Тричковски, Филип Славковски, Цветанчо Ацковски, Александар Наќевски и рибарот Борче Стефковски. /крај/фф/ач
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Црна хроника
Возач во Гостивар усмрти 18-годишен мотоциклист

Полицијата уапси гостиварец кој со автомобил предизвика несреќа и усмрти млад мотоциклист.
Според информациите од МВР, ноќеска во 01.40 часот било пријавено дека се случила сообраќајна несреќа на ул.„Илинденска“ во Гостивар, помеѓу патничко возило „бе-ем-ве“ со швајцарски национални ознаки, управувано од И.М.(38) од с.Балиндол, гостиварско и мотоцикл со гостиварски регистарски ознаки, управуван од А.Б.(18) од Гостивар.
Од здобиените повреди на местото на несреќата починал мотоциклистот, а лекар од Итна медицинска помош констатирал смрт.
Возачот И.М. бил лишен од слобода, а по наредба на јавен обвинител, увид извршила увидна екипа на ОВР Гостивар и по целосно документирање на случајот, против него ќе биде поднесена соодветна пријава.
Црна хроника
Претрес во Кочани, пронајдени пиштол и марихуана, приведено едно лице

Полицијата во Кочани го приведе 36-годишниот К.И.. При претрес во неговиот дом, извршен со судска наредба, биле пронајдени и одземени пиштол „црвена Застава“ калибар 7,65 мм, марихуана и дробилка со остатоци од марихуана.
Лицето било задржано во полициска станица и по целосно расчистување и документирање на случајот, против него ќе биде поднесена соодветна пријава, информираше МВР.
Црна хроника
Притвор за српски државјанин кој кај Гевгелија возел со лажни италијански таблички

Основното јавно обвинителство Гевгелија поведе постапка против државјанин на Република Србија осомничен за фалсификување исправа.
Осомничениот на 24 јули, на регионалниот пат Гевгелија – Богданци управувал автомобил Фолксваген поло со лажни италијански регистарски таблички.
Полициски службеници во близина на раскрсницата Ѓавато му дале светлосен знак да застане за да извршат редовна контрола. Но осомничениот не запрел туку го забрзал возилото, а полицајците го следеле. Кај местото викано „Карпи“ го оставил автомобилот и побегнал, но по кратко време бил пронајден. Полицијата констатирала дека осомничениот не поседува сообраќајна дозвола или каква било друга документација за да се утврди потеклото на возилото, додека регистарските таблици припаѓаат на друго возило.
По предлог на јавниот обвинител, судија на претходна постапка од Основниот суд во Гевгелија определи мерка притвор во траење од осум дена за осомничениот.