Три сефа со предмети од историско значење се пронајдени во домот на сопругата во Охрид на еден од осомничените во истрагата за кражбата во Националната установа „Музеј Македонија“ на шести ноември, минатата година, соопшти Министерството за внатрешни работи.

Во четврток, полицијата изврши претрес на дом и други простории во Охрид кај сопруга на лице осомничено во врска со истрагата за кражбата во „Музеј Македонија”.

Во претресот биле пронајдени три сефа во кои имало осум метални предмети од историско значење, кои преставуваат делови од народна носија и тоа едно метално ланче со 58 метални привезоци во вид на парички, едно метално ланче со 12 синџирчиња и еден метален брош, еден женски везан колан за носија со 49 монети со различна големина, еден метален машки колан, четири метални предмети со украсни гравури и четири метални делови на кои на два има четири броша.

Исто така, при претресот во поткровниот дел на куќата се пронајдени се 12 дрвени предмети во форма на секири, боздоган и еден меч, како и една икона „Успение на Пресвета Богородица”.

Осуммината осомничени за кражба на вредните артефакти од крајот на февруари се во притвор, а меѓу нив се и поранешниот директор на Дирекцијата за заштита на културно наследство, Паско Кузман, кој веќе издржува домашен притвор бидејќи е осомничен во случајот „Фаланга”, како и актуелниот и поранешниот директор на Музејот, Дарко Кржовски и Перо Јосифовски./крај/мф/сд